އިލެކްޓްރިކް ވެހިކަލް، އުފައްދާ ކާރުހާނާއެއް މެކްސިކޯގައި އެޅުމަށް އެމެރިކާގެ އޮޓޯމޭޓިވް ކުންފުނި ޓެސްލާއިން ނިންމާފައިވާކަމަށް މީޑިއާތަކުން ރިޕޯޓުކޮށްފިއެވެ.
މި ކާރުހާނާ ތަރައްޤީކުރާ ވާހަކަ އަންނަ ހަފްތާގައި ޓެސްލާއިން އިއުލާނު ކުރާނެކަމަށްވެސް މީޑިއާތަކުން ރިޕޯޓުކުރެއެވެ.
މި ކާރުހާނާ އެޅުމަށް ހަމަޖެހިފައި ވަނީ މެކްސިކޯގެ ނިއުވޯ ލިއޮން ސްޓޭޓްގެ ވެރިރަށް މޮންޓެރީ ސިޓީގެ ސަންޓާ ކެޓަރީނާގައެވެ. މިކަމާއި ގުޅޭ އެންމެ ފަހުގެ މަސައްކަތްތައް މިހާރު ކުރަމުންދާއިރު، ޓެސްލާއާއެކު ކުރި މަޝްވަރާތަކުގައި ސްޓޭޓް ސަރުކާރާއި މެކްސިކޯގެ ފޮރިން ރިލޭޝަންސް މިނިސްޓްރީވެސް ބައިވެރިވެފައިވާކަމަށް މީޑިއާ ރިޕޯޓުތައް ބުނެއެވެ.
މެކްސިކޯގައި އަޅާ ކާރުހާނާގައި ޓެސްލާއިން އުފައްދާނީ ކޮން މޮޑެލްތަކެއް ކަމެއް އަދި އުފެއްދުންތައް އުފައްދަން ފަށާނީ ކޮން އިރަކު ކަމެއް އަދި ހާމަނުކުރާ ކަމަށް ރިޕޯޓުތައް ބުނެއެވެ.
މިކަމާއި ގުޅިގެން ޓެސްލާއިން އަދި އެއްވެސް އެއްޗެއް ނުބުނެއެވެ.
ޓެސްލާއިން އެމީހުންގެ ފުރަތަމަ ޔޫރަޕް އީވީ ކާރުހާނާ ހުޅުވީ ޖަރުމަނުވިލާތުގައި މިއަހަރުގެ މާޗް މަހުއެވެ.
މި ކާރުހާނާ އިން އަހަރެއްގެ މައްޗަށް 500،000 އިލެކްޓްރިކް ކާރު ނެރެވޭނެ ކަމަށް ޓެސްލާއިން އޭރު ވަނީ ބުނެފައެވެ. މިއާއިއެކު އިލެކްޓްރިކް ކާރު ސިނާއަތުގައި ޓެސްލާއާއި ވާދަކުރާ ވޯކްސްވެގަން ކުންފުންޏަށް ވުރެ 50،000 ކާރު އިތުރަށް ޔޫރަޕުގެ ބާޒާރަށް ޓެސްލާއަށް ކާރުތައް ނެރެވޭނެއެވެ. މީގެ އިތުރުން މި ފެކްޓަރީގައި 50 ގިގަވޯޓް އަވަރ ބެޓަރީ ހަކަތަވެސް އުފައްދާނެއެވެ.
ޓެސްލާ ކުންފުނިން ޖަރުމަނުގެ ވެރިރަށް ބާލިންގައި ހުޅުވި މި ފެކްޓަރީއަކީ ޔޫރަޕުގައި ހުޅުވި އެކުންފުނީގެ ފުރަތަމަ ފެކްޓަރީއެވެ. މިފެކްޓަރީ ހުޅުވުމަށް ކުންފުނީގެ ވެރިޔާ އިލޯން މަސްކް އަދި ޖަރުމަން ޗާންސެލަރ އޯލާފް ސްކޯލްޒް ބައިވެރިވެ ވަޑައިގެންނެވިއެވެ.