ދުނިޔެއަށް އިޤްތިސާދު ދަށަށް ދިޔަނަމަވެސް، ރާއްޖޭގެ އިޤްތިސާދު ކުރިއަރަމުންދަނީ ރަނގަޅު ދުވެއްޔެއްގައިކަމަށް އެމްއެމްއޭއިން ހާމަކޮށްފިއެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ނެރެފައިވާއިރު، ކުއާޓަރލީ އިކޮނޮމިކް ބުލެޓިން ރިޕޯޓުގައި ބުނެފައިވަނީ ރާއްޖޭގެ އިޤްތިސާދު މިއަހަރު ނިމޭއިރު، 12.3 އިންސައްތައަށް ކުރިއަރާނެއެވެ. މިއާއެކު ކޯވިޑުގެ ކުރީގެ ލެވަލްއަށް އިޤްތިސާދު އިއާދަވާނެކަމަށް ވަނީ ލަފާކޮށްފައެވެ.
ރާއްޖޭގެ އިޤްތިސާދު ކުރިއަރަމުން ދިޔުމުގެ މައިގަނޑު ސަބަބެއްކަމަށް އެމްއެމްއޭއިން ބުނެފައިވަނީ ފަތުރުވެރިކަމަށް ލިބެމުންދާ ކުރިއެރުންތަކެވެެ. އެގޮތުން ރާއްޖޭގެ ބެޑު ނައިޓްސް 33 އިންސައްތައަށް މިއަހަރުގެ ފުރަތަމަ ތިން ކުއާޓަރުގެ ތެރޭގައިވަނީ އިތުރުވެފައެވެ. އަދި އަންނަ އަހަރުތެރޭ ފަތުރުވެރިކަމުގެ ދާއިރާ އިތުރަށް ކުރިއަރާނެ ކަމަށްވެސް އެމްއެމްއޭއިން ލަފާކުރެއެވެ.
ރިޕޯޓުގައިވާގޮތުން މިއަހަރުގެ 2 ވަަނަ ކުއާޓަރގައި ރާއްޖޭގެ އިންފްލޭޝަން ރޭޓު ހުރީ 2.9 އިންސައްތައިގައެވެ. އަދި 3 ވަނަ ކުއާޓަރގައި މި އަދަދު ހުރީ 2.7 އިންސައްތައިގައެވެ. ދުނިޔޭގެ ބާޒާރުގައި ތަކެތީގެ އަގުތައް އުފުލެމުން ދިޔުމާއި އެކުވެސް އަހަރުގެ ބާކީ އޮތް ދުވަސްތަކުގައިވެސް އިންފްލޭޝަން ރޭޓު ހުންނާނީ އެވްރެޖްކޮށް 2.2 އިންސައްތައިގައިކަމަށް އެމްއެމްއޭއިން ލަފާކުރެއެވެ.
މީގެއިތުރުން ސަރުކާރުން ޖީއެސްޓީ އަދި ޓީޖީއެސްޓީ ބޮޑުކުރަން ނިންމާފައިވުމާއި، ސަބްސިޑީ ދިނުމުގެ އުސޫލަށް ގެންނަ ބަދަލާއި، އަދި ދުނިޔޭގެ ބާޒާރުގައި ތަކެތީގެ އަގުތައް އަންނަ އަހަރުތެރޭ އިތުރަށް އުފުލިގެން ދާނެ ކަމަށް ލަފާކުރެވޭތީ އަންނަ އަހަރު ރާއްޖޭގެ އިންފްލޭޝަން 5.4 އިންސައްތަ އަށް އަރާނެ ކަމަށް އެމްއެމްއޭއިން ހާމަކުރެއެވެ.
ރާއްޖޭގެ އިޤްތިސާދު ކުރިއަރަމުންދަނީ ރަނގަޅު ދުވެއްޔެއްގައިކަމަށް އެމްއެމްއޭއިން ހާމަކޮށްފައިވާއިރު، ރާއްޖޭގެ އިޤުތިސާދު ކުރިއަރަމުން ދަނީ ދުނިޔޭގެ އިޤުތިސާދީ ދުވެއްޔަށްވުރެވެސް އެތައް ގުނައެއް ބާރަށްކަމަށް ފިނޭންސް މިނިސްޓަރު އިބްރާހީމް އަމީރުވެސް ވަނީ ހާމަކުރައްވާފައެވެ.
އަންނަ އަހަރަށް ދަޢުލަތުން ލަފާކުރާ ބަޖެޓް ރައްޔިތުންގެ މަޖިލީހަށް ހުށައަޅުއްވަމުން މިނިސްޓަރ ވިދާޅުވެފައިވަނީ އަންނަ އަހަރު ރާއްޖޭގެ އިޤްތިޞާދު ކޯވިޑް-19ގެ ކުރިން ހުރި މިންވަރަށް ދާނެކަމަށެވެ.
2020 ވަނަ އަހަރު މުޅި ދުނިޔެއަށް ކުރިމަތިވި ކޯވިޑްގެ ބަލިމަޑުކަމުގެ ސަބަބުން އޭރުގެ ސިޔާސަތަކަށް ވީ އެންމެ އަވަހަކަށް ކޯވިޑްގެ ވަޅުގަނޑުން މުޅިން އަރައިގަތުންކަމަށެވެ. ކޯވިޑް-19 އިން އަރައިގަތުމަށް ކުރެވުނު މަސައްކަތުން ރާއްޖޭގެ ޞިއްޙީ ދާއިރާގެ ޤާބިލުކަން އިތުރުކުރެވި، ޓެސްޓްކޮށް، ވެކްސިންގައި ދުނިޔޭގެ ކާމިޔާބު ޤައުމަކަށް ހެދިފައިވާކަމަށް މިނިސްޓަރ ވިދާޅުވެފައިވެއެވެ.
2021 ވަނަ އަހަރު ނިމުނުއިރު، ރާއްޖޭގެ އިގްތިޞާދު ވަނީ 41.7 އިންސައްތައިން ކުރިއަރައިފައެވެ. މީގެ ސަބަބަކީ ރާއްޖޭގެ އިޤްތިޞާދީ ހަރަކާތްތައް އޭރު އަންދާޒާކުރި މިންވަރަށްވުރެވެސް އިތުރުވުންކަމަށާއި، އިޤްތިޞާދުގެ ރިކަވަރީ މި އަހަރުވެސް ބާރަށް ކުރިއަށްދާނެކަމަށް މިނިސްޓަރ އަމީރު ވިދާޅުވިއެވެ. މި އަހަރު ރާއްޖޭގެ އިޤްތިޞާދު 12.3 އިންސައްތައިން ކުރިއަރާނެކަމަށާއި އަދި 2023 ވަނަ އަހަރު ރާއްޖޭގެ އިޤްތިޞާދު 7.6 އިންސައްތައިން ކުރިއަރާނެކަމަށް ލަފާކުރެވޭކަމަށްވެސް މިނިސްޓަރ ވިދާޅުވެފައިވެއެވެ.