އެމެރިކާއިން އިނގިރޭސިވިލާތަށް ގޭސް އެކްސްޕޯޓްކުރާ މިންވަރު އިތުރުކުރަން ނިންމައިފި
ރަޝިއާ ޔުކްރެއިން ހަނގުރާމައިގެ ސަބަބުން ހަކަތައިގެ ރައްކާތެރިކަން އިތުރުކޮށް އަގުތައް ދަށްކުރުމުގެ ގޮތުން އެމެރިކާއިން އިނގިރޭސިވިލާތަށް ގޭސް އެކްސްޕޯޓްކުރާ މިންވަރު ދެގުނައަށް އިތުރުކުރަން, އެމެރިކާގެ ރައީސް ޖޯބައިޑަންއާއި އިނގިރޭސިވިލާތުގެ ބޮޑުވަޒީރު ރިޝީ ސުނާކް އެއްބަސްވެވަޑައިގެންފިއެވެ.
މި އެއްބަސްވުމުގެ ދަށުން އެމެރިކާއިން ކުރިއަށް އޮތް އަހަރު ތެރޭގައި މަދުވެގެން 9 ބިލިއަން އާއި 10 ބިލިއަން ކިއުބިކް މީޓަރުގެ ލިކުއިފައިޑް ނެޗުރަލް ގޭސް ނުވަތަ އެލްއެންޖީ އިނގިރޭސިވިލާތުގެ ޓަރމިނަލް މެދުވެރިކޮށް އެކްސްޕޯޓް ކުރާނެއެވެ. މިއީ 2021 ވަނަ އަހަރު އެމެރިކާއިން އިނގިރޭސިވިލާތަށް ގޭސް އެކްސްޕޯޓުކުރި މިންވަރަށްވުރެ ދެ ގުނަ އިތުރު މިންވަރެކެވެ.
އެއްބަސްވުމަށްފަހު ވާހަކަފުޅު ދައްކަވަމުން އިނގިރޭސިވިލާތުގެ ބޮޑުވަޒީރު ސުނާކް ވިދާޅުވީ، މިއީ ދުނިޔޭގެ ތެލުގެ އަގު ކޮންޓްރޯލްކުރުމަށް އެމެރިކާއާއާއި އިނގިރޭސިވިލާތް ގުޅިގެން މަސައްކަތްކުރުމަށް ވެވުނު އެއްބަސްވުމެއްކަމަށެވެ. އަދި ރަޝިޔާފަދަ ފޭލްވަމުންދާ "ރެޖީމް"އެއްގެ ކުއްލި އަމަލުތަކުގެ ސަބަބުން، ތެލުގެ ސަޕްލައިއަށް ބުރޫއެރިޔަނުދިނުމަށް ދެ ޤައުމުން މަސައްކަތްކުރާނެކަމަށްވެސް ވިދާޅުވިއެވެ.
މިއަހަރުގެ ފެބްރުއަރީ މަހު ފެށި ރަޝިއާ ޔުކްރެއިން ހަނގުރާމައަށްފަހު އެމެރިކާއިން އިނގިރޭސިވިލާތަށް ގޭސް އެކްސްޕޯޓުކުރާ މިންވަރު ވަނީ ވަރަށް ބޮޑަށް އިތުރުކޮށްފައެވެ.
ޖީ7 ސަމިޓްގެ ތެރެއިން ބައިޑަންއާއި ސުނާކް ބައްދަލުވެވަޑައިގެންނެވިތާ މާ ގިނަ ދުވަހެއް ނުވެ، ވެވުނު "އެނަރޖީ ޕާރޓްނަރޝިޕް" ގެ އެއްބަސްވުމުގެ ދަށުން ދެ ޤައުމުގެ އޮފިޝަލުން ހިމެނޭހެން ޚާއްސަ ޖޮއިންޓް އެކްޝަން ގްރޫޕެއް ހެދުމަށްވެސް ދެ ޤައުމުން ވަނީ އެއްބަސްވެފައެވެ.
މި އެއްބަސްވުމުގައި އެކްސްޕޯޓަރުންނާއި އިމްޕޯޓަރުންނަށް ދިމާވާ މައްސަލަތައް ދެނެގަނެ ހައްލުކުރުމަށް "ޕްރޯއެކްޓިވްކޮށް" މަސައްކަތް ކުރުމުގެ އިތުރުން، ރަޝިޔާގެ ހަކަތައަށް ދުނިޔޭގެ ބަރޯސާވުން ކުޑަކުރުމަށް މަސައްކަތް ކުރާނެ ކަމަށްވެސް ދެ ޤައުމުން ވަނީ ވައުދުވެފައެވެ. މީގެ އިތުރުން، ތިމާވެއްޓާ ރައްޓެހި ހަކަތަ ހޯދޭނެ އިތުރު ގޮތްތަކާ ބެހޭގޮތުންވެސް ދެ ޤައުމު ގުޅިގެން މަސައްކަތްކުރުމަށް ހަމަޖެހިފައިވެއެވެ.
އެމެރިކާއާއި އިނގިރޭސިވިލާތުން މިގޮތަށް އެއްބަސްވެފައި މިވަނީ ތެލުގެ އަގު ކޮންޓްރޯލުކުރުމުގެ ގޮތުން ޖީ7 ޤައުމުތަކާއި، ޔޫރަޕް އިއްތިހާދު އަދި އޮސްޓްރޭލިއާ ހިމެނޭހެން ރަޝިއާގެ ތެލަށް އަގެއް ކަނޑައަޅައި ކޮންޓްރޯލު ކޮށްފައިވަނިކޮށެވެ. އެއީ ތެޔޮ ފީފާއަކަށް 60 އެމެރިކާ ޑޮލަރެވެ.