ކުނި އުކާލުމުގެ ޚިދުމަތް ހޯދަމުން އަންނަ ގޭބިސީތަކުން މަގުމައްޗަށް ކުނި ނެރެފައި ނުބެހެއްޓުމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯއިން އިލްތިމާސްކޮށްފިއެވެ.
ވެމްކޯއިން މިގޮތަށް އިލްތިމާސްކޮށްފައިވަނީ މާލޭގެ މަގުތައް ސާފުކޮށް ބޭއްވުމަށް ވެމްކޯއިން ކުރަމުން އައި މަސައްކަތް ހުއްޓާލުމާއެކު މަގުތަކަށް ކުނި ނެރެފައި ހުރުމުގެ ސަބަބުންނެވެ.
މަގުތަކުގައި ކުނި ހުރުމުގެ ސަބަބުން އެކަމުގެ ކަންބޮޑުވުން ފާޅުކޮށް ވެމްކޯއިން ނެރުނު ބަޔާނުގައި ވަނީ ފާއިތުވެ ދިޔަ ދެތިން ދުވަހުގެ ތެރޭގައި މާލޭގެ މަގުތަކާއި އާންމު ތަންތަނުގައި ގިނަ އަދަދަކަށް ކުނިވާ ޒާތުގެ ކުންޏާއި އެހެނިހެން ކުނިތައް ޖަމާވެ އާންމުންގެ ޝަކުވާތައް ގިނަވެފައިވާކަމަށެވެ. އަދި އާންމު ސިއްޙަތަށް ނުރައްކާ ވެދާނެ ކަމުގެ ބިރު އޮތުމާ ގުޅިގެން މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އައިމިނަތު ޝައުނާގެގެ އިރުޝާދުގެ ދަށުން މާލޭގެ މަގުތައް ސާފު ކުރުމުގެ މަސައްކަތް ފަށާފައިވާކަމަށްވެސް ވެމްކޯގެ ބަޔާނުގައިވެއެވެ.
މާލެތެރެ ސާފުތާހިރުކޮށް ބޭއްވުމަށް އާންމު ރައްޔިތުންނާއި ހުރިހާ އެންމެން ގުޅިގެން މަސައްކަތް ކުރުމަށް ވެމްކޯއިން ވަނީ ގޮވާލާފައެވެ. އަދި ވެމްކޯގެ ޚިދުމަތް ހޯދުމަށް ރަޖިސްޓަރީ ކޮށްފައިވާ އެއްވެސް ގޭބިސީއަކުން މަގުމައްޗަށް ކުނި ނުނެރުމަށާއި ޚިދުމަަތް ހޯދުމަށް ރަޖިސްޓްރީ ނުކުރާ ގޭބިސީތަކުން ވެސް ރަޖިސްޓްރީވުމަށް ވެމްކޯއިން ވަނީ އިލްތިމާސްކޮށްފައެވެ.
މާލެއިން ވެމްކޯގެ ޚިދުމަތް ހޯދުމަށް ރަޖިސްޓްރީވެފައި ވަނީ ގާތްގަނޑަކަށް 15000 ގޭބިސީއަކުން ކަމަށް އެ ކޯޕަރޭޝަނުން ހާމަކުރެއެވެ. އަދި މާލޭގެ ގޭބިސީތަކުގެ ތެރެއިން 35000 ނުވަތަ 40000 ގޭބީސީއަކީ ރަޖިސްޓްރީ ނުވާ ގޭބިސީކަންވެސް ވެމްކޯއިން ފާހަގަކުރެއެވެ. މާލެ، ވިލިމާލެ އަދި ހުޅުމާލެއިން ޖުމްލަ 21000 ގޭބީސީ ރަޖިސްޓްރީވެފައިވެއެވެ.
މާލެ ސާފުކޮށް ބެލެހެއްޓުމަށް ވޭސްޓް މެނޭޖްމަންޓް ކޯޕަރޭޝަނާއެކު މާލެ ސިޓީ ކައުންސިލުން ވެފައި އޮތް އެއްބަސްވުން ފަސް އަހަރަށްފަހު މިމަހުގެ 26 ދުވަހު ވަނީ ހަމަވެފައެވެ. އަދި އެއަށްފަހު މާލެ ސިޓީ ކައުންސިލުން ވަނީ މަގުތައް ސާފުކުރުމުގެ މަސައްކަތް ފަށާފައެވެ. އެހެންނަމަވެސް ގޭގެއިން ނެރޭ ކުނި މަގުމަތީގައި ހުރުމުގެ ސަބަބުން ސިޓީ ކައުންސިލުން ވަނީ އެކުނިތައް ނެގުމަށް ވެމްކޯއަށް އަންގާފައެވެ.