ދިވެހިރާއްޖޭގެ އުފެންދުމެއްކަން އަންގައިދޭ ނިޝާން "ޖެނުއިން މޯލްޑިވިއަން ޕްރޮޑަކްޓް ލޯގޯ" ޑިޒައިން ކުރުމަށް ޝަޢުގުވެރިވާ ފަރާތްތަކަށް އެ ފުރުޞަތު މިނިސްޓްރީ އޮފް އިކޮނޮމިކް ޑިވެލޮޕްމަންޓުން ހުޅުވާލައިފިއެވެ.
ދިވެހިރާއްޖޭގެ އުފެންދުންތައް ކުރިއަރުވާ، ޕްރޮމޯޓްކޮށް އަދި ރާއްޖޭގެ އުފެންދުންތަކަށް ހަމަ އަގު ލިބޭނެގޮތް ފަހިކުރުމުގެ ބޭނުމުގައި، ރާއްޖޭގެ އުފެންދުމެއްކަން އަންގައިދޭ ނިޝާން، "ޖެނުއިން މޯލްޑިވިއަން ޕްރޮޑަކްޓް ލޯގޯ" ރާއްޖޭގެ އުފެންދުންތަކުގައި ޖަހާދެވޭނެ އުޞޫލެއް ނުވަތަ ސެޓިފިކޭޝަން ސްކީމެއް ތަޢާރަފްކުރުމަށް އިކޮނޮމިކް މިނިސްޓްރީން އަންނަނީ ތައްޔާރުވަމުންނެވެ.
އެގޮތުން މި ސްކީމުގައި ބޭނުންކުރާނެ ލޯގޯ، "ޖެނުއިން މޯލްޑިވިއަން ޕްރޮޑަކްޓް ލޯގޯ" ފަރުމާކުރުމުގެ މުބާރާތެއް ބޭއްވުމަށް މިނިސްޓްރީން ވަނީ ނިންމާފައެވެ. މި މުބާރާތުން އެއްވަނައަށް -/25,000 (ފަންސަވީސް ހާސް ރުފިޔާ) އިނާމެއްގެ ގޮތުގައި ދޭގޮތަށް ވަނީ ހަމަޖެހިފައެވެ. އަދި އެއްވަނައަށް ދާފަރާތެއްގެ ލޯގޯ، "ޖެނުއިން މޯލްޑިވިއަން ޕްރޮޑަކްޓް" ސެޓިފިކޭޝަން ސްކީމްގެ ލޯގޯގެ ގޮތުގައި ބޭނުންކުރެވޭނެކަމަށް އިކޮނޮމިކް މިނިސްޓްރީން ވިދާޅުވެއެވެ.
މި މުބާރާތުގައި ބައިވެރިވުމުގެ ފުރުޞަތު ރާއްޖޭގައި ރަޖިސްޓްރީކޮށްފައިވާ ވިޔަފާރި، ޑިޒައިނަރ، ސްޓޫޑިއޯތަކަށް ވަނީ ހުޅުވާލާފައެވެ. އަދި 18 އަހަރުން ދަށުގެ ކުދިންނަށްވެސް ބެލެނިވެރިޔާގެ ހުއްދައާއެކު ބައިވެރިވެވޭނެއެވެ. މި މުބާރާތުގެ ސުންގަޑި އަކީ 15 ޑިސެންބަރު 2022 އެވެ.
މި މުބާރާތައް ހުށަހަޅާ ޑިޒައިނަކީ ފަހުގެ ޒަމާނީ، ތަފާތު، އުފެއްދުންތެރި، ދިވެހި އުފެއްދުންތައް އިޝްތިހާރުކުރުމުގެ މަޤްޞަދު ދައްކުވައިދީ، ރާއްޖެއާއި ދިވެހިންގެ ޚާއްސަކަމާއި ތަފާތުކަން ރަމްޒުކޮށްދޭ އެއްޗަކަށް ވާންވާނެކަމަށް އިކޮނޮމިކް މިނިސްޓްރީން ވިދާޅުވެއެވެ. އަދި ލޯގޯގައި "ޖެނުއިން މޯލްޑިވިއަން ޕްރޮޑަކްޓް" ނުވަތަ ކްރިއޭޓިވް ބްރޭންޑް ނަމެއްގެގޮތުގައި ބޭނުންކުރެވިދާނެ ލަފުޒެއް ހިމަނަންވާނެކަމަށާއި، ލޯގޯގައި މައި ލަފުޒުގެ ފޮންޓަށްވުރެ ކުޑަ ފޮންޓް ސައިޒެއްގައި "މިނިސްޓްރީ އޮފް އިކޮނޮމިކް ޑިވެލޮޕްމަންޓް" ހިމަނަންވާނެކަމަށް އެ މިނިސްޓްރީން ވިދާޅުވެއެވެ.
މި މުބާރާތުގެ ޤަވާއިދާއި، ގައިޑްލައިންސް، މުބާރާތުގައި ބައިވެރިވުމަށް އެފޭ ފޯމު، އަދި އިތުރު މަޢުލޫމާތު އިކޮނޮމިކް މިނިސްޓްރީގެ ވެބްސައިޓް www.trade.gov.mv އިން ލިބިވަޑައިގަންނަވާނެކަމަށް އެ މިނިސްޓްރީން ވިދާޅުވެއެވެ.