ހދ. ކުޅުދުއްފުށީ ރީޖަނަލް ހޮސްޕިޓަލްގައި ފުރަތަމަ ފަހަރަށް ލެޕްރޯސްކޯޕިކް ސަރޖަރީއެއްކޮށްފިއެވެ.
އިންދިރާގާންދީ މެމޯރިއަލް ހޮސްޕިޓަލްގެ ތަޖުރިބާކާރު ޑޮކްޓަރުންނާއެކު ކުޅުދުއްފުށީ ހޮސްޕިޓަލްގައި ކުރި މިސަރޖަރީއަކީ ރާއްޖެއިން އުތުރުގައި ކުރި މިފަދަ ފުރަތަމަ ސަރޖަރީއެވެ.
ލެޕްރޮސްކޯޕިކް ސާރޖަރީތައް އާންމު ގޮތެއްގައި ހަދަނީ އަންހެނުން ދަރިމައިވުމުގެ ނިޒާމު، ގޭސް އަދި ކުޑަކަމުދާ ނިޒާމަށް ދިމާވާ މައްސަލަތަކަށް ހައްލު ހޯދުށެވެ.
ލެޕްރޮސްކޯޕިކް ސަރޖަރީ އަކީ ބަނޑުގައި ކުޑަ ލޯވަޅެއް ނުވަތަ ލޯވަޅުތަކެއް އަޅައިގެން ކެމެރާގެ ޒަރީއާއިން ބަލައިގެން، ކުދި އޮޕަރޭޝަން ޓޫލްސް ބޭނުންކޮށްގެން ކުރެވޭ ހަށިގަނޑަށް ލުއި ސަރޖަރީއެކެވެ. ކީހޯލް ސަރޖަރީގެ ނަމުންވެސް ނަންދެވިފައިވާ މި އޮޕަރޭޝަނަށްފަހު ބަލިމީހާ ހޮސްޕިޓަލްގައި ހޭދަކުރާ ވަގުތު މަދުވެ، ތަހައްމަލް ކުރަން ޖެހޭ ވޭން ކުޑަވެ އަދި ހަށިގަނޑު ކެފުމުގެ ސަބަބުން ލާ ލަކުނު މަދު ނުވަތަ ބޮޑުތަނުން ކުޑަވެއެވެ.
ލެޕްރޮސްކޯޕިކް ސަރޖަރީތަކުގެ ތަޖުރިބާކާރެއް ކަމަށްވާ ސީނިޔަރ ކޮންސަލްޓަންޓް އިން ޖެނަރަލް ސަރޖަރީ، ޑރ. އަބްދުﷲ އުބައިދު އިސްވެ ހުންނަވައިގެން ކުރިޔަށް ގެންދެވި މި އޮޕަރޭޝް ކާމިޔާބު ކަމާއެކު ފުރިހަމަކޮށް ނިންމާލީ 50 މިނެޓުންނެވެ.
ކުޅުދުއްފުށީގައި ރަސްމީކޮށް މިއޮޕަރޭޝަންތައް ފެށުމަށް އިންދިރާ ގާންދީ މެމޯރިއަލް ހޮސްޕިޓަލްގެ ޚާއްސަ ޓީމެއް އިއްޔެ ކުޅުދުއްފުއްޓަށް ޒިޔާރަތްކޮށްފައިވާއިރު، މި ޓީމްގެ މެމްބަރުން އަމަލީ ގޮތުން އޮޕަރޭޝަންގައި ބައިވެރިވެލެއްވިއެވެ.
އޮޕަރޭޝަނަށްފަހު ޑޮކްޓަރުންގެ ޓީމްގެ ފަރާތުން ވާހަކަ ދައްކަވަމުން ޑރ. އުބައިދު ވަނީ މިއަދު މި ފެށިގެން ދިޔަ ޚިދުމަތަކީ ރައްޔިތުން ނުހަނު ބޮޑަށް ބޭނުންވެފައިވާ ޚިދުމަތެއްކަން ފާހަގަކުރައްވާފައެވެ. އަދި މި ޚިދުމަތް ދެމެހެއްޓެނެވި ގޮތެއްގައި ކުރިޔަށް ގެންދިޔުމަށް، އިންދިރާ ގާންދީ މެމޯރިއަލް ހޮސްޕިޓަލްގެ ފުރިހަމަ އެއްބާރުލުން ލިބޭނެކަމަށްވެސް އުބައިދު ވިދާޅުވިއެވެ. އެގޮތުން، މި ޚިދުމަތް ކުރިޔަށް ގެންދިޔުމަށް ކުޅުދުއްފުށީގެ ހޮސްޕިޓަލްގެ ޓީމަށް ބޭނުންވާ ތަމްރީނާއި އަދި އެކްސްޕަޓީސް ފޯރުކޮށްދެއްވުމުގައި ދެމިހުންނަވާނެކަމަށާއި، މިޚިދުމަތް އިތުރަށް ފުޅާވެގެންދާނީ ރާވާލެވިގެން ދެ ހޮސްޕިޓަލްގެ ތެރެއިން ކުރެވޭ މަސައްކަތުން ކަމަށްވެސް އުބައިދު ވިދާޅުވިއެވެ.
