ކަނޑުމަހުގެ ތަފާތު އެކި އުފެއްދުންތައް ތައްޔާރުކުރާ ފަރާތްތަކަށް އަމާޒުކޮށްގެން ފިޝަރީޒް މިނިސްޓްރީން، ޖަޕާން އިންޓަރނޭޝަނަލް ކޯރޕަރޭޝަން، ޖައިކާ އާއި ގުޅިގެން ތަމްރީން ޕްރޮގްރާމެއް ފަށައިފިއެވެ.
ޕްރޮމޯޝަން އޮފް ބްލޫ އިކޮނޮމީ ޕްރޮޖެކްޓުގެ ދަށުން ރ. މަޑުއްވަރީގައިވަނީ ތަމްރީން ޕްރޮގްރާމެއް ހިނގާފައެވެ. މަސްވެރިކަމުގެ ތަފާތު އުފެއްދުންތައް ތައްޔާރުކުރާ 12 ފަރާތަކުން މި ޕްރޮގްރާމުގައި ބައިވެރިވެފައިވެއެވެ.
ފިޝަރީޒް މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އަދި ޖައިކާގެ ޕްރޮމޯޝަން އޮފް ބްލޫ އިކޮނޮމީ އިން ފިޝަރީޒް ޕްރޮޖެކްޓުގެ މެނޭޖަރ މެނޭޖަރ އާދަމް މަނިކު ވިދާޅުވީ މި ތަމްރީން ޕްރޮގްރާމުގެ ސަބަބުން، މަހުން އުފައްދާ ބާވަތްތަކުގެ ކޮލިޓީ ރަނގަޅު ކުރުމަށް އެހީތެރިވެދޭނެ ކަމަށެވެ.
"މިހާރަށްވުރެ ފެންވަރު ރަނގަޅުކޮށް، އަދި ރައްކާތެރިކޮށް ތައްޔާރުކުރުމަށް ތަމްރީންގައި ކިޔާދެނީ، މިކަމާއި ގުޅޭގޮތުން ޖަޕާނުގެ އެކްސްޕާޓަކާއި، މިނިސްޓްރީގެ މުވައްޒަފުން ހަރަކާތްތެރިވަނީ،" އާދަމް މަނިކް ވިދާޅުވިއެވެ.
މި ތަމްރީން ޕްރޮގްރާމުގައި އުފެއްދުންތަކުގެ ކޮލިޓީ ދެނެގަންނަން ކުރެވިދާނެ ޓެސްޓުތައްވެސް ކިޔާ ދޭނެ ކަމަށްވެސް އާދަމް މަނިކް ވިދާޅުވިއެވެ. މި ތަމްރީން ޕްރޮގްރާމް ރާއްޖޭގެ 5 ރަށެއްގައި ކުރިއަށްގެންދިޔުމަށްވަނީ ރާވާފައެވެ. އެގޮތުން ދެން މި ޕްރޮގްރާމް ބޭއްވުމަށް ހަމަޖެހިފިއިވަނީ ތ.ހިރިލަންދޫގައެވެ.
ޕްރޮމޯޝަން އޮފް ބްލޫ އިކޮނޮމީ ޕްރޮޖެކްޓުގެ ދަށުން ކަންނެލީގެ މަސްވެރިކަމަށް ޚާއްސަކޮށްގެންވެސް ތަމްރީންތަކެއް ހިންގުމަށްވަނީ ހަމަޖެހިފައެވެ. އެގޮތުން ބިގް ފިޝް އަދި އެންސިސް އާއި ގުޅިގެން މި ތަމްރީންތައް އަންނަ ހަފްތާތެރޭ ކުރިއަށްގެންދިޔުމަށް ހަމަޖެހިފައިވާ ކަމަށް ފިޝަރީޒް މިނިސްޓްރީން ވިދާޅުވެއެވެ.
ޕްރޮމޯޝަން އޮފް ބްލޫ އިކޮނޮމީ ޕްރޮޖެކްޓުގެ ދަށުން ކުރިއަށްގެންދާ ހުރިހާ ހަރަކާތްތަކަށް ފަންޑު ހަމަޖައްސައިދޭނީ ޖަޕާން ސަރުކާރުންނެވެ. މިޕްރޮޖެކްޓުގެ ދަށުން ހިންގާ ހަރަކާތްތައް 2024 ގެ ނިޔަލަށް ކުރިއަށް ގެންދިޔުމަށްވަނީ ރާވާފައެވެ.