ވޯލްޑް ބޭންކުގެ އިސްބޭފުޅުން ހިމެނިވަޑައިގަންނަވާ ވަފްދެއް ރާއްޖެއަށް ވަޑައިގެންފިއެވެ.
ވޯލްޑް ބޭންކުން ރާއްޖެއަށް ވަޑައިގެންނެވި ވަފްދުގައި އެންމެ އިސް ބޭފުޅެއްގެގޮތުގައި ބައިވެރިވެވަޑައިގަންނަވަނީ އެ ބޭންކުން ދިވެހިރާއްޖެ ހިމެނޭ ދެކުނު އޭޝިއާގެ ޤައުމުތަކަށް ކަނޑައަޅާފައިވާ ނައިބު ރައީސް މާޓިން ރައިޒަރއެވެ. ވޯލްޑް ބޭންކުގެ މި ވަފްދަށް ވެލާނާ އިންޓަރނޭޝަނަލް އެއަރޕޯޓުން ފިނޭންސް މިނިސްޓްރީގެ އިސްބޭފުޅުން ވަނީ މަރުޚަބާ ކިޔާފައެވެ.
މިއީ ރާއްޖެއަށް ކުރައްވާ ފުރަތަމަ ދަތުރުފުޅުކަން ފާހަގަކުރައްވާ ވޯލްޑް ބޭންކުގެ ނައިބު ރައީސް މާޓިން ކުރެއްވި ޓުވީޓުގައި ފުރަތަމަ ފަހަރަށް ރާއްޖެއަށް އާދެވުމުން އުފާވާކަމަށް ވިދާޅުވިއެވެ. އަދި މި ދަތުރުފުޅުގެ ތެރެއިން ކްލައިންޓުންނާއި ޕާޓްނަރުންނާއެކު، އާ ފުރުޞަތުތައް ހޯދުމަށާއި، ބައިނަލްއަޤްވާމީ ގޮންޖެހުންތަކާ ކުރިމަތިލުމަށްޓަކައި ތަރައްޤީއަށް އިސްކަންދޭ ކަންކަމާ ބެހޭގޮތުން އިތުރު މަޢުލޫމާތު ތަކެއް ދަސްކުރުމަކީ އުއްމީދެއްކަމަށްވެސް މާޓިން ވިދާޅުވިއެވެ.
މާޓީންގެ ޓުވީޓަށް ރައްދުދެއްވަމުން ފިނޭންސް މިނިސްޓަރ އިބްރާހީމް އަމީރު ވަނީ ދުނިޔޭގެ އެންމެ ހިތްގައިމު މަންޒިލުގެ ޝަރަފު ޖެހިޖެހިގެން 3 އަހަރު ހޯދާފައިވާ ރާއްޖެއަށް ވަޑައިގެންނެވީތީ އެމަނިކުފާނަށް މަރުޚަބާ ކިޔާފައެވެ. އަދި އެމަނިކުފާނުގެ މި ދަތުރުފުޅުގެ ތެރެއިން ވަރަށް ބިނާކުރަނިވި މަޝްވަރާތަކެއް ކުރެވިގެންދާނެކަމަށް އުއްމީދުކުރައްވާކަމަށްވެސް މިނިސްޓަރ އަމީރު ވިދާޅުވިއެވެ.
Wa Alaykumu’salaam VP @martinraiser. Welcome to our beautiful country — world’s leading destination for 3 consecutive years! Look forward to having a very constructive dialogue ?? https://t.co/k4Vy7sm8fA
— Ibrahim Ameer (@iameeru) December 7, 2022
ވޯލްޑް ބޭންކުގެ ނައިބު ރައީސް މާޓިންނާއި، އެމަނިކުފާނުގެ އަރިހުގައި ރާއްޖެވަޑައިގެންނެވި ވަފްދުގެ މި ދަތުރުފުޅަކީ 4 ދުވަހުގެ ދަތުރުފުޅެއްކަމަށް ފިނޭންސް މިނިސްޓްރީން ވިދާޅުވެއެވެ.
ރާއްޖޭގެ އިޤްތިޞާދީ އިޖްތިމާއީ އަދި ޢުމްރާނީ ތަރައްޤީގައި އެންމެ ބޮޑު ދައުރެއް އަދާކުރާ ބައިނަލްއަޤްވާމީ މާލީ އެހީދޭ އެއް އިދާރާއަކީ ވޯލްޑް ބޭންކެވެ. ވޯލްޑް ބޭންކުން އަންނަނީ އެކި ދާއިރާތަކުން މާލީ އެހީ ފޯރުކޮށްދިނުމުގެ އިތުރުން، އިންސާނީ ވަޞީލަތް ތަރައްޤީކޮށް، އިޤްތިޞާދު ހަރުދަނާކުރުމަށް ބޭނުންވާ ފަންނީ ލަފައާއި އިރުޝާދުވެސް ދެމުންނެވެ.