ނަޞްރުގެ ދުވަހުގެ މުނާސަބަތުގައި ދިދަނެގުމުގެ ޚާއްސަ ރަސްމިއްޔާތު ބާއްވައިފިއެވެ. މިއަހަރުގެ ނަޞްރުގެ ދުވަސް ފާހަގަކުރުމުގެ މާލޭގެ އިތުރުން އެމް.އެން.ޑީ.އެފްގެ ހުރިހާ އޭރިއާ ކޮމާންޑްތަކެއްގައިވެސް ދިދަނެގުމުގެ ރަސްމިއްޔާތު ވަނީ ބާއްވާފައެވެ.
އެމް.އެން.ޑީއެފްގެ މާލެއާއި އަތޮޅުތަކުގެ ސެންޓްރަލް ކޮމާންޑުތަކުގައި މިއަހަރުގެ ނަޞްރުގެ ދުވަސް ފާހަގަކުރުމުގެ ހަރަކާތްތައް މިއަދު ފަށާފައިވަނީ ބޮޑު ޖަމާޢަތުގައި ކުރެވުނު ފަތިސް ނަމާދުންނެވެ.
މާލޭގައި ބޮޑު ޖަމާޢަތުގައި ފަތިސްނަމާދުކުރުން އޮތީ މަސްޖިދުއްސުލްތާން މުޙައްމަދު ތަކުރުފާނުލްއަޢުޒަމް، އިސްލާމީ މަރުކަޒުގައެވެ. މި ޖަމާޢަތުގައި ގިނަ ޢަދަދެއްގެ ސިފައިން ވަނީ ބައިވެރިވެފައެވެ.
ނަޞްރުގެ ދުވަހުގެ ދިދައާއި ގާޑް މައުންޓްކުރުމުގެ ރަސްމިއްޔާތު މާލޭގައި ބާއްވާފައިވަނީ ނޮވެމްބަރު 3 ގެ ހަނދާނީ ބިނާ ކުރިމަތީގައެވެ.
މި ރަސްމިއްޔާތު ޝަރަފުވެރިކޮށްދެއްވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ. މީގެ އިތުރުން މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފްގެ އިތުރުން އެމް.އެން.ޑީ.އެފްގެ އިސް އޮފިޝަލުން މި ރަސްމިއްޔާތުގައި ބައިވެރިވެވަޑައިގަތެވެ.
މި ރަސްމިއްޔާތުގައި ނޮވެމްބަރ ތިނެއްގައި ޝަހީދުވި ސިފައިންގެ ހަނދާނުގައި ހަމަހިމޭންކަމުގެ ސުކޫތެއް ވަނީ ގެނެސްފައެވެ. އަދި ސިފައިންގެ ޢަޒުމް އާކޮށް ޝަހީދުވި ސިފައިންގެ ހަނދާނުގައި 7 ބަޑީގެ ސަލާމެއް ވަނީ އަރުވާފައެވެ. މީގެ އިތުރުން ދުވަހާއި ގުޅޭ ޚާއްސަ ދުޢާއެއްވެސް ވަނީ ކޮށްފައެވެ.
މިއަހަރުގެ ނަޞްރުގެ ދުވަސް ފާހަގަކުރުމަށް އެމް.އެން.ޑީ.އެފުން ހިންގުމަށް ހަމަޖެހިފައިވާ ހަރަކާތްތަކަށް ބަލާލާއިރު، މިއަދު ހަވީރު މާލެއާއި، ސެންޓްރަލް ކޮމާންޑުތަކުގައި "ވިކްޓްރީ ލެޕް"ގެ ނަމުގައި ބާއްވާ ޚާއްސަ ދުވުން އޮންނާނެއެވެ.
މިއީ ދިވެހި އަސްކަރިއްޔާގެ ކާމިޔާބީ ފާހަގަކުރުމަށާއި، އަސްކަރީ ސަފުތަކުގެ ބަދަހިކަން ދައްކައިދިނުމާއި، ޤައުމީ ރޫޙާއި ޖޯޝް ލަޝްކަރުގައި އަށަގެންނެވުމަށް ބާއްވަމުންގެންދާ ސިލްސިލާ ހަރަކާތެކެވެ. ވަކިން ޚާއްޞަކޮށް މި ހަރަކާތް ރަމްޒުކޮށްދެނީ ދީނާއި ޤައުމުގެ ޙައްޤުގައި ޝަހީދުވި މަތިވެރި އަބްޠާލުންގެ ޒިކުރާއެވެ.
ނަޞްރުގެ ދުވަހާއި ގުޅިގެން ބާއްވާ އަސްކަރީ ޕެރޭޑް މިއަހަރު ބޭއްވުމަށް އެމް.އެން.ޑީ.އެފުން ނިންމާފައިވަނީ ނަޞްރުގެ ދުވަހުގެ ބަޠަލު ޝަހީދު ކޯޕްރަލް ޙުސައިން އާދަމްގެ އުފަން ރަށް ކަމުގައިވާ ކުޅުދުއްފުށި ސިޓީގައެވެ. މި ޕެރޭޑް ކުޅުދުއްފުށި ސިޓީގެ ބޮޑެތި މަގުތަކުގައި އޮންނާނީ ހުކުރު ދުވަހުގެ ހަވީރު 4 ޖަހާއިރެވެ.
ރާއްޖޭގައި ނަޞްރުގެ ދުވަސް ފާހަގަކުރަނީ 1988 ވަނަ އަހަރުގެ ނޮވެމްބަރު ތިންވަނަ ދުވަހު ދިވެހިންގެ ބަޔަކު ބޭރުގެ ކުލީ ސިފައިންނާއެކު ރާއްޖެ އަރައި ދިން ޢުދުވާނީ ޙަމަލާއިން ދިވެހިންނަށް ލިބުނު ނަޞްރާއި ކާމިޔާބު ފާހަގަކުރުމުގެ ގޮތުންނެވެ.