ސަރުކާރުން ކުރިއަށްގެންދާ މަޝްރޫއުތަކާއި ކުރާ މަސައްކަތްތައް ނިންމަން ޖެހޭނީ ރައްޔިތުންގެ ފުރިހަމަ މަޝްވަރާއާއެކުކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް މިހެން ވިދާޅުވީ ގއ.އަތޮޅުގެ 3 ރަށަކަށް ކުރައްވާ ދަތުރުފުޅުގެ ތެރެއިން އެ އަތޮޅު ދާންދޫއަށް ވަޑައިގެން ދާންދޫގެ ރައްޔިތުންނާއެކު ބޭއްވި ބައްދަލުކުރެއްވުމުގައެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ގއ.ދާންދޫއަށް ވަޑައިގަތުމުން އެރަށުން ވަނީ ރައީސްއަށާއި އެމަނިކުފާނުގެ އަރިހުގައި ވަޑައިގެންނެވި ސަރުކާރުގެ މަތީފަންތީގެ ބޭފުޅުންނަށް ހޫނު މަރުޙަބާއެއް ދަންނަވާފައެވެ. މިގޮތުން އެރަށުގެ ކުޑަކުދިންނާއި އިސް ރަށްވެހިންނާއި ޒުވާން އުމުރުފުރާގެ މީހުންގެ ފަރާތުން ރައީސުލްޖުމްހޫރިއްޔާއަށް ވަނީ ހޫނު މަރުޙަބާއެއް ދަންނަވާފައެވެ.
ރައީސުލްޖުމްހޫރިއްޔާ ދާންދޫއަށް ވަޑައިގެން އެރަށު ރައްޔިތުންނަށް ބައްދަލުކުރައްވާ ވިދާޅުވީ ސަރުކާރުން ކުރިއަށްގެންދާ މަޝްރޫއުތަކާއި ކުރައްވާ މަސައްކަތްތައް ނިންމަން ޖެހޭނީ ރައްޔިތުންގެ ފުރިހަމަ މަޝްވަރާއާއެކުގައިކަމަށެވެ. މިގޮތުން މިހާރުވެސް ކުރިއަށްގެންދާ މަޝްރޫއުތަކަށްވެސް ބަދަލުގެނެވޭނީ ރައްޔިތުންގެ އެދުމާއި މަޝްވަރާގެ މަތިންކަން އެމަނިކުފާނު ފާހަގަކުރެއްވިއެވެ.
ދާންދޫއަކީ މަސްވެރި ރަށެއްކަން ފާހަގަކުރައްވާ ރައީސް ވިދާޅުވީ މަސްވެރިންނަށް ކޮށްދެންޖެހޭ ކަންތައްތަކާއި ހައްލު ކޮށްދޭންޖެހޭ ކަންތައްތައް އަދިވެސް ގިނަކަމަށެވެ. އަދި ހުވަދު އަތޮޅަކީ މަސްވެރިކަމުގެ އެންމެ ކުރީގައި އޮތް އަތޮޅުކަމަށާއި ރާއްޖެއިން ބާނާމަހުގެ ބޮޑުބަޔަކީ މިރަށުގެ މަސްވެރިން ބާނާ މަސްކަން ރައީސް ފާހަގަކުރެއްވިއެވެ. ނަމަވެސް މަސްވެރިންނަށް ފައިސޭހައިން ފައިސާ ނުލިބުމާއި މަސްކިރުވުމަށް ކުރިމަތިވާ ގޮންޖެހުންތައް ހިމެނޭހެން ޖުމުލަކޮށް މަސްވެރިންނަށް ދިމާވާ ދަތިތަކަށް ކުރިއަށް އޮތް ދެތިން މަހުގެ ތެރޭގައި ހައްލު ލިބިގެންދާނެކަން ރައީސް ވިދާޅުވިއެވެ.
"މިސަރުކާރުން ވެރިކަމަށް އައިސް މަސްވެރިންނަށް ހައްލު ހޯއްދަވައިދެއްވުމަށް މަސައްކަތްތަކެއް ކުރެވުނު. ނަމަވެސް އަދިވެސް މސްވެރިން ބޭނުންވަ ހަލުވި ސްޕީޑްގައި އެކަންތައްތައް މުޅިން ނުކުރެވޭ. އަމަލީ ގޮތުން ކުރާ މަސައްކަތްތައް ނިމި އެފަދަ ކަންތައްތައްކުގެ ހައްލު ލިބިގެންދާނީ 2 މަހެއްހާ ތެރޭގައި. މަސްވެރިންގެ އިޙްސާސްތަކަށް ކުރިއަށް ދެތިން މަހުގެ ތެރޭގައި ހައްލެއް އަންނާނެ. ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
މިފްކޯގެ ތަފާސް ހިސާބުތަކަށް ބަލާއިރު މިއަހަރުގެ މިހާތަނަށް ގއ. އަތޮޅުން ކޫއްޑޫއަށް 43900 ޓަނުގެ މަސްވަނީ ކިރުވާފައެވެ.
ދާންދޫ ރައްޔިތުންނާއި ބައްދަލުކުރެއްވުމަށް ބޭއްވި ބައްދަލުވުމުގައި އެ ރަށުގެ ރައްޔިތުންގެ ކަންބޮޑުވުންތައް ވަނީ ރައީސްއާ ހިއްސާކޮށްފައެވެ. އެގޮތުން ބޭންކް ބްރާންޗް ޤާއިމްކުރުމުގެ މަސައްކަތް އަވަސްކޮށްދިނުމާއި، ބޯހިޔާވަހިކަމުގެ މަޝްރޫއުތަކާއި ދޯނި ފަހަރު އެހެލުމުގެ ސަރަޙައްދެއް ޤާއިމްކުރުންފަދަ ކަންކަން ހިމަނާ ޕެޓިޝަނެއް ރައީސްއަށް ހުށައެޅިއެވެ. އަދި މަސްވެރިންނަށް މަސް ކިރުވޭނެ ފަސޭހަ އިންތިޒާމްތަކާއި ފައިސާ ނުލިބުމުގެ ޝަކުވާތައް ރައްޔިތުން ވަނީ ރައީސްއާ ހިއްސާކުރައްވާފައެވެ.
މި ބައްދަލުވުމުގައި ދާންދޫ ރައްޔިތުން ވަނީ ސަރުކާރުން އެރަށަށް ގެނެސްދެއްވާ ތަރައްޤީ ފާހަގަކޮށް، ޝުކުރުއަދާކޮށްފައެވެ.
ރައްޔިތުންގެ ޝަކުވާ އަޑުއެއްސެއްވުމަށްފަހު ރައީސް ވިދާލުވީ ރައްޔިތުންގެ ޝަކުވާތަކަށް ހައްލެއް ގެނެސްދިނުމަށްޓަކައި މަސައްކަތްކުރައްވާނެކަމަށެވެ.
ރައީސުލްޖުމްހޫރިއްޔާ ގއ.ގެ ރަށްތަކަށް ކުރައްވާ ދަތުރުފުޅުގައި އެމަނިކުފާނާއެކު ޕްލޭނިން މިނިސްޓަރ މުޙައްމަދު އަޞްލަމްއާއި، ޚާރިޖީ ވަޒީރު ޢަބްދުﷲ ޝާހިދުއާއި، ފިނޭންސް މިނިސްޓަރ އިބްރާހިމް އަމީރުގެ އިތުރަށް ސަރުކާރު ކުންފުނިތަކުގެ އިސްވެރިން ބައިވެރިވެވަޑައިގަންނަވައެވެ.