ކުރިއަރ މެދުވެރިކޮށް ރާއްޖެ އެތެރެކުރަން އުޅުނު 2 މިލިއަން ރުފިޔާގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގަނެފިއެވެ.
ކަސްޓަމްސްއިން ވިދާޅުވީ، މިތަކެތި އަތުލައިގަނެފައިވަނީ ކުރިއަރ މެދުވެރިކޮށް ނެދަރލޭންޑްސްއިން ރާއްޖެ ގެނެސްފައިވާ ޕާރުސަލެއް ބަލާފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތެއް ހުރުމުން، އިތުރަށް ބަލާ ފާސްކުރުމުގެ ތެރޭގައިކަމަށެވެ. އެގޮތުން މިދިޔަ ނޮވެމްބަރުމަހުގެ 20 ވަނަ ދުވަހު ބަލާ ފާސްކުރެވުނު މި ޕާރްސަލުގެ ތެރެއިން މަސްތުވާތަކެތިކަމަށް ޝައްކުކުރެވޭ ދެ ބާވަތެއް ފެނިފައިވާކަމަށް ކަސްޓަމްސްއިން ވިދާޅުވެއެވެ.
އެގޮތުން ފުރަތަމަ މަރުޙަލާގައި ކަސްޓަމްސްއިން މިތަކެތި ތަޙުލީލުކުރިއިރު، މަސްތުވާތަކެތީގެ ބާވަތެއްކަމަށްވާ މެފެޑްރޯން 304 ގްރާމު އަދި ހެރޮއިން 1034 ގްރާމަށް ވަނީ ޕޮޒިޓިވްވެފައެވެ.
މި މައްސަލައިގައި އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި 1.34 ކިލޯ ހުރިކަމަށް ކަސްޓަމްސްއިން ވިދާޅުވެއެވެ. އަދި މި ތަކެތީގެ މަގުމަތީ އަގު 2،049،000 (ދެ މިލިއަން ސާޅިސް ނުވަ ހާސް) ރުފިޔާއަށް އަރާކަމަށްވެސް ކަސްޓަމްސްއިން ވިދާޅުވެއެވެ. މިތަކެތި ކަސްޓަމްސްއިން ވަނީ މޯލްޑިވްސް ޕޮލިސް ސަރވިސްއާއި ޙަވާލުކޮށްފައެވެ.