ޣާޒީ ސްކޫލާގުޅޭގޮތުން ހުށަހެޅުނު މައްސަލަތައް ތަޙުޤީޤުކޮށް، އަޅަންޖެހޭ ފިޔަވަޅުތައް އަޅަމުންދާ ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ. އެ މިނިސްޓްރީން މިހެން ވިދާޅުވެފައިވަނީ، ޣާޒީ ސްކޫލުގައި ކޮރަޕްޝަންގެ ޢަމަލުތަކެއް ހިންގާފައިވާ ކަމަށް ތުޙުމަތުކޮށް ސްކޫލުގެ ބައެއް މުވައްޒަފުން އިޙުތިޖާޖު ކުރުމާގުޅިގެންނެވެ.
އެޑިއުކޭޝަން މިނިސްޓްރީން ވިދާޅުވީ، ޣާޒީ ސްކޫލުގެ އެކި ކަންކަމާގުޅޭގޮތުން މިނިސްޓްރީއަށް ހުށަހެޅުނު ޝަކުވާތަކުގެ ތެރެއިން ސްކޫލުގެ މުދަލާ ފައިސާ ބެލެހެއްޓުމާ ގުޅުންހުރި މައްސަލަތައް ފާހަގަކުރެވި، އެކަންކަން އިތުރަށް ބެލުމަށް މިނިސްޓްރީގެ އިންޓަރނަލް އޮޑިޓް ސެކްޝަނުން އޮޑިޓެއް ހަދާފައިވާ ކަމަށެވެ. އަދި މި އޮޑިޓްގެ ތެރޭގައި ސްކޫލުގެ މުދަލާއި ފައިސާ ޚަރަދުކުރުމުގައި މާލިއްޔަތު ޤަވާއިދާ ޚިލާފަށް ބައެއް ކަންކަން ހިނގާފައިވާކަން ފާހަގަކުރެވި، އެ މައްސަލަތައް ބެލުމަށް އިދާރީ ތަޙުޤީޤެއް ހިންގާފައިވާކަމަށެވެ.
މި އިދާރީ ތަޙުޤީޤު ކުރިއަށްދިޔަ މަރުހަލާގައި ބަލަމުންދިޔަ ކަންކަމުގެ އިތުރުން، އިތުރު ކަންކަމުގެ މަޢުލޫމާތު ލިބި ބަޔާންތައް ނެގުމުގެ މަރުޙަލާ ދިގުލައިގެންދިޔަކަމަށެވެ. އެހެންނަމަވެސް މައްސަލައިގެ އިދާރީ ތަޙުޤީޤު ނިމި، މައްސަލައިގެ ރިޕޯޓް އެކުލަވާލާ، ރިޕޯޓުން ފާހަގަކުރެވުނު ކަންކަމަށް ރިޢާޔަތްކޮށް އިހުމާލުވާ މުވައްޒަފުންނަށް އިސްލާޙީ ފިޔަވަޅު އެޅުމުގެ މަސައްކަތް ފަށާފައިވާކަމަށް މިނިސްޓްރީން ވިދާޅުވިއެވެ.
މި މައްސަލަތަކުގެ ރިޕޯޓް ނިމުނުފަހުން ސްކޫލް މެދުވެރިކޮށް ސްކޫލުގެ 2 މުވައްޒަފަކާ ގުޅޭ ޑޮކިއުމެންޓް ފޯޖްކުރި މައްސަލައަކާއި، ސްކޫލުގެ މުވައްޒަފެއް ސްކޫލަށް ލިބިފައިވާ ޓީވީއެއް ގެއަށް ގެންދިޔަ މައްސަލައެއް މިނިސްޓްރީއަށް ހުށަހެޅި މި 2 މައްސަލަވެސް ބަލަމުންދާކަމަށް މިނިސްޓްރީން ވިދާޅުވެއެވެ. އަދި މި 2 މައްސަލައަކީވެސް އޭގައި ޖިނާއީ ކުށްތަކެއް ހިމެނޭ މައްސަލަތަކަށްވާތީ، އެ މައްސަލަތައް އިތުރަށް ތަޙުޤީޤުކޮށްދިނުމަށް އެދި މޯލްޑިވްސް ޕޮލިސް ސަރވިސްއަށް ހުށަހަޅާފައިވާކަމަށްވެސް އެ މިނިސްޓްރީން ވިދާޅުވެއެވެ.
