އ.ދގެ 2022 ވަނަ އަހަރުގެ ކްލައިމެޓް ޗޭންޖް ކޮންފަރެންސް، "ކޮޕް-27" ސަމިޓް މިސްރުގައި މިއަދު ފަށައިފިއެވެ.
މިފަހަރުގެ ސަމިޓުގައި ދުނިޔޭގެ 120 އަށްވުރެ ގިނަ ލީޑަރުން ބައިވެރިވެވަޑައިގަންނަވާނެކަމަށް ބެލެވެއެވެ.
ކޮޕް-27 ސަމިޓް މިސްރުން ހޯސްޓްކުރާއިރު، މިސަމިޓް ކުރިއަށްދާނީ މިމަހުގެ 6 އިން 18 މިޞްރުގެ ޝަރްމުއްޝައިޚުގެ އިންޓަރނޭޝަނަލް ކޮންވެންޝަން ސެންޓަރުގައެވެ.
އ.ދގެ ކްލައިމެޓް ޗޭންޖް ކޮންފަރެންސްގައި ހިމެނެނީ ކޮންފަރެންސް އޮފް ދަ ޕާޓީސް (ކޮޕް 27) ގެ 27 ވަނަ ސެޝަނާއި، ކިޔޯޓޯ ޕްރޮޓޮކޯލް (ސީއެމްޕީ 17) ގެ ބައިވެރިންގެ ކޮންފަރެންސް އޮފް ދަ ޕާޓީސްގެ 17 ވަނަ ސެޝަނާއި، ޕެރިސް އެގްރީމެންޓް (ސީއެމްއޭ 4) ގެ ބައިވެރިންގެ ކޮންފަރެންސް އޮފް ދަ ޕާޓީސްގެ ހަތަރު ވަނަ ސެޝަނެވެ.
މިސަމިޓް ހުޅުވުމުގެގޮތުން ބޭއްވި ރަސްމިއްޔާތުގައި އދ.ގެ ކްލައިމެޓް ޗޭންޖްގެ އައު ޗީފް، ސައިމަން ސްޓިއެލްއާއި މިސްރުގެ ޚާރިޖީ ވަޒީރު އަދި ކޮޕް-27ގެ ރައީސް ކަމަށް ކަނޑައެޅުއްވި ސަމެހް ޝައުކްރީގެ ތަޤުރީރުކުރެއްވިއެވެ. ސަމިޓްގެ ސެޝަންތައް ރަސްމީކޮށް ފަށާނީ ހޯމަދުވަހުއެވެ. އެގޮތުން ހޯމަ ދުވަހު ބާއްވާ "ވޯލްޑް ލީޑަރސް ސަމިޓް"ގައި ޤައުމުތަކުގެ ވެރިންނާއި، ޤައުމުތައް ތަމްޞީލުކުރައްވާ މަންދޫބުންނަށް، މިސަމިޓުން ހާސިލުކުރަން ބޭނުންވާ ކަންކަން ބަޔާންކޮށް ތަޤުރީރުކުރެއްވުމަށް 5 މިނެޓުގެ ފުރުޞަތު ދެވޭނެއެވެ.
މިފަހަރުގެ ސަމިޓުގައި ދިވެހިރާއްޖޭގެ ފަރާތުން ބައިވެރިވެވަޑައިގަންނަވާ ވަފްދުގައި އިސްކޮށް ހުންނަވާނީ ރައީސުލްޖުމްހޫރިއްޔާގެ ނައިބު ފައިޞަލް ނަސީމްއެވެ. ކޮޕް-27 އަކީ ރާއްޖޭގެ ދެމެހެއްޓެނިވި ތަރައްޤީގެ ޕްލޭންތައް ބައިނަލްއަޤްވާމީ މުޖްތަމަޢުއާ ހިއްސާކުރުމަށް ރާއްޖެއަށް ފަހިވެގެންދާ މުހިންމު ފުރުޞަތެކެވެ. މިކޮންފަރެންސްގައި، ރައީސުލްޖުމްހޫރިއްޔާގެ ނައިބު، ހޯމަ ދުވަހު ރާއްޖޭގެ ފަރާތުން ޤައުމީ ބަޔާން އިއްވެވުމަށް ހަމަޖެހިފައިވެއެވެ.
