ކެންސަލްކުރާ ދަތުރުތަކަށް ޗާޖް ކުރާނެކަމަށް ބުނެ ކަސްޓަމަރުންނަށް އިންޒާރުދިން މައްސަލައާއި ބައެއް ދަތުރުތަކުގެ އަގު ބޮޑުކުރުމުގެ މައްސަލައިގައި އޮސްޓްރޭލިއާގެ ކޯޓަކުން ދަތުރުފަތުރާއި ކާބޯތަކެތީގެ ހިދުމަތް ފޯރުކޮށްދޭ އޫބަރ ޓެކްނޮލޮޖީސް 14 މިލިއަން އެމެރިކާ ޑޮލަރުން ޖޫރިމަނާކޮށްފިއެވެ.
ފެޑަރަލް ކޯޓުގެ ހުކުމްގައި ވާގޮތުގައި އެމެރިކާގެ އޫބަރ ކުންފުނިން ވަނީ އޮސްޓްރޭލިއާގެ ކޮންސިއުމަރ ގާނޫނާއި ހިލާފުވެފައެވެ. އެގޮތުން ކުންފުނީގެ ދަތުރުތައް ކެންސަލް ކޮށްފިނަމަ ކަސްޓަމަރުންގެ އަތުން އިތުރު ފީއެއް ނަގާނެކަމަށް ބުނެ 2017 އިން 2021 ނިޔަލަށް ބައެއް ކަސްޓަމަރުންނަށް ވަނީ އިންޒާރުދީފައެވެ. އަދި 2020 ވަނަ އަހަރުގެ އޮގަސްޓްމަހާއި ހަމައަށް ފޯރުކޮށްދިން ޓެކްސީ ހިދުމަތުގެ އަގު އަންދާޒާ ކުރުމަށް ސައްހަ ނޫން ސޮފްޓްވެއާ އެލްގޮރިދަމެއް އޫބަރއިން ބޭނުންކޮށްފައިވާކަމަށްވެސް ކޯޓުގެ ހުކުމްގައިވެއެވެ.
އޫބަރއިން އެ ކުންފުނީގެ ވެބްސައިޓުގައި ކުރި ޕޯސްޓެއްގައި ވަނީ އެމީހުންނަށް ހެދިފައިވާ ގޯސްތަކަށް އޮސްޓްރޭލިއާގެ ރައްޔިތުންގެ ކިބައިން މައާފަށް އެދިފައެވެ. އަދި މިހާރު އުފެދިފައިވާ ކަންބޮޑުވުންތަކަށް ބަލައި އޫބަރ ޕްލެޓްފޯމަށް ބަދަލުތަކެއްވެސް ވަނީ ގެނެސްފައެވެ.
އޫބަރ އާއި ދެކޮޅަށް މައްސަލަ ހުށަހެޅި އޮސްޓްރޭލިއަން ކޮމްޕެޓިޝަން އެންޑް ކޮންސިއުމަރ ކޮމިޝަން، އޭސީސީސީ އާއި އޫބަރއިން މީގެކުރިން 26 މިލިއަން އޮސްޓްރޭލިއަން ޑޮލަރުން ޖޫރިމަނާކުރުމަށް އެއްބަސްވި ނަމަވެސް މައްސަލަ ބައްލަވާ ޖަޖް މިޝައިލް ހިޔޫ އޮބްރަޔަން ކޯޓުގައި ވިދާޅުވީ ދެ ފަރާތުން ފޯރުކޮށްދިން ހެކިތަކަކީވެސް އެކަށީގެން ނުވާ ހެކިތަކެއް ކަމަށެވެ.
ފޯރުކޮށްދިން ހެކިތަކުން ދައްކާ ގޮތުގައި ކެންސަލް ފީއާއި މެދު ކަންބޮޑުވެފައިވަނީ އޫބަރގެ ކަސްޓަމަރުންގެ ތެރެއިން %0.5 ކަސްޓަމަރުންނެވެ. އޫބަރ ޓެކްސީ އެލްގޮރިދަމްއިން %89 ވަގުތު ދަތުރު ފީ ލަފާކުރި މިންވަރަށް ވުރެ މައްޗަށް ދިޔަ ނަމަވެސް އެ ހިދުމަތް ބޭނުންކޮށްފައި ވަނީ ޖުމްލަ އޫބަރ ދަތުރުތަކުގެ %1 އަށްވުރެ މަދު ފަހަރުކަމަށް ޖަޖް ވިދާޅުވިއެވެ.