އިންޑިއާ އާއި އިނގިރޭސިވިލާތާ ދެމެދު ވިޔަފާރީގެ ގުޅުން ބަދަހިކުރުމަށް މަޝްވަރާކޮށްފިއެވެ.
އިންޑޮނޭޝިޔާގެ ބާލީގައި ކުރިއަށްދިޔަ ޖީ20 ބައްދަލުވުމުގައި ދެ ގައުމުގެ ދެމެދުގައި ވިޔަފާރީގެ ގުޅުން ބަދަހިކުރުމާއި ބެހޭގޮތުން މަޝްވަރާކުރައްވާފައިވާފައިވާއިރު، މިއީ މިދިޔަ މަހު އިނގިރޭސިވިލާތުގެ ބޮޑުވަޒީރުގެ މަގާމަށް، އިންޑިއާ ދަރިކޮޅުގެ ރިޝީ ސުނާކް ވަޑައިގެންނެވި ފަހުން އިންޑިއާގެ ބޮޑުވަޒީރު ނަރެންދުރަމޯދީއާއެކު ބޭއްވެވި ފުރަތަމަ ބައްދަލުވުމެވެ.
އިނގިރޭސިވިލާތުން އިންޑިއާއާ އެކު ވިޔަފާރީގެ އެއްބަސްވުމެއް އެކުލަވާލުމަށް މަޝްވަރާކުރަމުން އަންނަ ކަމަށް ސުނާކުގެ އޮފީހުން ވަނީ ބުނެފައެވެ. އަދި އެފަދަ އެއްބަސްވުމަކަށް އާދެވިއްޖެނަމަ، އެއީ އިންޑިއާ އިން ޔޫރަޕްގެ ގައުމަކާއެކު ހަދާ އެފަދަ ފުރަތަމަ އެއްބަސްވުމަށެވެ.
ސުނާކުގެ އޮފީހުން ނެރުނު ބަޔާނެއްގައި ބުނެފައިވަނީ، އިނގިރޭސިވިލާތާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވާލުމަށް ދެ ފަރާތުގެ ޝައުގުވެރިކަންވެސް އެބަހުރި ކަމަށެވެ. މީގެއިތުރުން އެއީ ދެ ގައުމުގެ އިންވެސްޓްމަންޓްތައް ފުޅާކޮށް، ވަޒީފާތައް އިތުރުކުރުމުގެ ފުރުސަތު އޮތް އަދި ސަގާފީ ގުޅުންތައް އިތުރަށް ފުޅާކުރެވޭނެ ފުރުސަތެއް ކަމަށްވެސް އެ ބަޔާނުގައިވެއެވެ.
މި މަޝްވަރާތަކާއި ގުޅިގެން މޯދީ ވިދާޅުވީ އިނގިރޭސިވިލާތާ އެކު އޮންނަ ހަރުދަނާ ގުޅުމަކީ އިންޑިއާއަށް ވަރަށް މުހިންމު ގުޅުމެއް ކަމަށެވެ.
އިނގިރޭސިވިލާތާއިއެކު ބޭއްވި ބައްދަލުވުމުގައި ވިޔަފާރީގެ ގުޅުން އިތުރުކޮށް، ސަލާމަތީ ކަންކަމުގައި އެއްބާރުލުން ދިނުމާއި ރައްޔިތުންނާ ދެމެދު އޮންނަ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭގޮތުން މަޝްވަރާ ކުރެއްވިކަމަށް ބައްދަލުވުމަށް ފަހު މޯދީ ކުރެއްވި ޓުވީޓެއްގައި ވަނީ ވިދާޅުވެފައެވެ.
އިންޑޮނީޝިއާގައި ދެ ދުވަހުގެ މުއްދަތަށް ކުރިއަށް ގެންދިޔަ ޖީ20 ގެ ބައްދަލުވުމަކީ މިދިޔަ ފެބްރުއަރީ މަހު ފެށި ރަޝިއާ ޔުކްރެއިން ހަނގުރާމައަށް ފަހު ޖީ20ގެ ލީޑަރުން ބައްދަލުކުރެއްވި ފުރަތަމަ ބައްދަލުވުމެވެ.
އިންޑޮނޭޝިއާއަށް ފަހު، އަންނަ މަހުން ފެށިގެން ޖީ20 ބައްދަލުވުމުއްގެ ރިޔާސަތު ބަލަހައްޓާނީ އިންޑިއާ އިންނެވެ.
އިނގިރޭސިވިލާތުގެ ބޮޑު ވަޒީރުގެ އިތުރުން މޯދީ ވަނީ އޮސްޓްރޭލިއާގެ ބޮޑު ވަޒީރު އެންތޮނީ އަލްބަނީޒް އާއިވެސް ބައްދަލުކުރައްވާފައެވެ. މި ބައްދަލުވުމުގައި ސަލާމަތީ ކަންކަމާއި، ވިޔަފާރި، ތައުލީމު އަދި ސާފު ހަކަތައާއި ގުޅޭ ގޮތުން ދެގައުމުން ހޯދާފައިވާ ކުރިއެރުންތައް މުރާޖައާކޮށްފައިވާކަމަށް އިންޑިއާގެ ހާރިޖީ ވުޒާރާއިން ނެރުނު ބަޔާނެއްގައިވެއެވެ.