ސްރީލަންކަން އެއަރލައިންސްއިން އައްޑޫސިޓީއަށް ކުރާ ދަތުރުތައް އިތުރުކުރުމަށް ނިންމައިފިއެވެ. ސްރީލަންކަން އެއަރލައިނުން އައްޑޫއަށް މިހާރު ކުރަމުންދަނީ ހަފްތާއަކު 1 ދަތުރެވެ.
އެހެން ނަމަވެސް ފަތުރުވެރިކަމުގެ ޕީކް ސީސަނާއިވެސް ދިމާވާގޮތަށް އެއަރލައިނުން ވަނީ އަންނަ އަހަރުގެ މާރޗުމަހުގެ ނިޔަލަށް ހަފްތާއަކު 2 ދަތުރު ސްރީލަންކާގެ ކޮލޮމްބޯއިން އައްޑޫއަށް ކުރުމަށް ނިންމާފައެވެ. މިއީ ސީދާ ދަތުރުތަކެކެވެ.
ސްރީލަންކަން އެއަރލައިންސްގެ ރާއްޖޭގެ އެޖެންޓް އޭސް އޭވިއޭޝަންގެ މެނޭޖިންގ ޑިރެކްޓަރ މުޙައްމަދު ފިރާޤް ވިދާޅުވީ، އައްޑޫއަށް ކުރާ ދަތުރުތައް އިތުރުކުރުމަށް ނިންމާފައިވާއިރު، ކޮންމެ ހަފްތާއެއްގެ ހޮނިހިރު އަދި އަނގާރަ ދުވަހު ސްރީލަންކަން އެއަރލައިންސްގެ ދަތުރުތައް އައްޑޫއަށް އޮންނާނެ ކަމަށެވެ.
ސްރީލަންކަންއިން އައްޑޫއަށް ކުރާ ދަތުރުތައް އިތުރުކޮށްފައިވާއިރު، ފްލައި ދުބާއީއިންވެސް ދަނީ އައްޑޫއަށް ދަތުރުތައް ފެށުމަށް ތައްޔާރުވަމުންނެވެ. މި ދަތުރުތައް ފެށުމަށް ހަމަޖެހިފައިވަނީ އަންނަ ފެބްރުއަރީމަހުގެ 4 ވަނަ ދުވަހުއެވެ.
ފްލައި ދުބާއީން އައްޑޫއަށް ދަތުރުތައް ފެށުމާއެކު، ދުވާލަކު އެއްފަހަރު ދުބާއީން ރާއްޖެއަށް ދަތުރުކުރާނެއެވެ. މި ދަތުރުތައް ކުރާނީ ދުބާއީ އިންޓަނޭޝަނަލް އެއަރޕޯޓުން، ގަން އިންޓަނޭޝަނަލް އެއަރޕޯޓަށެވެ.