ރ. އަލިފުއްޓާއި އެއް ފަޅެއްގައި އޮންނަ އެއްތިގިލި، އެ ރަށުގެ އިޙްތިސާސްއިން ވަކިކޮށްފިއެވެ.
އެއްތިގިލި، އަލިފުށީގެ އިޙްތިސާސްއިން ވަކިކުރިކަން އަންގާފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްގެ ޤަރާރުންނެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ނެރުއްވި ޤާރާރުގައި ވިދާޅުވީ 2020 ވަނަ އަހަރުގެ މާޗު މަހުގެ 18 ވަނަ ދުވަހު ކަނޑައަޅުއްވާފައިވާ ރާއްޖޭގެ އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިޚްތިޞާޞް ކަނޑައަޅާއި އިޢުލާންކޮށްފައި އޮތް ގޮތަށް ބަދަލު ގެންނަން ޖެހިފައިވާ ކަމަށެވެ. އެގޮތުން އަލިފުށީގެ އިދާރީ ދާއިރާގެ އިހުތިސާސްގެ ތެރޭގައި ހިމެނޭ އެއްތިގިލި އަލިފުށީގެ އިހުތިސާސްއިން ވަކިކޮށްފައިވާކަމަށް ޤަރާރުގައި ވިދާޅުވިއެވެ.
ރ.އަލިފުށްޓާ އެއް ފަޅެއްގައި އޮންނަ އެއްތިގިލި، ރިސޯޓެއް ގޮތުގައި ތަރައްޤީކުރުމަށް ސަރުކާރުން ވަނީ ނިންމާފައެވެ.
ޓޫރިޒަމް މިނިސްޓަރ ޑރ.ޢަބްދުﷲ މަޢުސޫމް ވިދާޅުވީ، އަލިފުށީ ފަޅުގައި ހިއްކުމަށް ހަމަޖެހިފައިވާ ބިމުގެ ތެރެއިން 10 ހެކްޓަރާއެކު، އެއްތިގިލި ރިސޯޓެއްގެ ގޮތުގައި ތަރައްޤީކުރުމަށް ހަމަޖެހިފައިވާކަމަށެވެ.
އަލިފުށްޓާ އެއް ފަަޅެއްގައި އޮންނަ އެއްތިގިލި ރިސޯޓެއްގެ ގޮތުގައި ތަރައްޤީކުރުމަށް ނިންމާފައިވާއިރު އަލިފުށީ ބިން ހިއްކުމާއި އެއާޕޯޓު ތަރައްޤީކުރުމުގެ މަޝްރޫޢު އަންނަނީ ހިންގަމުންނެވެ. މި މަޝްރޫއުގެ ދަށުން އަލިފުށީގައި 50.1 ހެކްޓަރުގެ ބިން ހިއްކުމަށް ހަމަޖެހިފައިވެއެވެ.
އެއްތިގިލީގައި ރިސޯޓެއް ތަރައްޤީ ކުރުމަށް ނިންމާފައިވާކަން ފުރަތަމަ ހާމަކުރައްވާފައިވަނީ ކުރީގެ ސަރުކާރުގައެވެ. ނަމަވެސް އެކަމުގައި އެއްވެސް އަމަލީ މަސައްކަތެއް ކޮށްފައިނުވެއެވެ.