މިމަހުގެ 9 ވަނަ ދުވަހުގެ ރޭ މާލޭގައި ހިނގި ނުރައްކާތެރި އަލިފާނުގެ ޙާދިސާގައި ނިޔާވި އެންމެން މިހާރު ދެނެގަނެވިފައިވާކަމަށް ފުލުހުން ވިދާޅުވެއްޖެއެވެ.
ބުދަ ދުވަހުގެރޭ މ. ނިރުފެހިގޭގައި ހިނގި އަލިފާނުގެ ޙާދިސާގައި 10 މީހުން ވަނީ މަރުވެފައެވެ. މި ޙާދިސާގައި ނިޔާވި އެންމެންނަކީވެސް ބިދޭސީންނެވެ. އަދި މީގެ ތެރޭގައި ގިނައީ އިންޑިއާށް ނިސްބަތްވާ މީހުންނެވެ. އެގޮތުން އެންމެފަހުން ދެނެގަނެވުނު ހަށިގަނޑާއެކު، އިންޑިއާއަށް ނިސްބަތްވާ 8 މީހަކު މި ޙާދިސާގައި ވަނީ ނިޔާވެފައެވެ. އެއީ 3 އަންހެނުންނާއި 5 ފިރިހެނުންނެވެ. ދެން ނިޔާވެފައިވަނީ ބަންގްލަދޭޝަށް ނިސްބަތްވާ އަންހެނަކާއި ފިރިހެނެކެވެ.
މީގެ އިތުރުން މި ޙާދިސާގައި ސީރިއަސް ޒަޚަމްތަކެއް ލިބުނު މީހަކަށް އައިޖީއެމްއެޗްގައި މިވަގުތުވެސް އަންނަނީ ފަރުވާ ދެމުންނެވެ. އޭނާއަށް ފަރުވާ ދެމުންދަނީ އައިޖީއެމްއެޗް އައި.ސީ.ޔޫގެ ވެންޓިލޭޓަރުގައެވެ.
މި ޙާދިސާގައި ނިޔާވި މީހުންގެ ހަށިގަނޑުތައް ވަރަށް ބޮޑަށް އަނދާފައިވާތީ އެމީހުން ވަކިކުރަން ނޭނގޭ ވަރަށް ސިފަ ގެއްލިފައިވާ ކަމަށް ފުލުހުން ކުރިން ވިދާޅުވެފައިވެއެވެ. ފުލުހުން ވިދާޅުވީ، އެމީހުން ދެނެގަތުމުގެ މަސައްކަތްކުރީ، އާންމުންނަށް ހުޅުވާލައިގެން ލިބުނު މަޢުލޫމާތާއި ފުލުހުން ހެދި ކްރޮސް މެޗްތަކުން ކަމަށެވެ.
ނިޔާވި ބައެއް މީހުންގެ ހަށިގަނޑު އަނބުރާ ޤައުމަށް ގެންދިއުމަށް އާއިލާތަކުން އެދެމުންދާތީ ކަމާގުޅުންހުރި އިދާރާތަކާއެކު ފުލުހުން އަންނަނީ އެ މަސައްކަތް ކުރަމުންނެވެ. އެގޮތުން ރާއްޖޭގެ ފޮރިން މިނިސްޓްރީއާއި އެ ޤައުމުތަކުގެ އެމްބަސީތަކާއި ގުޅިގެން ފުލުހުން އެ މަސައްކަތް ފަށާފައިވާކަމަށް ފުލުހުން ވިދާޅުވެއެވެ. މި ޙާދިސާގައި ނިޔާވި އެންމެންގެ މަޢުލޫމާތު ފޮރިން މިނިސްޓްރީއަށާއި، އެމީހުން ނިސްބަތްވާ ޤައުމުތަކުގެ އެމްބަސީތަކަށް ފުލުހުން ވަނީ އަންގާފައެވެ.
މި ޙާދިސާގައި އަލިފާން ރޯވި މ. ނިރުފެހިގޭގެ އިމާރާތަށްވެސް ބޮޑެތި ގެއްލުންތަކެއް ލިބިފައިވާއިރު، އެ އިމާރާތް ތަޅާލާ، އެ ތަން ސާފުކުރުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ. ނިރުފެހި ގެއަކީ 2 ފަންގިފިލާއަށް ހަދާފައިވާ ގެއެކެވެ. ގޭގެ އެންމެ ތިރީގައި ހުރީ ގަރާޖެކެވެ. އަދި މައްޗަށް ހުރި ދެ ފަންގިފިލާ ބޭނުންކުރަމުން އައީ، ބިދޭސީން ދިރިއުޅުމަށެވެ. އިމާރާތް ހުރީ ޕަރޓިޝަން ޖަހާ، ކުދި ގޭބިސީތަކަކަށް ހަދާ، ކުއްޔަށް ދީފައެވެ.