ކުޅުދުއްފުށީ ރީޖަނަލް ހޮސްޕިޓަލްގެ އޮޕަރޭޝަން ތިއޭޓަރުގެ ނާރސިން އިންޗާރޖް، ސީނިއަރ ރެޖިސްޓާރޑް ނާރސް، ހުރުމާ އަބްދުއްރަހްމާން ވިދާޅުވީ ކުރިން ބޮޑެތި ކެފުންތަކާއިއެކު ކުރެވުނު ބައެއް އޮޕަރޭޝަންތައް، ބަނޑުގައި އެޅޭ މަދު ލޯވަޅުތަކެއްގެ ޒަރީޢާއިން ކުރެވިގެން ދިއުމަކީ ބަލިމީހާއަށް އަދި އޮޕަރޭޝަން ޓީމަށްވެސް ލިބިގެންދާ ވަރަށް ބޮޑު ލުއިކަމެއްކަމަށެވެ.
ރާއްޖޭގެ އެކި ކަންކޮޅުތަކުގައިވާ ރީޖަނަލް ހޮސްޕިޓަލްތައް ބާރުވެރިކޮށް، ސިއްހީ ނިޒާމު ފައްކާކޮށް، ފުޅާކުރުމަކީ މި ސަރުކާރުގެ މުހިންމު ވަޢުދަކަށްވާއިރު، ލެޕްރޮސްކޯޕިކް ސާރޖަރީތައް ފެށިގެން ދިއުމަކީ ބޮޑުތިލަދުންމަތީގެ ރައްޔިތުންނަށް ލިބިގެންދާނެ ވަރަށް ބޮޑު ލުޔެކެވެ. އަދި ރާއްޖޭގެ މައި ހޮސްޕިޓަލަށްކުރާ ބާރު ކުޑަވެ، ރައްޔިތުންގެ ތަކުލީފު ކުޑަވެ، މިފަދަ ޚިދުމަތްތައް ހޯދުމަށް އާންމު ރައްޔިތުންކުރާ ހޭދަ ބޮޑުތަނުން ކުޑަވެގެންދާނެއެވެ.
ލެޕަރޮސްކޯޕިކް ސާޖަރީ އަދި ވޫންޑްކެއަރ ކުލިނިކް ފެށުމަށް @igmhmv އިން ވަޑައިގެންނެވި ޓީމްއާ @KRHmv ޓީމްއާ ބޭއްވުނު ބައްދަލުވުމުގެ ތެރެއިން. ލެޕަރޮސްކޯޕިކް ސާރޖަރީއަކީ ބަނޑުގައި ކުޑަލޯވަޅެއް ނުވަތަ ލޯވަޅުތަކެއް އަޅައިގެން ކެމެރާގެ ޒަރީއާއިން ބަލައިގެން ކުރެވޭ ލުއި އޮޕަރޭޝަނެއް pic.twitter.com/Vaa7YXntBj
— Kulhudhuffushi Regional Hospital (@KRHmv) November 6, 2022
ފާއިތުވީ، ހަތަރު އަހަރެއްހާ ދުވަހުގެ ތެރޭގައި ކުޅުދުއްފުށީ ރީޖަނަލް ހޮސްޕިޓަލުން ވަނީ ބޮޑެތި ކުރިއެންތަކެއް ހޯދާފައެވެ. މިގޮތުން ޑޮކްޓަރުންނާއި ނަރުހުންގެ އަދަދު ބޮޑުތަނުން އިތުރުކުރެވި، އެމް.އާރު.އައި، މެމޮގްރަފީ، ސީޓީ ސްކޭން އަދި ޑައިގްނޯސްޓިކްގެ ގިނަ ޚިދުމަތްތަކެއް ފެށި، ސިއްހީ ޚިދުމަތް ހޯދުމަށް މާލެ ދާންޖެހޭ ޖެހުން ވަރަށް ބޮޑަށް މަދުކުރެވިފައިވާކަން ފާހަގަކޮށްލެވެއެވެ.