މިއަހަރުގެ ކޮޕް ސަމިޓްގައި ރާއްޖެއިން އެންމެބޮޑަށް ވަކާލާތުކުރާނީ މޫސުމަށް އަންނަ ބަދަލުތަކަށް ހޭނުމަށް ކުރަންޖެހޭ ޚަރަދުތައް ހޯދުމަށް ކަމަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާއިމިނަތު ޝައުނާ ވަނީ ވިދާޅުވެފައެވެ. އަދި މިފަހަރުގެ ކޮޕް ސަމިޓަކީ މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތަކާއި އެގެއްލުންތަކުން އަރައިގަތުމަށް ބަދަލުހޯދުމާއި ގުޅޭގޮތުން ކުދި ޖަޒީރާ ޤައުމުތަކުން ވަރަށް ބޮޑަށް ވަކާލާތު ކުރާނެ ސަމިޓްވެގެންދާނެކަން މިނިސްޓަރ ވަނީ ފާހަގަކުރައްވާފައެވެ.
ކޮޕް-27ގެ ތެރެއިން ބާއްވާ ރައުންޑް ޓޭބަލް ސެޝަންތައް މިމަހުގެ 7 އިން 8އަށް ކުރިއަށްދާއިރު، "ތީމެޓިކް ޑޭސް" ތަކުގެ ގޮތުގައި ތިމާވެއްޓާ ގުޅުންހުރި ތަފާތު މައުޟޫޢުތަކަށް ބާއްވާ ބައްދަލުވުންތައް މިމަހުގެ 9 އިން ފެށިގެން 18 ކުރިއަށްދާނެއެވެ. މިސަމިޓުގެ ތެރެއިން ކުރިއަށްގެންދާ ތަފާތު ސެޝަންތަކުގައި ސްޕީކަރުންގެ ގޮތުގައި 2000 އަށްވުރެ ގިނަ މަންދޫބުން ބައިވެރިވާނެއެވެ. އަދި މުޅި ސަމިޓުގައި ގާތްގަނޑަކަށް 35،000 އަށްވުރެ ގިނަ އޮފިޝަލުން ބައިވެރިވާނެކަމަށް ލަފާކުރެވެއެވެ.
މިފަހަރުގެ ސަމިޓުގައި މައިގަނޑުގޮތެއްގައި މަޝްވަރާކުރެވޭނެ ދާއިރާތަކުގެ ތެރޭގައި، އެންމެފަހުން ސްކޮޓްލެންޑުގެ ގްލަސްގޯގައި ބޭއްވި ކޮޕް-26 ސަމިޓުގައި ޤައުމުތަކުން އެއްބަސްވިކަންކަން ހާޞިލުކުރެވުނު މިންވަރާއި، މޫސުމަށް އަންނަމުންދާ ބަދަލުތަކަށް ހޭނުމަށާއި، އެކަންކަމުން ތިމާވެއްޓަށް ކުރާ އަސަރުތައް ކުޑަކޮށް، ލިބޭ ގެއްލުންތަކުން އަރައިގަތުމަށް ޤައުމުތަކުގެ މެދުގައި މާލީ އެހީތެރިކަން ފޯރުކޮށްދޭ ނިޒާމު މިހާރަށްވުރެ ހަރުދަނާކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވޭނެއެވެ. އަދި މޫސުމީ ބަދަލުތަކުގެ ސަބަބުން ސާފު ބޯފެނާއި، ކާނާގެ ޔަޤީންކަމަށް ކުރާ ނޭދެވޭ އަސަރުތައް ކުޑަކޮށް، އިނޮވޭޓިވް ފައިނޭންސް ފޯ ކްލައިމެޓް އެންޑް ޑިވެލޮޕްމަންޓް އަދި ހަކަތައިގެ ދާއިރާއަށް އިންވެސްޓްކުރުންފަދަ މައުޟޫޢުތަކަށްވެސް ވާހަކަދެކެވިގެންދާނެއެވެ.