ބެލްޓް އެންޑް ރޯޑްގެ 3 ވަނަ ފޯރަމް އަންނަ އަހަރު ޗައިނާގައި ބާއްވަން އެ ޤައުމުން ޝައުގުވެރިވާ ކަމަށް ޗައިނާގެ ރައީސް ޝީ ޖިންޕިން ވިދާޅުވެއްޖެއެވެ.
ތައިލޭންޑްގެ ވެރިރަށް ބޭންކޮކްގައި މިހާރު ކުރިއަށްދާ އޭޝިއާ ޕެސިފިކް އިކޮނޮމިކް ކޯޕަރޭޝަން ސަމިޓް، އޭޕެކް ސަމިޓްގެ ހަވާސާގައި ވާހަކަދައްކަވަމުން ޝީ ވިދާޅުވި ގޮތުގައި އޭޝިއާ ޕެސިކް ސަރަހައްދުގެ އިތުރުން ބެލްޓް އެންޑް ރޯޑް މުޅި ދުނިޔެއަށް ފަތުރާލުމަކީ އޮތް އުންމީދެކެވެ.
ޝީ ވިދާޅުވީ، ބެލްޓް އެންޑް ރޯޑުން މުޅި ދުނިޔެއަށް ފުރުސަތު ހުޅުވާލަނީ ތަރައްގީއަށް އޮތް ފުރުސަތުގައި އެންމެން ޝާމިލްކޮށް ހިއްސާވުން ފުޅާކުރުމަށް ކަމަށެވެ. ވިޔަފާރީގެ ދާއިރާތަކުގައި އިންވެސްޓްމަންޓްތައް އާންމުކޮށް ހުޅުވާލުމާއި، މިހާރުވެސް ހުރި ފުރުޞަތުތަކަށް މަގުފަހިކޮށްދިނުމަކީވެސް ބޭނުންތެރި ކަމެއް ގޮތުގައި ދެކެވަޑައިގަންނަވާ ކަމަށް ޝީ ވިދާޅުވިއެވެ.
މި މަޝްރޫޢުގެ ދަށުން އިޤްތިޞާދީ ޕްރޮޖެކްޓްތައް ހިންގުމަށް ލޯނު ހޯދައި ދިނުމާއި މާލީ އިދާރާތަކުގެ އެހީތެރިކަން ފޯރުކޮށްދިނުން އަދި ފަންނީ ލަފާދިނުންވެސް ހިމެނެއެވެ.
ޗައިނާއިން އިސްނަގައިގެން ހިންގާ މި މަޝްރޫޢުގައި 60 އަށް ވުރެ ގިނަ ޤައުމުން ބައިވެރިވެއެވެ. މީގެތެރޭގައި އޭޝިއާ އާއި ޔޫރަޕް އަދި އެފްރިކާ ބައްރުގެ ޤައުމުތައްވެސް ހިމެނެއެވެ.
ނަމަވެސް ކޯވިޑުގެ ބަލިމަޑުކަމުގެ ސަބަބުން ޗައިނާގެ ބޯޑަރު ބަންދުކޮށް ބައިނަލްއަޤުވާމީ އިވެންޓްތައް ވަނީ ކެންސަލްކޮށްފައެވެ. ބަލިމަޑުކަމުގެ ސަބަބުން އަޅާފައިވާ ބައެއް ފިޔަވަޅުތައް ޗައިނާއިން އުވާލާންފަށާފައި ވަނީ ދާދިފަހުންނެވެ.