އަންނަ ދިރާސީ އަހަރު ފެށުމުގެ ކުރިން ހުރިހާ މުދައްރިސުންނަށް ލައިސަންސް ދޫކޮށް ނިންމާލާނެކަމަށް މިނިސްޓަރ އޮފް އެޑިއުކޭޝަން ޑރ. އައިޝަތު ޢަލީ ވިދާޅުވެއްޖެއެވެ.
2021 ވަނަ އަހަރު ތަންފީޒްކުރަން ފެށި ތަޢުލީމީ ޤާނޫނުގެ ދަށުން މުދައްރިސުންގެ ފެންވަރު ކަށަވަރު ކުރުމަށްޓަކައި "ޓީޗާރސް ރަޖިސްޓްރޭޝަން" ބޯޑެއް ވަނީ އެކުލަވާލާފައެވެ.
ތަޢުލީމުގެ ޤާނޫނުން ޙަވާލުކުރެވިފައިވާ އެންމެ މުހިއްމު ކަމަކީ ތަޢުލީމީ ނިޒާމުގެ ފެންވަރު މަތިކުރުމެވެ. އެކަމަށްޓަކައި އެޅޭ އެންމެ މުހިއްމު އެއް ފިޔަވަޅަކީ މުދައްރިސުންނަށް ކިޔަވައިދިނުމުގެ ލައިސަންސް ދޫކުރުންކަން އެޑިއުކޭޝަން މިނިސްތްރީން ފާހަގަކުރައްވައެވެ. އެކަން ކުރުމަށްޓަކައި ތައްޔާރުކުރަންޖެހޭ ލިޔެކިޔުންތައް މިހާރު ތައްޔާރުކޮށް، ލައިސަންސް ދޫކުރުމަށް ވާންޖެހޭ ތައްޔާރީތައް މިހާރު ވަނީ ފަށާފައެވެ. މިކަމުގެ ނަތީޖާއެއްގެ ގޮތުން، މުދައްރިސްކަމުގެ ތަޢުލީމު ހަރުދަނާވެ، ހުނަރުވެރި އަބުރުވެރި މުދައްރިސުން ކުރިމަގުގައި ލިބި ދަރިވަރުންގެ ފެންވަރު ރަނގަޅުވާނުމަށް މަގުފަހިވާނެކަން އެޑިއުކޭޝަން މިނިސްޓްރީން ވިދާޅުވެއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މިނިސްޓަރ އޮފް އެޑިއުކޭޝަން ޑރ. އައިޝަތު ޢަލީ ވިދާޅުވީ، މުދައްރިސުންނަށް ލައިސަންސް ދޫކުރުމަށްޓަކައި ކުރަމުން އަންނަ މަސައްކަތްތަކުގެ ދަށުން ދިރާސީ އައު އަހަރުގެ ކިޔެވުން ފެށެންވާއިރަށް ހުރިހާ މުދައްރިސުންނަށް ލައިސަންސް ދޫކޮށް ނިންމާލެވޭނެކަމަށެވެ.
ތަޢުލީމީ ޤާނޫނުގެ ސަބަބުން މިދާއިރާއަށް ބޮޑެތި ކުރިއެރުންކަން އަންނާނެކަން ފާހަގަކުރައްވާ މިނިސްޓަރ ވިދާޅުވީ، މި ޤާނޫނުގެ ދަށުން ގްރޭޑް 10 ނިންމުމަށްފަހު 18 އަހަރުވަންދެން ސްކޫލްތެރެއިން ކޮންމެވެސް ހުނަރެއް ދަސްކޮށްދިނުމަށް ހަމަޖެހިފައިވާކަމަށެވެ. އަދި މިކަން 28 ސްކޫލްއެއްގައި ކުރިއަށް ގެންދިޔުމަށްޓަކައި ވޯލްޑް ބޭންކުން ފައިސާގެ އެހީ ހަމަޖެހިފައިވާކަން މިނިސްތަރ ފާހަގަކުރެއްވިއެވެ.
މުދައްރިސުންނަނަކީ ދަރިން ތަރުބިއްޔަތުކުރުމުގައި އެންމެ މުހިއްމު އެއް ރޯލް އަދާކުރައްވާ ބޭފުޅުންނެވެ. ދަރިންނަށް ފެންވަރު ރަނގަޅު ތަޢުލީމެއް ފޯރުކޮށްދެވޭނީވެސް މުދައްރިސުންނަށް ރަނގަޅު ތަޢުލީމާއި ތަމްރީން ލިބިގެންނެވެ.
އެގޮތުން ކޮންމެ މުދައްރިސަކީވެސް ޑިގްރީ ފެންވަރަށް ކިޔަވާފައިވާ މީހަކަށް ހެދުމަށްޓަކައި މިނިސްޓްރީން އަންނަނީ މަސައްކަތްތައް ކުރަމުންނެވެ. މުދައްރިސުންނަށް ލައިސަންސް ދޫކުރުމަކީވެސް މި މަސައްކަތުގެ ދަށުން ފެއްޓެވި މަސައްކަތެކެވެ. ދަރިވަރުންނަށް ކިޔަވައިދިނުމަށްޓަކައި 6000 އަށް ވުރެ ގިނަ ދިވެހި މުދައްރިސުން ހަރަކާތްތެރިވަމުން އަންނައިރު އެމީހުންނަށް ތަމްރީންތައްވެސް އަންނަނީ ފަހިކޮށްދެއްވަމުންނެވެ.