ދިވެހިރާއްޖޭގެ ވަޤްފާއިބެހޭ ޤާނޫނުގެ ބިލު ޑްރާފްޓް ކުރުމުގެ މަސައްކަތަށް ކޮންސަލްޓެންސީ ޚިދުމަތްދޭނެ ފަރާތެއް ހޯދަން އިސްލާމިކް މިނިސްޓްރީން އިޢުލާންކޮށްފިއެވެ.
އިސްލާމިކް މިނިސްޓްރީން މި ފުރުޞަތު ހުޅުވާލާފައިވަނީ ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ވިޔަފާރި ރަޖިސްޓްރީ ކޮށްފައިވާ ކުދި އަދި މެދު ފަންތީގެ ވިޔަފާރިތަކަށާއި އެ ޤާނޫނުގެދަށުން ރަޖިސްޓްރީކުރަންނުޖެހޭ އަމިއްލަ ފަރުދުންނަށެވެ. މިކަމަށް އެދި ހުށައަޅާ މީހުންނަކީ ދިވެހިރާއްޖޭގެ ވަޤްފާބެހޭ ޤާނޫނުގެ ބިލު ޑްރާފްޓްކުރުމުގެ މަސައްކަތަށް ދީނީ ދާއިރާއިން އަދި އިސްލާމިކް ފައިނޭންސް ދާއިރާއިން ތަޢުލީމާއި ތަޖުރިބާ ލިބިފައިވާ ފަރާތަކަށް ވާންޖެހޭނެކަމަށް އިސްލާމިކް މިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން ވަނީ މިކަމަށް ޝައުގުވެރިވާ މީހުން އަންދާސީ ހިސާބު ހުށަހެޅުމަށް ރަޖިސްޓަރ ކުރައްވާ، މަޢުލޫމާތު ސާފުކުރެއްވުމަށްފަހު އަންދާސީ ހިސާބު ހުށައަޅުއްވަން އެދިފައެވެ. އަދި ބީލަމުގައި ބައިވެރިވާ މީހުން މިމަހުގެ 18 ގެ ކުރިން އީމެއިލް މެދުވެރިކޮށް މިނިސްޓްރީއަށް ހުށައަޅުމަށްވެސް އިސްލާމިކް މިނިސްޓްރީން ވަނީ އެދިފައެވެ.
ވަޤުފްގެ ކަންކަން ހަރުދަނާ ކުރުމަށްޓަކައި އެކަމާ ބެހޭ ޤާނޫނެއް ހެދުމުގެ މަސައްކަތް އިސްލާމިކް މިނިސްޓްރީން އަންނަނީ ކުރަމުންނެވެ. މި ޤާނޫނުގައި މާތްﷲ އަށްޓަކައި ވަޤުފް ކުރާ ބިމާއި، އެޕާޓްމަންޓްތައް ވަޤުފުގެ ގޮތުގައި ދޭނަމަ ކަންކުރާނެ ގޮތްތައް އެކުލަވާލާފައިވާނެކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު އަލީ ވިދާޅުވިއެވެ.
ރާއްޖޭގައި މިވަގުތު ވަޤުފް އިމާރާތެއްގެ ގޮތުގައި ހުރީ 2017 ވަނަ އަހަރު ހުޅުވި "ދާރުލް އީމާން"އެވެ. އެހެންނަމަވެސް ޒިކުރާ މިސްކިތް ހުރި ބިމުގައިވެސް ވަޤުފް އިމާރާތެއް އެޅުމަށްޓަކައި ބަޔަކާ ހަވާލުކުރިއެވެ. ނަމަވެސް އެ އެއްބަސްވުމުގައި ކޮރަޕްޝަންގެ މައްސަލަތަކެއް ހުރުމުން އެއްބަސްވުން ބާތިލްކޮށް އެތަނުގައި ވަނީ ވަގުތީ މިސްކިތެއް ބިނާކޮށްފައެވެ. އިސްލާމިކް މިނިސްޓަރ ވިދާޅުވީ ވަޤުފްގެ ކަންކަން ހަރުދަނާ ކުރުމުގެ ގޮތުން ޤާނޫނު އެކުލަވާލުމުގެ މަސައްކަތުގެ ދަށުން އިތުރު އިމާރާތްތައް އެޅުމުގެ މަސައްކަތްވެސް ކުރަމުން އަންނަކަމަށެވެ. މިގޮތުން ހުޅުމާލެ 2 ވަނަ ފިޔަވަހީގައި ވަޤުފް އިމާރާތެއް އެޅުމަށްޓަކައި ކުރެހުމުގެ މަސައްކަތް ކުރަމުން އަންނަކަން މިނިސްޓަރ ފާހަގަކުރެއްވިއެވެ. 20 އަކަފޫޓުގެ ބިމުގައިި އެޅުމަށް ހަމަޖެހިފައިވަނީ 10 ފަންގިފިލާގެ އިމާރާތެކެވެ.
ވަޤުފް އިމާރާތް ކުއްޔަށްދީގެން ލިބޭ ފައިސާ ޚަރަދު ކުރުމަށް ހަމަޖެހިފައިވަނީ މިސްކިތް ބިނާކުރުމާއި، މިސްކިތްތައް މާރާމާތުކުރުމާއި، އަބާތުރަ ފިލުވުމުގެ ކަންކަމަށެވެ.