އާމްދަނީ ދަށް ޤައުމުތަކަށް 2022-2026 ވަނަ އަހަރުގެ ތެރޭގައި ގާތްގަނޑަކަށް 500 ބިލިއަން އެމެރިކާ ޑޮލަރުގެ ބޭރުގެ ފައިނޭންސިންގ ބޭނުންވާނެ ކަމަށް އިންޓަނޭޝަނަލް މަނިޓަރީ ފަންޑް، އައި.އެމް.އެފް އިން ބުނެފިއެވެ.
އައި.އެމް.އެފް އިން ބުނިގޮތުގައި އާމްދަނީ ދަށް ޤައުމުތަކުގެ މާލީ ހާލަތު އިތުރަށް ގޯސްވަމުން އަންނަނީ ކޯވިޑުގެ ބަލިމަޑުކަމުންނާއި ރަޝިއާ ޔުކްރެއިން ހަނގުރާމައިގެ ސަބަބުން ކުރާ އަސަރުތައް ހައްލުކުރުމަށާއި، ކާބޯތަކެއްޗާއި ތެލުގެ އަގު އުފުލުމުގެ ސަބަބުން އެކަމުގެ އަސަރުކުރާ މީހުންނަށް އެހީވުމަށް ކުރާ ޚަރަދުތައް އިތުރުވުމުންނެވެ. ނަތީޖާއެއްގެ ގޮތުން ޤައުމުތަކުގެ ދަރަނި އިތުރުވަނީއެވެ.
އައި.އެމް.އެފް އިން އިތުރަށް ބުނިގޮތުގައި 2022 ވަނަ އަހަރު މި ޤައުމުތަކުގެ އިޤްތިޞާދީ ދުވެލި މަޑުޖެހިފައިވާއިރު، އިންފްލޭޝަން މަތިވުމުގެ ސަބަބުން މާލީ ދަރަނިތައް ވަނީ އިތުރުވެފައެވެ.
ފާއިތުވި ދުވަސްތަކުގައި އެންމެ ބޮޑު ކްރެޑިޓަރުގެ ގޮތުގައި އެމެރިކާ ފަހަތަށް ޖައްސާލައި ޗައިނާ ކުރި ހޯދާފައިވާއިރު، ތަރައްޤީވަމުން އަންނަ ޤައުމުތަކަށް ދަރަނި ލުއި ކޮށްދިނުމަށް ޗައިނާއިން ދެކޮޅު ހަދަމުންދާތީ ހުޅަނގުގެ ޤައުމުތަކުން އަންނަނީ ޗައިނާ އަށް ފާޑުކިޔަމުންނެވެ.
އައި.އެމް.އެފް އިން ބުނިގޮތުގައި ކޯވިޑުގެ ބަލިމަޑުކަމުގެ ސަބަބުން ލިބުނު ގެއްލުންތައް ހައްލުކުރުމާއި، ހުއްޓިފައިވާ އާމްދަނީ އިތުރުވުން އަވަސްކުރުމަށް، އާމްދަނީ ދަށް ޤައުމުތަކަށް 2022-2026 އަށް ބޭރުގެ ފައިސާ ބޭނުންވާ މިންވަރު އަހަރަކު ލަފާކުރެވޭ މިންވަރު ގާތްގަނޑަކަށް 440 ބިލިއަން އެމެރިކާ ޑޮލަރަށް އަރާނެއެވެ.
މަދުން އާމްދަނީ ލިބޭ ޤައުމުތަކަށް ބޭރުގެ ފައިނޭންސިންގ ބޭނުންވާނެ ކަމަށް އައި.އެމް.އެފް އިން ބުނެފައި މިވަނީ ބޭރުގެ ދަރަނިތައް އަދާކުރުމަށް ފަޤީރު ޤައުމުތަކުން ބޮޑު ހޭދައެއް ކުރަމުން އަންނަކަމަށް ވޯލްޑް ބޭންކުން ހާމަކޮށްފައިވަނިކޮށެވެ.
ދަރަނި އަދާކުރުމަށް ފަޤީރު ޤައުމުތަކުގެ އެކްސްޕޯޓުން ލިބޭ އާމްދަނީގެ ދިހަ ބައިކުޅަ އެއްބައި ހޭދަކުރާއިރު، މިއީ 2000 ވަނަ އަހަރުގެ ފަހުން ދަރަނި އަދާކުރުމަށް މިހާ ބޮޑު ހޭދައެއް ޤައުމުތަކުން ކުރާ ފުރަތަމަ ފަހަރު ވޯލްޑް ބޭންކުން ބުނެއެވެ.