ހިތަދޫ ޕޯޓު ތަރައްޤީކުރުމުގެ މަޝްރޫޢު ލަސްތަކެއްނުވެ ފެށޭނެ ކަމަށް މޯލްޑިވްސް ޕޯޓްސް ލިމިޓެޑްގެ ސީއީއޯ ޝާހިދު އަލީ ވިދާޅުވެއްޖެއެވެ.
ޝާހިދު މިހެން ވިދާޅުވީ ހިތަދޫ ޕޯޓުގެ 17 ވަނަ އަހަރީ ދުވަހުގެ ހަފްލާގައި ވާހަކަދައްކަވަމުންނެވެ. މިހަފްލާގައި ޝާހިދު ވަނީ ދެމެހެއްޓެނިވި ގޮތެއްގައި ޕޯޓުގެ ޚިދުމަތް ފޯރުކޮށްދީ ދެކުނުގެ އިގްތިސާދީ ހަރަކާތްތަކަށް އިތުރު ކުރިއެރުންތަކެއް ހޯދެން އޮތީ ހިތަދޫ ޕޯޓު ތަރައްގީ ކޮށްގެންކަން ފާހަގަކުރައްވާފައެވެ. އަދުގެ ސަރުކާރުން ޕޯޓު ތަރައްގީ ކުރުމަށް ނިންމާފައިވާ ޕްލޭނަށް އަލިއަޅުވާލައްވާ ޝާހިދު ވިދާޅުވީ ޕޯޓު ތަރައްގީކުރުމުގެ ޕްރޮޖެކްޓް މާ ލަސްތަކެއް ނުވެ ފެށޭނެކަމަށެވެ. އަދި ޕްރޮޖެކްޓް ފުރިހަމަވުމުން ރާއްޖެއިން ބޭރުން އަންނަ ކާގޯ އުޅަނދު ފަހަރަށް 200 މީޓަރުގެ މަގަތު ފާލަމެއް ޚާއްސަ ކުރެވި، ޑޮމެސްޓިކް އުޅަނދުތަކަށް ޚާއްސަ 165 މީޓަރުގެ މަގަތު ފާލަމެއް ލިބޭނެކަން ޝާހިދު ވިދާޅުވިއެވެ. މީގެ ސަބަބުން ހިތަދޫ ޕޯޓުގެ އޮޕަރޭޝަނަލް ކެޕޭސިޓީއަށް ބޮޑެތި ބަދަލުތަކެއް އަންނާނެކަން ޝާހިދު ވަނީ ފާހަގަކުރައްވާފައެވެ.
އައްޑޫ ހިތަދޫ ވިޔަފާރި ބަނދަރުގެ އިތުރުން ކުޅުދުއްފުށީގެ ވިޔަފާރި ބަނދަރު ތަރައްޤީކުރުމުގެ މަސައްކަތްވެސް އަންނަނީ ކުރަމުންނެވެ.
މިދެ މަޝްރޫޢު އެމްޓީސީސީއާ ހަވާލުކޮށްގެން ކުރިއަށްދާއިރު، ހިތަދޫ އާއި ކުޅުދުއްފުށި ވިޔަފާރި ބަނދަރުގެ އިތުރުން މާލޭގެ ވިޔަފާރި ބަނދަރުވެސް ތަރައްޤީކުރުމުގެ މަސައްކަތް އެމްޕީއެލްއިން އަންނަނީ ކުރަމުންނެވެ.
އައްޑޫ ހައި ސްކޫލްގައި ބޭއްވި ރަސްމިއްޔާތުގައި ވަނީ ހިތަދޫ ޕޯޓަށް ދިގު މުއްދަތަކަށް ޚިދުމަތް ކޮށްދެއްވުމަށްފަހު ރިޓަޔަރ ކުރެއްވި 2 މުވައްޒަފަކަށް ހަނދާނީ ފިލާ ދީފައެވެ. މީގެ އިތުރުން ކުންފުންޏަށް 10 އަހަރު ޚިދުމަތް ކޮށްދެއްވާފައިވާ 26 މުވައްޒަފަކަށާއި 15 އަހަރަށް ވުރެން ގިނަ ދުވަހު ޚިދުމަތް ކޮށްދެއްވާފައިވާ 13 މުވައްޒަފަކަށް ހަނދާނީ ފިލާ ދީފައެވެ.