ޣާޒީ ސްކޫލުގެ އެޑްމިނިސްޓްރޭޓަރ، އެޑިއުކޭޝަން މިނިސްޓްރީގެ ޑިޕާޓްމަންޓަކަށް މިމަހުގެ 6 އިން ފެށިގެން ވަގުތީ ގޮތުން ބަދަލުކުރެވުނީ، ދިވެހި ސިވިލް ސަރވިސްގެ ޤަވާއިދަށް ރިޢާޔަތްކޮށް އެފަރާތާގުޅޭގޮތުން ފާހަގަކުރެވޭ ކަންކަމުގައި މުވައްޒަފު ޖަވާބުދާރީ ކުރުވުމުގެ މަރުޙަލާ ކުރިއަށްދާއިރު ސްކޫލުގެ އެޑްމިނިސްޓްރޭޓަރުގެ މަޤާމުގައި އެފަރާތް ހުރުމަކީ ސްކޫލަށް އިތުރު މައްސަލަތަކެއް ކުރިމަތިވެދާނެ ކަމެއްކަމަށް ފާހަގަކުރެވޭތީކަމަށް އެޑިއުކޭޝަން މިނިސްޓްރީން ވިދާޅުވެއެވެ. އަދި މި ބަދަލު މިގޮތަށް ގެނެވުނީ ސްކޫލް ހިންގުމާ ޙަވާލުވެ ހުންނެވި ޑެޕިއުޓީ ޕްރިންސިޕަލަށް އެކަމުގެ މަޢުލޫމާތު ހިއްސާކޮށް މަޝްވަރާކުރުމަށްފަހުކަމަށް މިނިސްޓްރީން ވިދާޅުވެއެވެ. އަދި އެ މުވައްޒަފު މިނިސްޓްރީގެ ޑިޕާޓްމަންޓަކަށް ވަގުތީ ގޮތުން ބަދަލުކުރެވުނީ ދެވުނު ޕްރޮމޯޝަނެއްގެ ގޮތަކުން ނޫންކަމަށާއި، އެ ފަރާތުގެ ވަޒީފާ މިނިސްޓްރީއަށް ބަދަލުކުރި ކުރުމެއްގެގޮތުގައި ނޫންކަމަށްވެސް އެޑިއުކޭޝަން މިނިސްޓްރީން ވިދާޅުވެއެވެ.
އެޑިއުކޭޝަން މިނިސްޓްރީން ވިދާޅުވީ، މި މައްސަލަތަކާގުޅިގެން ސްކޫލުގެ އެޑްމިނިސްޓްރޭޓަރ ހިމެނޭގޮތަށް އިސްލާޙީ ފިޔަވަޅު އަޅަންޖެހޭ ފަރާތްތަކަށް އިސްލާޙީ ފިޔަވަޅު އެޅުމުގެކުރިން ސިވިލް ސަރވިސް ޤަވާއިދުގައި ބަޔާންކުރާ ޖަވާބުދާރީވުމުގެ ފުރުޞަތު އެފަރާތްތަކަށް ދެވޭނެ ކަމަށެވެ. އަދި ޖަވާބުދާރީއާއެކު މުވައްޒަފުންނަށް އިސްލާޙީ ފިޔަވަޅު އެޅުމުގެ ކަންކަން ސިވިލް ސަރވިސްގެ މަޝްވަރާގެ މަތިން ކުރިއަށްގެންދެވޭނެކަމަށެވެ.
މިގޮތަށް މިނިސްޓްރީން ޢަމަލުކުރަމުން ދަނިކޮށް އަދި މިނިސްޓްރީން އަޅަމުންދާ ފިޔަވަޅުތައް ސްކޫލް ހިންގެވުމާ ހަވާލުވެ ހުރި ފަރާތާ ޙިއްސާކުރަމުން ދަނިކޮށް، އެޑްމިނިސްޓްރޭޓަރަށް ޕްރޮމޯޝަނެއް ދީފައިވާކަމަށް ބުނެ ސްކޫލުގެ މުވައްޒަފުންތަކެއް އިޙްތިޖާޖުކުރި މައްސަލަވެސް ބަލަމުންދާކަމަށް މިނިސްޓްރީން ވިދާޅުވެއެވެ. އަދި ކަމުގެ ހަޤީޤަތް އޮޅުވާލާ ސްކޫލާއި މިނިސްޓްރީ ބަދުނާމުވާގޮތަށް ދޮގު މަޢުލޫމާތު މީޑިއާތަކާއި އެހެނިހެން މަންސަތަކުގައި ނުފެތުރުމަށް މިނިސްޓްރީން ވަނީ އިލްތިމާސްކުރައްވާފައެވެ.
އެޑިއުކޭޝަން މިނިސްޓްރީން ވަނީ މިނިސްޓްރީއަށް ހުށަހެޅިފައިވާ މައްސަލަތައް ބަލާ ނިމުމަށްފަހު ސިވިލް ސަރވިސްގެ ޤަވާއިދާ އެއްގޮތަށް އެކަންކަމުގައި ޝާމިލުވާ ފަރާތްތަކަށް އިސްލާޙީ ފިޔަވަޅު އަޅާނެކަމަށްވެސް ވިދާޅުވެފައެވެ.