މިއަހަރުގެ ވޯލްޑް ލީޑިންގް ޑެސްޓިނޭޝަން އެވޯޑު 18 ޤައުމަކާއި ވާދަކޮށް، ޖެހިޖެހިގެން ތިން ވަނަ އަހަރު ރާއްޖެއިން ހާސިލްކޮށްފައިވާއިރު، މިއީ ފަތުރުވެރިކަމުން ރާއްޖެއަށް ލިބުނު އެންމެ ބޮޑު އެއް ފަޚުރެވެ.
މިއަހަރުގެ ވޯލްޑް ޓްރެވަލް އެވޯޑްސްގެ ގާލާ ހަފްލާ ބާއްވާފައިވަނީ، އޮމާންގެ ރިޓްޒް ކާލްޓަންގެ ހޮޓެލެއްކަމުގައިވާ އަލް ބުސްތާން ޕެލަސްގައެވެ. ތަފާތު އެކި ކެޓަގަރީތައް ހިމެނޭ ވޯލްޑް ޓެރެވަލް އެވޯޑްސްގެ އެންމެ ޝަރަފްވެރި އެވޯޑަކީ ދުނިޔޭގެ ލީޑިންގ ޑެސްޓިނޭޝަން ނުވަތަ އެންމެ މަޤްބޫލު މަންޒިލްގެ އެވޯޑެވެ.
ރާއްޖެއަށް ޖެހިޖެހިގެން ތިންވަނަ ފަހަރަށް ދުނިޔޭގެ ލީޑިންގް ޑެސްޓިނޭޝަން އެވޯޑު ލިބިފައިވާއިރު، މި އެވޯޑާއި ރާއްޖޭގެ ފަރާތުން ހަވާލުވެވަޑައިގަތީ، ޓޫރިޒަމް މިނިސްޓަރ ޑރ.ޢަބްދުﷲ މައުސޫމާއި، އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ ޠައްޔިބު މުޙައްމަދެވެ.
މިއަހަރުގެ ލީޑިންގް ޑެސްޓިނޭޝަން އެވޯޑަށް 18 ގައުމެއް ނޮމިނޭޓުވެފައިވެއެވެ. އޭގެތެރޭގައި ދުބާއި، ޕޯޗުގަލް، އިންޑޮނޭޝިއާ އަދި ގްރީސްފަދަ ނަން މަޝްހޫރު ޤައުމުތައް ހިމެނެއެވެ.
ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބައިނަލްއަޤްވާމީ ފެންވަރުގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑު ރާއްޖެއަށް ލިބުމާއި ގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ މި އެވޯޑަކީ ފަތުރުވެރިކަމުގެ މަންޒިލެއްގެ ގޮތުގައި ރާއްޖޭގެ މަގުބޫލުކަމުގެ ހެއްކެއް ކަމަށެވެ. އަދި ވޭތުވެދިޔަ 3 އަހަރުތެރޭގައި ފަތުރުވެރިކަމުގެ ސިނާއަތުން ހާސިލްކުރި އެވޯޑުތަކުން ދައްކުވައިދެނީ ދާއިރާއިން ގުޅިގެން އެކުގައި ގޮންޖެހުންތަކުން އަރައިގަނެ ކޮންމެ ކަމެއްވެސް ހާސިލްކުރެވިދާނެކަން ކަމަށް މިނިސްޓަރ ވިދާޅުވިއެވެ.
ލީޑިންގް ޑެސްޓިނޭޝަން އެވޯޑު ރާއްޖެއަށް ލިބުމާއި ގުޅިގެން، އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ ތޮއްޔިބު މުހައްމަދު ވިދާޅުވީ، ރާއްޖެއިން މި ހާސިލްކުރި އެވޯޑަކީ ކޯވިޑުގެ ދުވަސްވަރު ރާއްޖޭގެ ރައްޔިތުންވީ ގުރުބާނީއާއި ކުރި މަސައްކަތް ކަމަށެވެ.
"މީ ޓްރެވަލް އިންޑަސްޓްރީގެ ކޮންމެ ބޭފުޅަކުވެސް ވީ ގުރުބާނީ، ތިން ހަތަރު މަސް ވަންދެން އަނބިދަރިން ކައިރިއަށް ނުގޮސް އުޅުނު މުވައްޒަފުންނަށް ލިބޭ އެވޯޑުމީ، މި ހުރިހާ ކަމެއް މި ގުޅެނީ މި އެވޯޑާއި، ޖެހިޖެހިގެން 3 ފަހަރު މި އެވޯޑު ލިބުމަކީ ކުޑަކަމެއް ނޫން،" ޠައްޔިބު ވިދާޅުވިއެވެ.
ދުނިޔޭގެ ލީޑިންގ ޑެސްޓިނޭޝަންގެ އިތުރުން ރާއްޖޭގެ ރިސޯޓުތައްވަނީ ތަފާތު އެކި ކެޓަގަރީތަކުން އެވޯޑުތައް ހާސިލްކޮށްފައެވެ. އަދި ވޯލްޑް ލީޑިންގް ސީޕްލޭން އޮޕަރޭޓަރގެ އެވޯޑު ޓްރާންސް މޯލްޑިވިއަން އެއަރވޭސްއަށް ލިބިފައިވާއިރު، ވޯލްޑް ލީޑިންގް އެއަރޕޯޓު ރިސޯޓުގެ އެވޯޑު ހުޅުލޭ އައިލެންޑު ހޮޓެލުން ވަނީ ހޯދާފައެވެ.
މީގެއިތުރުން ދުނިޔޭގެ ލީޑިންގ ޓުރިސްޓު ބޯޑުގެ އެވޯޑު ފުރަތަމަ ފަހަރަށް، އެމްއެމްޕީއާރުސީންވަނީ ކާމިޔާބުކޮށްފައެވެ.
ފަތުރުވެރިކަމުގެ އެންމެ ޝަރަފްވެރި އެވޯޑު ތިންވަނަ ފަހަރަށް ރާއްޖެއަށް ލިބިގެން މިދިޔައީ، ފަތުރުވެރިކަމުގެ ރަން ޔޫބީލް ރާއްޖެއިން ފާހަގަކުރަމުން ދާ އަހަރުވެސްމެއެވެ. އެހެންކަމުން މިއީވެސް ރާއްޖެއަށް ލިބުނު ބޮޑު ފަޚްރެކެވެ.