މޯލްޑިވްސް ކޮލިފިކޭޝަން އޮތޯރިޓީން ދޫކުރާ ހުއްދައާ ނުލާ ކޯސްތައް އިޝްތިހާރު ނުކުރުމަށް އެއޮތޯރިޓީން އަންގައިފިއެވެ.
މިކަން އަންގާ އެއޮތޯރިޓީން ނެރުނު ބަޔާނުގައި ބުނީ އެކްރެޑިޓޭޝަން ޤަވާއިދުގެ 5 ވަނަ މާއްދާގެ ދަށުން ދިވެހިރާއްޖޭގައި މަތީ ތަޢުލީމުގެ ޕްރޮގްރާމްތައް ހިންގުމުގެ ކުރިން އެއޮތޯރިޓީން އެކްރެޑިޓް ކުރަންޖެހޭނެކަމަށެވެ. އެހެންނަމަވެސް، އެއޮތޯރިޓީން އެކްރެޑިޓްކޮށްފައި ނުވާ ޕްރޮގްރާމްތައް އިޝްތިހާރު ކުރަމުންދާ ކަމަށް ފާހަގަކުރެވޭކަމަށެވެ. އެގޮތުން، މަތީ ތަޢުލީމުގެ ޕްރޮގްރާމްތައް އެކްރެޑިޓްނުކޮށް ހިންގުމާއި އިޝްތިހާރު ކުރުމަކީ ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނުގެ ދަށުން މަނާކަމެއްކަން އެމްކިއުއޭއިން ފާހަގަ ކުރެއެވެ.
އެހެންނަމަވެސް، ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑަށް ނުފެތޭ ގޮތަށް އަދި އެ އޮތޯރިޓީން އެކްރެޑިޓް ކޮށްފައިނުވާ ޕްރޮގްރާމްތައް ރާއްޖޭގައި ހިންގާ ޕްރޮގްރާމްތަކެއްގެ ގޮތުގައި ޢާއްމުންނަށް އޮޅުން އަރާގޮތަށް އިޝްތިހާރުކުރަމުންދާ ކަމަށް އެއޮތޯރިޓީން ބުނެއެވެ.
މޯލްޑިވްސް ކޮލިފިކޭޝަން އޮތޯރިޓީން ދޫކުރާ ހުއްދައާ ޚިލާފައި ކޯސްތައް ހިންގާނަމަ އެމައްސަލަ ބަލައި ފިޔަވަޅު އަޅާނެ ކަމަށް އެއޮތޯރިޓީން ވަނީ ވިދާޅުވެފައެވެ.
މޯލްޑިވްސް ކޮލިފިކޭޝަން އޮޓޯރިޓީ (އެމްކިއުއޭ)އިން ވިދާޅުވީ އެއޮތޯރިޓީން ހުއްދަ ދެއްވާފައިވާ މިންގަނޑުތަކާއި ޕްރޮގްރާމް އެކްރެޑިޓޭޝަން ގަވާއިދާ ޚިލާފަށް، މަތީ ތަޢުލީމުދޭ ބައެއް މަރުކަޒުތަކުން ޢަމަލު ކުރަމުންދާކަމުގެ ޝަކުވާ އާންމު ފަރާތްތަކުން އެއޮތޯރިޓީއަށް ހުށަހަޅަމުންދާކަމަށެވެ. މިފަދަ ޝަކުވާތަކުގެ ތެރޭގައި، އޮންލައިންކޮށް ހިންގުމަށް އެމްކިއުއޭއިން ހުއްދަ ނުދޭ ކޯސްތައް އޮންލައިންކޮށް ހިންގާ ކަމަށް ބައެއް ފަރާތްތަކުން އިޝްތިހާރު ކުރަމުންދާ މައްސަލަތަކެއް ހުށައަޅާފައިވާކަމަށްވެސް އެއޮތޯރިޓީން ވިދާޅުވެއެވެ.
މޯލްޑިވްސް ކޮލިފިކޭޝަން އޮތޯރިޓީއަކީ ރާއްޖޭގައި ހިންގާ ކޯސްތައް، ޤައުމީ ސަނަދުގެ މިންގަނޑުތަކަށް ލެވެލްކުރުމާއި، މިފަދަ ކޯސްތައް ރާއްޖޭގައި ހިންގުމުގެ ހުއްދަދޭ ފަރާތެވެ.