މިފަހަރުގެ ކުލަބު މޯލްޑިވްސް ކަޕު ކާމިޔާބުކުރުން އެމްޕީއެލް އަށް މުހިއްމު ކަމަށާއި އެ އަމާޒަށް ވާސިލުވާން ޓީމުގެ ހުރިހާ ކުޅުންތެރިންނާއި އޮފިޝަލުންވެސް ތިބީ ބޮޑު އުއްމީދެއްގައި ކަމަށް ޓީމުގެ މެނޭޖަރު މުހައްމަދު އަބްދުލް ރަހުމާން ބުނެފިއެވެ.
މުބާރާތުގެ އެންމެ ކާމިޔާބު ޓީމުތަކުގެ ތެރޭގައި ހިމެނޭ އެމްޕީއެލް މިއަހަރު ޗެމްޕިއަންކަން ހޯދައިފިނަމަ އެސްޓީއޯ އާއި އެއް އަދަދަކަށް ތަށި ލިބޭނެއެވެ. މިހާތަނަށް އެސްޓީއޯ ހަތަރު ފަހަރު މި ތަށި ހޯދިއިރު އެމްޕީއެލް ވަނީ ތިން ފަހަރު މި ތަށި ހޯދާފައެވެ.
މިއަހަރު މުބާރާތުގެ ފައިނަލަށް އެމްޕީއެލް ދަތުރުކުރީ ސެމީފައިނަލުގައި ކުލަބު އެޗްޑީސީ އާއި އެއްވަރުކޮށް، ފަހަތުން އަރާ ޕެނަލްޓީ ޖަހައިގެން 6-7 ގެ ނަތީޖާއަކުންނެވެ. ތިން ފަހަރު ޗެމްޕިއަންކަން ހޯދާފައިވާ އެމްޕީއެލް އިން ފަސް އަހަރު ތެރޭ ކުޅޭ ފުރަތަމަ ފައިނަލުގައި ހޮނިހިރު ދުވަހުގެރޭ ފެނަކައާ ކުޅޭއިރު، މިއީ ހުރިހާ ގޮތަކުން ވެސް އެ ޓީމަށް މުހިއްމު މުބާރާތެކެވެ.
މި ކާމިިޔާބީގެ މުހިއްމުކަން ހާމަކޮށް ޓީމުގެ މެނޭޖަރ މުހައްމަދު އަބްދުލް ރަހްމާން ބުނީ ތިން ފަހަރު ތަށި ހޯދި ނަމަވެސް މި ކާމިޔާބީ ނުލިބި ފަހަރުތަކެއް ގޮސްފައިވާ ކަމަށެވެ. އެހެންކަމުން ބޭނުންވަނީ މި ފަހަރު އަނެއްކާވެސް އެމްޕީއެލް އަށް އެ ތަށި އަނބުރާ ލިބުން ކަމަށްވެސް މެނޭޖަރ ބުންޏެވެ.
ކުޅުނު ހުރިހާ މެޗަކުން މޮޅުވެ އެމްޕީއެލް ފައިނަލަށް ދަތުރުކުރި އިރު، މިއަހަރު މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ރޭގަނޑު އެވެ. މި މެޗު ޔެސް ޓީވީން ވަގުތުން ގެނެސްދޭގޮތަށް ވަނީ ހަމަޖެހިފައެވެ.