އަންހެނުންނަށް ކުރާ އަނިޔާގެ ޢަމަލުތައް އެކަށީގެންވާގޮތެއްގައި އަދިވެސް ނުބެލޭ: އެޗްއާރުސީއެމް
އަންހެނުންނާމެދު ހިންގޭ އަނިޔާގެ ޢަމަލުތައް އެކަށީގެންވާގޮތަށް ބަލައި ތަޙުޤީޤު ނުކުރެވޭކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗް.އާރް.ސީ.އެމުން ވިދާޅުވެއްޖެއެވެ.
ރާއްޖޭގެ ޤާނޫނުތަކުން އަންހެނުންނަށް ޙައްޤުތައް ކަށަވަރުކޮށްދީފައި ވީނަމަވެސް، އަންހެނުންނަށް ކުރާ އެކިއެކި އަނިޔާތައް މުޖުތަމަޢުގެ ތެރެއިން އަދިވެސް ފެންނަ މިންވަރު މަދުނުވާތީ، އެކަމުގެ ކަންބޮޑުވުން އެޗް.އާރް.ސީ.އެމުން ވަނީ ފާޅުކޮށްފައެވެ.
ގެވެށިއަނިޔާގެ މައްސަލަތަކަކީ ރާއްޖޭގައިވެސް އިތުރުވަމުން އަންނަ އިޖްތިމާޢީ ބޮޑު މައްސަލައެކެވެ. ދުނިޔޭގެ ގިނަ ޤައުމުތަކެކޭ އެއްފަދައިން ރާއްޖޭގައިވެސް ގެވެށިއަނިޔާގެ ޝިކާރައަކަށް އެންމެގިނައިން ވެގެންދަނީ އަންހެނުންނާއި، އަންހެން ކުދިންނެވެ. ފެމިލީ ޕްރޮޓެކްޝަން އޮތޯރީޓިން ޝާއިއުކޮށްފައިވާ މިއަހަރުގެ ވޭތުވެދިޔަ 9 މަހުގެ ކުއާޓަލީ ރިޕޯޓުތައް ދައްކާގޮތުން އެ އިދާރާއަށް ހުށައަޅަފައިވާ ގެވެށިއަނިޔާގެ މައްސަލަތަކުގެ ތެރެއިން އަންހެނުންނަށް ކުރާ އެކި ބާވަތުގެ އަނިޔާގެ 504 މައްސަލައެއް ވަނީ ހުށައަޅާފައެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން އެޗް.އާރް.ސީ.އެމްގެ ސީނިއަރ އެޑިއުކޭޝަން އޮފިސަރ ޚަދީޖާ ލިމްޔާ ވިދާޅުވީ، ރާއްޖޭގައި އަންހެނުންނަށް ކުރާ އެކި ބާވަތުގެ އަނިޔާގެ ތެރޭގައި ނަފްސާނީ، ޖިސްމާނީ އަދި ޖިންސީގޮތުން ކުރާ އަނިޔާ ހިމެނޭކަމަށެވެ. އަދި ބިރުދެއްކުމާއި، ބަހުގެ ހަމަލާދިނުމާއި، މާލީގޮތުން ނުވަތަ އިޤްތިޞާދީގޮތުން ދަތިކުރުމުގެ މައްސަލަތައްވެސް ފާހަގަކުރެވޭކަމަށް އެޗްއާރުސީއެމް އިން ވިދާޅުވިއެވެ. މީގެ އިތުރުން އާއިލާ ރޫޅުމަށްފަހު ފިރިމީހާގެ ފަރާތުން ދަރިންނަށް ޚަރަދުނުކުރުމުގެ މައްސަލައަކީވެސް ރާއްޖޭގައި ފަހަކަށް އައިސް އިތުރުވަމުންދާ މައްސަލަތަކެއްކަމަށް އެޗްއާރުސީއެމް އިން ފާހަގަކުރެއްވިއެވެ.
ޚަދީޖާ ވިދާޅުވީ، ޤާނޫނު އަސާސީން ރާއްޖޭގައި އަންހެނުންނާއި ފިރިހެނުންނަށް ޤާނޫނީގޮތުން ހަމަހަމަ ފުރުޞަތުތަކެއް ފަހިކޮށްދީފައިވާކަމަށެވެ. އަދި އެކި ދާއިރާތަކުން އަންހެނުންނަށް ކުރިއަށް ދިއުމުގައި ސީދާގޮތުން ތަފާތުކުރުންތަކެއް ނެތްނަމަވެސް، ބައެއް ފަރާތްތަކުގެ ވިސްނުން ހުންނަގޮތުން އެކި ދާއިރާތަކުން ކުރިއަށްދިއުމުގައި އަންހެނުންނަށް އަދިވެސް ގޮންޖެހުންތަކެއް ހުރިކަން ޚަދީޖާ ފާހަގަކުރެއްވިއެވެ.
"މާލީގޮތުން އަންހެނުންގެ ބާރުވެރިކަން ހުރި މިންވަރަށް ބަލާލާއިރު، ވަޒީފާ އަދާކުރާ އަންހެނުންގެ ޖުމްލަ އާމްދަނީއާއި ވަޒީފާ އަދާކުރާ ފިރިހެނުންގެ ޖުމްލަ އާމްދަނީއާއި އަޅާބަލާއިރު އަންހެނުންގެ އާމްދަނީ ކުޑަ. ބައެއް ޙާލަތްތަކުގައި އަންހެނުން އެބަ ޖެހޭ ފެމެލީއަށް އެކަނި ސަޕޯޓްކުރަން ފިރިހެނެއްގެ އެއްވެސް އަޅާލުމެއްނެތި. އެހެންވީމަ އޭގެ މާނައަކީ އެ އާއިލާތަކަކީ އިތުރަށް ފަޤީރުކަން ތަޙައްމަލުކުރާނެ އާއިލާތަކެކޭ" ޚަދީޖާ ވިދާޅުވިއެވެ.
