ޖަމްޢިއްޔާތަކުގެ ޤާނޫނުގެ ދަށުން، އިންއެކްޓިވް ޖަމްޢިއްޔާތައް ނުވަތަ ހަރަކާތްތެރި ނޫން ޖަމްޢިއްޔާތަކުން، ލިޔެކިޔުން ފުރިހަމަކުރުމަށްޓަކާ އިތުރު ފުރުޞަތެއް ދިނުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ނިންމައިފިއެވެ.
ޔޫތު މިނިސްޓްރީން ވިދާޅުވީ، ހަރަކާތްތެރި ނޫން ޖަމްޢިއްޔާތައް އުވާލުމުގެ ކުރިން އިތުރު ފުރުޞަތެއް ދޭން ނިންމީ، ސަރުކާރުން މަދަނީ ޖަމްޢިއްޔާތައް ބާރުވެރިކޮށް، އެހީތެރިކަން ފޯރުކޮށްދިނުމުގެ މަޤްޞަދުގައިކަމަށެވެ. އެގޮތުން ހަރަކާތްތެރި ނޫން ޖަމްޢިއްޔާތަކަށް އަންނަ އަހަރުގެ މެއި 9 ގެ ނިޔަލަށް އިތުރު ފުރުޞަތެއް ދިނުމަށް މިނިސްޓްރީން ވަނީ ނިންމާފައެވެ.
އިންއެކްޓިވް ޖަމްޢިއްޔާތަކުގެ ތެރެއިން، ލިޔެކިޔުން ފުރިހަމަކުރަން ބޭނުންވާ ޖަމްޢިއްޔާތަކުން ލިޔުންތައް [email protected] އަށް މެއިލްކުރުމަށް މިނިސްޓްރީން ވަނީ ފުރުޞަތު ހުޅުވާލާފައެވެ.
އިންއެކްޓިވް ޖަމްޢިއްޔާތަކަށް އިތުރު ފުރުޞަތެއް ދިނުން pic.twitter.com/Wkl8cztOdq
— Ministry of Youth,Sports and Community Empowerment (@MoYSCEmv) December 15, 2022
ޕީ.އެސް.އެމް ނިއުސްއަށް މަޢުލޫމާތުދެއްވަމުން ޖަމްޢިއްޔާތަކުގެ ރަޖިސްޓްރާރ ޢަލީ ޝަކީލް ވިދާޅުވީ، ރާއްޖޭގައި މަދަނީ ޖަމްޢިއްޔާތަކުގެ ގޮތުގައި މިހާރުވެސް 2500 އެއްހާ ޖަމްޢިއްޔާ ރަޖިސްޓްރީކޮށްފައިވާކަމަށެވެ. ނަމަވެސް އޭގެ ތެރެއިން ހަރަކާތްތެރިކޮށް މަސައްކަތްކުރަނީ އެންމެ 1100 އެއްހާ ޖަމްޢިއްޔާކަން ރަޖިސްޓްރާ ފާހަގަކުރެއްވިއެވެ.
އެހެންކަމުން އަހަރީ ރިޕޯޓާއި އެނޫންވެސް ހުށަހަޅަންޖެހޭ ލިޔެކިޔުންތައް ޤަވާއިދުން ހުށަނާޅާ ޖަމްޢިއްޔާތައް މިނިސްޓްރީން ކަނޑައަޅާފައިވާ މުއްދަތުގެ ތެރޭގައި ހުށަހެޅުމަށް ރަޖިސްޓްރާ ވަނީ ބާރުއަޅުއްވާފައެވެ. އަދި އެއަށްފަހު ޤާނޫނުގައި ބަޔާންކޮށްފައިވާގޮތަށް އެފަދަ ޖަމްޢިއްޔާތައް އުވާލުމުގެ މަސައްކަތް ކުރަމުންދާނެކަމަށް ރަޖިސްޓްރާ ވިދާޅުވިއެވެ.
ހަރަކާތްތެރިނޫން ޖަމްޢިއްޔާތައް އުވާލުމަށް އެންގުމުގެ ބާރު ރަޖިސްޓްރާއަށް
މިއަހަރުގެ މެއިމަހު ޢަމަލުކުރަން ފެށި ޖަމްޢިއްޔާތަކުގެ ޤާނޫނުގެ ދިހަވަނަ ބާބުގައި ޖަމްޢިއްޔާތައް އުވާލެވޭނެ ޙާލަތްތަކާއި، އުވާލުމުގައި ޢަމަލުކުރާނެ އުޞޫލުތައް ބަޔާންކޮށްފައިވެއެވެ.
އެގޮތުން ޖަމްޢިއްޔާތަކުން ހުށަހަޅަންޖެހޭ ލިޔެކިޔުންތައް ޤާނޫނުގައި ބަޔާންކޮށްފައިވާ މުއްދަތުގައި ޖަމްޢިއްޔާގެ ރަޖިސްޓްރާއަށް ވިދިވިދިގެން ދެ ފަހަރު ނުވަތަ ޖުމްލަ 3 ފަހަރު ހުށަހަޅާފައިނުވާނަމަ، އެތަކެތި ގިނަވެގެން 90 ދުވަހުގެ ތެރޭގައި ހުށަހެޅުމަށް އެންގުމުގެ ބާރު ރަޖިސްޓްރާއަށް ލިބިގެންވެއެވެ.
ޖަމްޢިއްޔާއެއްގެ އަސާސީ ޤަވާއިދާއި ހިންގާ ޤަވާއިދުގައި ބަޔާންކޮށްފައިވާ ކަންކަން ޤާނޫނާއި، ޤަވާއިދާ ޚިލާފުވެގެން ނުވަތަ އެ ޖަމްޢިއްޔާއިން ރަޖިސްޓްރީވުމަށްފަހު އެއް އަހަރު ދުވަހުގެ ތެރޭގައި އެ ޖަމްޢިއްޔާއެއް އެއްވެސް ޙަރަކާތެއް ބާއްވާފައިނުވާނަމަ، ނުވަތަ މި ޤާނޫނުގައި ބަޔާންކޮށްފައިވާ މުއްދަތުގައި އެ ޖަމްޢިއްޔާގެ ހިންގާ ކޮމެޓީ އެކުލަވާލާފައިނުވާނަމަ އެ ޖަމްޢިއްޔާއެއް އުވާލުމަށް އެންގުމުގެ ބާރު ރަޖިސްޓްރާއަށް ލިބިގެންވެއެވެ.
ޖަމްޢިއްޔާއެއް އުވާލުމަށް ރަޖިސްޓްރާރ ކަނޑައަޅައިފިނަމަ، އެ ޖަމްޢިއްޔާއެއްގެ މައްޗަށް އެއްވެސް ދަރަންޏެއް ނުވަތަ ދަޢުވާއެއް އޮތްތޯ ބެލުމަށް ރަޖިސްޓްރާރ އިޢުލާންކުރަންޖެހޭނެއެވެ. އަދި އެ ޖަމްޢިއްޔާއިން އެއްވެސް ފަރާތަކަށް ދައްކަންޖެހޭ ދަރަންޏެއް ނުވަތަ އެ ޖަމްޢިއްޔާއަކާ ދެކޮޅަށް ދަޢުވާއެއް އޮތްކަމަށް ބަޔާންކޮށް އެއްވެސް ފަރާތަކުން ރަޖިސްޓްރާއަށް ހުށަހަޅައިފިނަމަ، އެ ޖަމްޢިއްޔާ އުވާލުމުގެ މައްސަލަ ރަޖިސްޓްރާރ ކޯޓަށް ހުށަހަޅަންޖެހޭނެއެވެ.