މިދިޔަމަހު އެންމެ ގިނައިން ގްރީން ޓެކްސް ލިބުނީ ކ.އަތޮޅާއި ރ.އަތޮޅުން

މިދިޔަމަހު ގްރީން ޓެކްސްގެ ގޮތުގައި އެންމެ ގިނަ ފައިސާ ލިބިފައިވަނީ ކ.އަތޮޅާއި ރ.އަތޮޅުން ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާއްމުކޮށްފައިވާ ތަފާސްހިސާބުތަކުން ދައްކާގޮތުން މިދިޔަމަހު ގްރީން ޓެކްސްގެ ގޮތުގައި ދައުލަތަށް 61.5 މިލިއަން ރުފިޔާ ވަނީ ލިބިފައެވެ. ގްރީން ޓެކްސްގެ ގޮތުގައި ނަގަނީ ރިސޯޓުތަކާއި ސަފާރީއާއި ހޮޓާތަކުގައި ޗުއްޓީ ހޭދަކުރާ ކޮންމެމީހެއްގެ އަތުން 6 ޑޮލަރެވެ. އަދި ގެސްޓް ހައުސްތަކުގައި ޗުއްޓީ ހޭދަކުރާ މީހުންގެ އަތުން 3 ޑޮލަރެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކަށް ބަލާއިރު އޮކްޓޯބަރުމަހު ރިސޯޓް، ގެސްޓްހައުސް އަދި ހޮޓެލްތަކުން ގްރީން ޓެކުހުގެ ގޮތުގައި 60 މިލިއަން ރުފިޔާ ލިބިފައިވެއެވެ. ސަފާރީތަކުން 1.6 މިލިއަން ރުފިޔާ ލިބިފައިވާއިރު، ހޯމްސްޓޭ ފެސިލިޓީތަކުން 1196 ރުފިޔާ ލިބިފައިވެއެވެ.

ގްރީން ޓެކްސްގެގޮތުގައި ދައުލަތަށް އޮކްޓޯބަރުމަހު ލިބުނު ފައިސާގެ ތެރެއިން 21.9 މިލިއަން ރުފިޔާއަކީ ކ. އަތޮޅުން ގްރީން ޓެކްސްގެ ގޮތުގައި ލިބިފައިވާ ފައިސާއެވެ. މީގެތެރޭގައި ހިމެނެނީ ރިސޯޓްތަކުން ލިބިފައިވާ 21.9 މިލިއަނާއި ގެސްޓްހައުސްތަކުން ލިބިފައިވާ 8 ލައްކައަށްވުރެ ގިނަ ރުފިޔާއެވެ.

2 ވަނައަށް އެންމެ ގިނަ އަދަދަކަށް ގްރީން ޓެކްސްގެ ގޮތުގައި ފައިސާ ލިބިފައިވާ ރ. އަތޮޅުން، އޮކްޓޯބަރުމަހު ވަނީ 4.7 މިލިއަން ރުފިޔާ ލިބިފައެވެ. މިއީ މުޅިންވެސް ރިސޯޓްތަކުން ގްރީން ޓެކްސްގެ ގޮތުގައި ލިބިފައިވާ ފައިސާއެވެ.

3 ވަނައަށް އެންމެ ގިނައިން ގްރީން ޓެކްސް ލިބިފައިވަނީ 4.5 މިލިއަން ރުފިޔާއާއެކު އއ. އަތޮޅުންނެވެ. މީގެތެރޭގައި ހިމެނެނީ ރިސޯޓުތަކާއި ގެސްޓުހައުސްތަކުން ލިބުނު ރުފިޔާއެވެ.

އޮކްޓޯބަރުމަހު އެންމެ މަދުން ގްރީން ޓެކްސް ލިބުނު އަތޮޅުތަކަކީ ފުވައްމުލައް ސިޓީއާއި ތ. އަދި ލ. އަތޮޅެވެ. ތަފާސްހިސާބުތައް ދައްކާގޮތުން މިދިޔަމަހު ފުވައްމުލައް ސިޓީން ގްރީން ޓެކްސްގެ ގޮތުގައި އެއްވެސް އަދަދަކަށް ފައިސާ ލިބިފައެއް ނުވެއެވެ. ތ. އަތޮޅުން 86221 ރުފިޔާ ލިބިފައިވާއިރު، ލ. އަތޮޅުންވަނީ 99587 ރުފިޔާ ލިބިފައެވެ.

ފިނޭންސް މިނިސްޓްރީގެ ހިސާބުތައް ދައްކާގޮތުން އޮކްޓޯބަރުމަސް ނިމުނުއިރު ގްރީން ފަންޑުގައި ހުރީ ޖުމްލަ 801 މިލިއަން ރުފިޔާއެވެ.