މި ޕްރޮގްރާމްގައި ވާހަކަދައްކަވަމުން އެޗް.އާރް.ސީ.އެމްގެ އެޑިއުކޭޝަން އޮފިސަރ އަޙްމަދު އަމީޒް ވިދާޅުވީ، އަންހެނުންނަށް ނިސްބަތްކޮށް ހިންގާ އަނިޔާގެ ޢަމަލުތައް ހުއްޓުވުމަށް ބާރު އެޅުމަށާއި، ތަފާތުކުރުންތައް ނައްތާލުމަށް ދިވެހިރާއްޖޭގެ ޤާނޫނީ ނިޒާމުގެ ތެރެއިން މުހިއްމު ޤާނޫނުތަކެއް ހެދިފައިވާކަމަށެވެ. އެގޮތުން، ގެވެށިއަނިޔާ ހުއްޓުވުމުގެ ޤާނޫނާއި، ޢާއްމު އިޖްތިމާޢީ މިންގަނޑުތަކާ ޚިލާފު ޢަމަލުތައް ހުއްޓުވުމުގެ ޤާނޫނާއި، ޖިނާއީ އިޖުރާޢަތުގެ ޤާނޫނުގެ އިތުރުން، ޖިންސީ ފުރައްސާކުރުމާއި ގޯނާކުރުން ހުއްޓުވުމުގެ ޤާނޫނާއި، ޖިންސީ ކުށުގެ ޤާނޫނު އަދި އާއިލާއާ ބެހޭ ޤާނޫނުން މުހިއްމު ޙައްޤުތަކެއް ކަށަވަރުކޮށްދޭކަން އަމީޒް ފާހަގަކުރެއްވިއެވެ.
އަމީޒް ވިދާޅުވީ، މިފަދަ ޤާނޫނުތަކުން އަންހެނުންނަށް ޙައްޤުތަކެއް ކަށަވަރުކޮށްދީފައި ވީނަމަވެސް، އަންހެނުންނަށް ކުރާ އަނިޔާގެ އަމަލުތައް ބަލައި އަދިވެސް އެކަށީގެންވާގޮތެއްގައި ތަހްގީގު ނުކުރެވޭކަމަށެވެ. އަދި މިފަދަ ޤާނޫނުތަކާއި ޙައްޤުތަކާމެދު އާއްމުން އަދިވެސް ހޭލުންތެރިކުރުވަންޖެހޭކަން އަމީޒް ފާހަގަކުރެއްވިއެވެ.
"ތަޙްޤީޤުކުރުމާއި ދަޢުވާކުރުމާއި ހުކުމް ޤާއިމުކުރުމުގައި އަދިވެސް ހުރަސްތަކެއް ހުރިކަން ފާހަގަކުރެވޭ. ބަޖެޓް ނުލިބުމާއި، މައްސަލަތައް ތަޙްޤީޤު ކުރުމަށް ކުރަންޖެހޭ ދަތުރުފަތުރުގެ އިންތިޒާމުގެ ދަތިކަމާއި، މި ދާއިރާގައި މަސައްކަތްކުރާ ފަރާތްތަކަށް އެކަށީގެންވާ ތަމްރީނު ލިބިފައިނެތުން ފާހަގަކުރެވޭ. އަދި ހެކިބަސްދޭ ފަރާތްތަކަށް ހިމާޔަތްދޭނެ އެކަށީގެންވާ ނިޒާމެއް ނެތުމާއި، މުއައްސަސާތަކުގެ މެދުގައި ގުޅުމާއި އެއްބާރުލުން ކުޑަކަމާއި، ޤާނޫނު ތަންފީޒުކުރާ ފަރާތްތަކާއި ފަނޑިޔާރުން މި ދާއިރާއިން ހޭލުންތެރިވެފައިވާ މިންވަރު ކުޑަކަންވެސް ފާހަގަކުރެވޭ" އަމީޒް ވިދާޅުވިއެވެ.
ކޮންމެ މުޖުތަމަޢުއެއްވެސް އެކުލެވިގެންވަނީ އަންހެނުންނާއި ފިރިހެނުންގެ މައްޗަށްކަމުން، ވަކި ޖިންސެއްގެ މީހަކަށްވީތީ ތަފާތުތައް ކުރުމަކީ މުޖުތަމަޢުގެ ދުޅަހެޔޮކަން ގެއްލިގެންދާނެކަމެއްކަން އެޗް.އާރް.ސީ.އެމުން ފާހަގަކުރެއްވިއެވެ. އަދި އާއިލީ ގުޅުންތަކުގެ ދުޅަހެޔޮކަން ގެއްލި، އާއިލީ މައްސަލަތައް ގިނަވެ، ތަފާތު އިޖްތިމާޢީ މައްސަލަތައްވެސް ގިނަވެގެންދާނެކަމެއްކަމަށް އެ ކޮމިޝަނުން ވިދާޅުވެއެވެ.
އެހެންކަމުން ދިވެހި މުޖުތަމަޢުގައި ގެވެށިއަނިޔާގެ ޝިކާރައަކަށްވާ ފަރާތްތަކަށް ރައްކާތެރިކަމާއި އެހީތެރިކަން ފޯރުކޮށްދިނުމަށްޓަކާ ދަޢުލަތުގެ އިދާރާތަކާ، މުޅި މުޖުތަމަޢު ގުޅިގެން އެކުގައި މަސައްކަތްކުރުމުގެ މުހިއްމުކަން އެޗް.އާރް.ސީ.އެމުން ވަނީ ފާހަގަކުރައްވާފައެވެ.