ކުޑަކުދިންނަށް ކުރާ އަނިޔާ ހުއްޓުވުމަށް، ހޭލުންތެރިކަން އިތުރުކުރުމުގެ ބޭނުމުގައި ސްކޫލްތަކަށް ހުޅުވާލި ވީޑިއޯ ހެދުމުގެ މުބާރާތުގެ އެންމެ މޮޅު ތިން ވީޑިއޯ ހޮވަން އާންމުންގެ ވޯޓަށް ހުޅުވާލައިފިއެވެ.
މި މުބާރާތަކީ، ކުޑަކުދިންނަށް ކުރާ އެކިއެކި އަނިޔާތައް ހުއްޓުވުމަށް އާންމުންނާއި ދަރިވަރުންގެ މެދުގައި ހޭލުންތެރިކަން އިތުރުކުރުވުމުގެ މަޤްސަދުގައި ބާއްވާ މުބާރާތެކެވެ. މި މުބާރާތަކީ އެޗްއާރުސީއެމްއާއި އެޑްވަކޭޓިން ފޯރ ދަ ރައިޓްސް އޮފް ޗިލްޑްރެން (އާރކް) އާއި ގުޅިގެން ކުރިއަށް ގެންދާ މުބާރާތެކެވެ.
ގްރޭޑް 7 އިން ފެށިގެން 10 ގެ ދަރިވަރުންނަސް ހުޅުވާލީ މި މުބާރާތުގައި 18 ސްކޫލަކުން 38 ވީޑިއޯ ވަނީ ހުށައަޅާފައެވެ.
މި މުބާރާތަށް ހުށަހެޅި ވީޑިއޯތައް ޖަޖުންގެ ޕެނަލަކުން ބަލައި، އެންމެ މޮޅު ދިހަ ވީޑިއޯ އެޗްއާރްސީއެމްގެ ސޯޝަލް މީޑިއާގައި މިހާރު ވަނީ ޢާންމުކޮށްފައެވެ. އަދި އެންމެ މޮޅު ތިން ވީޑިއޯ ހޮވުމުގައި، އެ ވީޑިއޯތަކަށް ދޭ ލައިކްތަކަށް ސާޅީސް އިންސައްތަ މާކްސް ލިބޭނެ ކަމަށްއެޗްއާރްސީއެމްއިން ވިދާޅުވިއެވެ. އެންމެ މޮޅު ތިން ވީޑިއޯ މިމަހުގެ 28 ވަނަ ދުވަހު އިއުލާން ކުރާނެ ކަމަށް އެޗްއާރުސީއެމުން ވިދާޅުވިއެވެ.
މި މުބާރާތަށް ހުށައެޅި ބައެއް ވީޑިއޯތަކުގެތެރޭގައި، ސްކޫލް މާހައުލުގައި ބުލީކުރުމާއި، ސްކޫލު މާހައުލުގައި ލިބޭ އަނިޔާ ދައްކުވައިދޭ ވީޑިއޯގައި ހިމަނާފައިވެއެވެ. އަދި ގޭތެރެއިންނާއި މުޖުތަމަޢުގެ ތެރެއިން ކުޑަކުދިންނަށް ލިބޭ އަނިޔާތައް ދައްކުވައިދޭ ވީޑިއޯތައްވެސް ވަނީ ތައްޔާރުކޮށްފައެވެ.
މި މުބާރާތުން އެއްވަނައަށް ހޮވޭ ވީޑިއޯއަކަށް 3000 ރުފިޔާ، ދެވަނައަށް 2،000 ރުފިޔާ، ތިންވަނައަށް 1،000 ރުފިޔާއާއި ސެޓްފިކެޓް ދިނުމަށްވެސް ވަނީ ނިންމާފައެވެ.