އަލީބާބާއަށް ތިން ވަނަ ކުއާޓަރުގައި ލިބުނު އާމްދަނީ ކުރިން އަންދާޒާކުރި މިންވަރަށްވުރެ ދަށްވެއްޖެއެވެ.
ޗައިނާގެ އީ ކޮމާސް ކުންފުނި އަލިބާބާއިން ލަފާކުރި ވަރަށްވުރެ މަދުން އާމްދަނީ ލިބިފައިވަނީ ކޯވިޑުގެ ބަލިމަޑުކަން އަނެއްކާވެސް ފެތުރެން ފެށުމާއި، އިގްތިޞާދީ ދުވެލި މަޑުވެ، އާންމުން ޚަރަދު ކުރުން މަދުވެފައިވާތީ ކަމަށް އެކުންފުނިން ބުނެއެވެ. ޗައިނާ ސަރުކާރުން ގެންގުޅޭ ހަރުކަށި ޒީރޯ ކޯވިޑު ސިޔާސަތުގެ ސަބަބުން އެ ގައުމު އެތައް ފަހަރަކު ފުރަބަންދުކުރުމުގެ ސަބަބުން އިގްތިޞާދީ ދުވެލި މަޑުޖެހި ރީޓެއިލް ޚަރަދުތައް މިއަހަރު ވަނީ ދަށަށް ގޮސްފައެވެ.
ވާދަވެރި ޕިންޑުއަޑޫ އާއި ބައިޓްޑާންސް އިންވެސް އީ ކޮމާރސްގެ ޚިދުމަތް ފުޅާކޮށް މާކެޓް ހިއްސާ އިތުރުކުރުމުގެ ސަބަބުން ވާދަވެރިކަން އިތުރުވެ އަލީބާބާއަށް ވަނީ ގޮންޖެހުންތަކާއި ކުރިމަތިވެފައެވެ.
މީގެއިތުރުން ޗައިނާގެ ޓެކް ސެކްޓަރ ރެގިއުލޭޓްކޮށް ފިޔަވަޅު އެޅުމުގެ ސަބަބުން ދިމާވެފައިވާ ދަތިތަކުންވެސް އަލީބާބާއަށް މިހާތަނަށް އަރައިގަނެވިފައެއް ނުވެއެވެ.
މާކެޓް ދިރާސާ ކުރާ ކުންފުންޏެއް ކަމަށްވާ، ރިފިނިޓިވް ލަފާކުރީ ތިންވަނަ ކުއާޓަރުގައި އަލީބާބާއަށް ލިބޭނީ 29.15 އެމެރިކާ ޑޮލަރުކަމަށެވެ. ނަމަވެސް ސެޕްޓެމްބަރު 30 ގައި ނިމުނު ތިން ވަނަ ކުއާޓަރުގައި އަލީބާބާ ކުންފުންޏަށް ލިބިފައިވަނީ 28.96 ބިލިއަން އެމެރިކާ ޑޮލަރުގެ އާމްދަނީއެކެވެ.
އަލީބާބާ އަކީ ޗައިނާގެ އެންމެ ބޮޑު އޮންލައިން މާކެޓްޕްލޭސް ޓީމޯލް އަދި ޓާއޯބާއޯ ހިންގާ އަދި ލޮޖިސްޓިކްސް އިން ފެށިގެން ކްލައުޑް ސާވިސްއާ ހަމައަށް ގިނަ ވިޔަފާރިތަކެއް ހިންގާ ކުންފުންޏެވެ.