ހުޅުމާލޭ ފުރަތަމަ ފިޔަވަހީގެ ފްލެޓުތަކުގައި ހުރި މައްސަލަތައް ދެނެގަތުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ފަށައިފިއެވެ. އެގޮތުން ހުޅުމާލޭ ފުރަތަމަ ފިޔަވަހީގައި ހުރި އެންމެ ދުވަސްވީ ފްލެޓުތަކުގެ މައްސަލަތަކާއި އާބާތުރަ ފިލުވުމަށްހުރި ކަންކަން ދެނެގަތުމުގެ މަސައްކަތް ކުރަމުން އަންނަކަމަށްވެސް އެޗްޑީސީން ވިދާޅުވިއެވެ.
އެޗްޑީސީން ވިދާޅުވީ ހުޅުމާލޭގައި އެންމެ ކުރިން އަޅާފައި ހުރި ފްލެޓްތައް ދުވަސްވުމުގެ ސަބަބުން އެކިކަހަލަ މަައްސަލަތައް ފާހަގަކުރެވެމުން އަންނަކަމަށެވެ. މިގޮތުން އިމާރާތް ދުވަސްވުމުގެ ސަބަބުން މަރާމާތުކުރުމުގެ މަސައްކަތްތައް އިތުރުވަމުން އަންނަކަމަށް އެޗްޑީސިން ވިދާޅުވިއެވެ. އަދި މިކަމުގެ ސަބަބުން އިމާރާތުގެ މަރާމާތުތަކުގެ މަސައްކަތައްކަށް އެތަކެއް ޚަރަދުތަކެއް ކުރަންޖެހުމާއި، އެކިކަހަލަ ގެއްލުންލިބިދާނެކަމުގެ ބިރުއޮންނަކަމަށްވެސް އެޗްޑީސީން ވިދާޅުވިއެވެ.
އެހެންކަމުން އެފަދަ އިމާރާތްތަކުގައި ހުރި މައްސަލަތައް ދެނެގަތުމަށް އެންމެ ރަނގަޅު ގޮތަކީ ފިޒިކަލް އިންސްޕެކްޝަނެއް ހެދުންކަމަށް އެޗްޑިސީން ފާހަގަކުރައްވައެވެ. އަދި މިހާރު އެ އިމާރާތްތަކުގެ މިހާރުގެ ހާލަތު ދެނެގަނެ، މަރާމާތުކުރަންޖެހޭ ތަންތަން ފާހަގަކުރުމަށްޓަކައި 1000 ފްލެޓްގައި އިންސްޕެކްޝަނެއް ވަނީ ފަށާފައެވެ.
އެޗްޑީސީން ވިދާޅުވީ މި މަސައްކަތްތަކާއެކު މަރާމާތުކުރުމުގެ މަސައްކަތަށް ޚަރަދުވާ ވަރުވެސް ދެނެގަނެ ލަސްތަކެއް ނުވެ އެ މައްސަލަތައް ހައްލުކުރުމުގެ މަސައްކަތް ފަށާނެކަމަށެވެ.
ހުޅުމާލޭގައި މީހުން އާބާދުވާން ފެށީ 2004 ވަނަ އަހަރުއެވެ. އެންމެ ފުރަތަމަ ހުޅުމާލޭގައި ޢިމާޜާތްކޮށްފައިވަނީ 210 އެޕާޓްމަންޓުގެ ފްލެޓާއި، 120 ލޭންޑް ޕްލޮޓް އަދި ވިޔަފާރިއަށް ޚާއްޞަ 34 ޔުނިޓެވެ. އެހެންކަމުން ގިނަ ދުވަސްވުމުގެ ސަބަބުން އެތަންތަނުގައި ގިނަ މަރާމާތުތަކެއް ހުރިކަން ފްލެޓުތަކުގައި ދިރިއުޅޭ މީހުން ބުނެއެވެ.