ކޯވިޑް19 ޖެހޭ މީހުންގެ އަދަދު މިދުވަސްވަރު އިތުރުވަމުން އަންނާތީ ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.
ކޯވިޑް ފެތުރޭ މިންވަރު އިތުރުވަމުން އަންނާތީ އެކަމަށް ސަމާލުވުމަށް އިލްތިމާސްކޮށް އެޗްޕީއޭއިން ނެރުނު ނޫސްބަޔާނުގައިވަނީ މިދުވަސްވަރު ރާއްޖޭގެ އެކި ހިސާބުތަކުން ހުމާއި އަރިދަފުސް ރޯގާގެ އިތުރުން ކޯވިޑް ޖެހިގެން ރިޕޯޓްކުރާ އަދަދު އިތުރުވަމުން އަންކަމަށެވެ. އެގޮތުން ސެޕްޓެމްބަރު މަހު ކޯވިޑް ޖެހިގެން 185 މީހަކު ރިޕޯޓްކޮށްފައިވާއިރު މިިދިޔަ މަހު 328 މީހަކުވަނީ ކޯވިޑް ޖެހިގެން ރިޕޯޓްކޮށްފައެވެ. އެހެންކަމުން ކޯވިޑް 19ގެ އާ ވޭރިއަންޓްތައްވެސް ދުނިޔޭގެ އެކި ހިސާބުތަކުގައި އިތުރުވަމުންދާތީ ކޯވިޑް 19 އިން ތިމާއާއި އާޢިލާ އާއި މުޖުތަމަޢު ރައްކާތެރިކުރުމަށް ހުރިހާ އެންމެންވެސް ރައްކާތެރިވުމުގެ ފިޔަވަޅުތައް އަބަދުވެސް އެޅުމަށް އެޗްޕީއޭއިން އިލްތިމާސްކުރެއެވެ.
އަރިދަފުސް ރޯގާއާއި ކޯވިޑް-19 އިން ރައްކާތެރިވުމަށް އެޅުން މުހިންމު ފިޔަވަޅުތައް
* އަރިދަފުސް ރޯގާގެ އެއްވެސް އަލާމާތެއް ހުރިނަމަ ވީހާވެސް އަވަހަށް ޓެސްޓް ކުރުން
* އަރިދަފުސް ރޯގާގެ އަލާމާތެއް ހުރިނަމަ އަނގައާއި ނޭފަތް ނިވާވާނެހެން ރަނގަޅަށް މާސްކް އެޅުން
* އާއްމު ތަންތަނުގައި އުޅޭއިރު ގައިދުރުކަން ބެހެއްޓުން
* ސައިބޯނިލައިގެން ރަނގަޅަށް އަތްދޮވުން ނުވަތަ ސެނިޓައިޒަރ ބޭނުންކޮށްގެން އަތް ސާފުކުރުން
* ރޯގާގެ އެއްވެސް އަލާމާތެއް ހުރިނަމަ މީހުން އެއްވެ އުޅޭ ތަންތަނަށް ނުދިޔުން
* ބަލި ޖެހުމުން، ނުރައްކާވުމުގެ ފުރުޞަތު ބޮޑު މީހުން އިންފުލުއެއްންޒާ ވެކްސިން ޖެހުން
* ކޯވިޑް ވެކްސިން ޖަހާ އުމުރުގެ ފަރާތްތަކުން ވެކްސިން ފުރިހަމަ ކުރުން އަދި ބޫސްޓަރ ޑޯޒް ފުރިހަމަކުރުން
* ބަލި ޖެހުމުން ނުރައްކާވާ މީހުން ވީހާވެސް ދުރުގައި އުޅުމާއި ގޭގައިވެސް މާސްކް އަޅައިގެން އުޅުން
* ބަލިވެގެން ޑޮކްޓަރަށް ދައްކާއިރު ބަލިމީހާއާއިއެކު ވީހާވެސް މަދުމީހުން ދިއުން، އަދި ބަލިމީހުންނަށް ޒިޔާރަތްކުރުމަށް ކުޑަކުދިންނާއި އުމުރުން ދުވަސްވީ މީހުންނާއި މާބަނޑުމީހުން ނުދިއުން އަދި ކޮންމެހެން ހޮސްޕިޓަލަށް ދާންޖެހޭ ހާލަތެއްގައި މެނުވީ ހޮސްޕިޓަލަކަށް ނުދިއުން.
ރާއްޖޭގައި ކޯވިޑް-19ގެ ކޭސްތައް ދަށަށްދާން ފެށުމާއި ގުޅިގެން ހެލްތު ޕްރޮޓެކްޝަން އޭޖެންސީ އެޗްޕީއޭއިން ކޭސްތަކުގެ ތަފާސްހިސާބު ޢާއްމުކުރަނީ ހަފްތާއަކު އެއްފަހަރުއެވެ. އެޗްޕީއޭއިން ޢާއްމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގައި ކޯވިޑް ޖެހޭ މީހުންގެ ޢަދަދު އަންނަނީ ކޮންމެ ހަފްތާއަކުވެސް އިތުރުވަމުންނެވެ.
ބަލިފެތުރޭ ނިސްބަތް އިތުރުވެފައިވަނީ މާލެ ސަރަޙައްދުގައެވެ. މާލެ ސަރަޙައްދުގައި އޮކްޓޫބަރު މަހުގެ ފުރަތަމަ ހަފްތާގައި ޕޮޒިޓިވްވެފައިވަނީ 19 މީހެކެވެ. މިމަހުގެ ފުރަތަމަ ހަފްތާގައި މާލެ ސަރަޙައްދުންވަނީ 43 މީހަކު ޕޮޒިޓިވްވެފައެވެ. އަދި ރިސޯޓުތަކާއި ސިނާޢީ މަސައްކަތް ކުރާ ރަށްރަށާއި ސަފާރީތަކުން ޕޮޒިޓިވްވީ މީހުންގެ ޢަދަދު ވަނީ 45 އަށް އިތުރުވެފައެވެ. މިއާއެކު ރާއްޖޭގައި ބަލިޖެހުނު މީހުންގެ ޖުމްލަ ޢަދަދުވަނީ 185454 އަށް އަރާފައެވެ.