10 އަހަރަށް ފަހު ކ.މާފުށީގައި ކައުންސިލުން ހަދާފައިވާ ޔޫތް އެންޑް ކޮމިއުނިޓީ ސެންޓަރ ހުޅުވައިފިއެވެ.
މި ސެންޓަރު ހުޅުވުމަށް ބޭއްވި ރަސްމިއްޔާތުގައި އެތަން ހުޅުވައިދެއްވީ ގެސްޓްހައުސް އެސޯސިއޭޝަން އޮފް ދަ މޯލްޑިވްސްގެ ރައީސް ޢަބްދުﷲ ނަޝީދުއެވެ.
މާފުށީ ކައުންސިލްގެ ރައީސް ހަސަން ޞަލާހް ވިދާޅުވީ މާފުށީގައި ހުޅުވި ޔޫތް އެންޑް ކޮމިއުނީޓީ ސެންޓަރަކީ ކައުންސިލްގެ ބަޖެޓުން އިމާރާތްކޮށްފައިވާ ތަނެއްކަމަށެވެ. އަދި މީގެ ކުރިން އެތަން ބޭނުން ނުކޮށް ހުރީ އެތަނުގައި ވަޞީލަތްތައް ނެތުމުގެ ސަބަބުންކަމަށާއި ނަމަވެސް އެތަން އަލުން ހުޅުވާފައިވަނީ އޭސީ ހަރުކޮށް ޒުވާނުންނަށް ކުޅިވަރު ކުޅެވޭނެ ވަޞީލަތްތަކާއެކުކަމަށް ޞަލާހް ވިދާޅުވިއެވެ.
Had the privilege of opening Maafushi Youth and Community Center today. @ibusolih @cappo_solah @aasisaleem #csrforcomminity #localislandtourism pic.twitter.com/piCNzfl3lf
— Abdulla Nasheed (@kaaniablo) December 17, 2022
މާފުށީ ޔޫތު އެންޑް ކޮމިއުނިޓީ ސެންޓަރ ހުޅުވާފައިވަނީ ބިލިއަރޑް ކުޅުމަށް 2 ބިލިއަރޑް ބޯޑާއި ޓެބަލް ޓެނިސް، ކެރަމް އަދި ޗެސް ކުޅޭވޭނެ ވަޞީލަތްތަކާއެކުގައެވެ. މިގޮތުން 2 ބިލިއަރޑް ބޯޑްގެ ތެރެއިން އެއް ބޯޑަކީ ޔޫތް މިނިސްޓްރީން ހަދިޔާ ކުރި ބޯޑެކެވެ. އަދި އަނެއް ބޯޑަކީ އެރަށުގައި ގެސްޓްހައުސް ވިޔަފާރިކުރާ ކާނި ހޮޓެލްސްއިން ހާދިޔާ ކުރި ބޯޑެވެ.
ކައުންސިލްގެ ރައީސް ވިދާޅުވީ އެތަނުގައި އިތުރު ވަޞީލަތްތައް ޤާއިމްކުރުމަށްޓަކައި މަސައްކަތް ކުރަމުން އަންނަކަމަށެވެ. މިގޮތުން ކުރިއަށް އޮތްތަނުގައި ވީޑިއޯ ގޭމް ކުޅޭވޭނެ ގޮތް ހެދުމާއި އައުޓްޑޯ ވޮލީ ކޯޓެއް އެޅުމަށް ޕްލޭންކޮށްފައިވާކަމަށް ޞަލާހް ވިދާލުވިއެވެ.
މާފުށީ ޔޫތް އެންޑް ކޮމިއުނިޓީ ސެންޓަރ ހުޅުވާފައި ހުންނާނީ ކޮންމެ ދުވަހަކު ހަވީރު 4:00 އިން 6:00 އަށެވެ. އަދި ރޭގަނޑު 8:00 އިން 11:00 ޖަހަންދެނެވެ.