ރޯދަމަހު ރާއްޖެއަށް މުދާ ހިފައިގެން އަންނަ ބޯޓުފަހަރަށް އެއްވެސް ދަތިކަމެއް ނެތި ޚިދުމަތް ދެވޭނެ ކަމަށް މޯލްޑިވްސް ޕޯޓްސް ލިމިޓެޑް(އެމްޕީއެލް)އިން ބުނެފިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެމްޕީއެލްގެ ޓާމިނަލް މެނޭޖަރ އަބްދުލް ލަތީފް އަބްދުލްކަރީމް ވިދާޅުވީ އެހެން މަސްތަކާ އަޅާބަލާއިރު ރަމަޟާންމަހު މުދާ ކްލިއަރ ކުރަން ލިބޭ ވަގުތު ކުޑަވުމުގެ ސަބަބުން ގޮންޖެހުންތަކާ ކުރިމަތިލާންޖެހޭކަމަށެވެ. ނަމަވެސް އަބަދުވެސް މަސައްކަތްކުރަމުންދަނީ އުނދަގޫތަކާއެކުވެސް ވީހާވެސް އަވަހަކަށް މުދާ ކްލިއަރކޮށް ރައްޔިތުންނަށް ފޯރުކޮށްދިނުމަށްކަމަށެވެ. އެގޮތުން ރޯދަމަހަކީ ގިނައަދަދެއްގެ ކާބޯތަކެތި އެތެރެކުރާ މަހެއްކަމުން އެ މުދާތައް އަވަހަށް ކްލިއަރ ކުރުމަށްޓަކައި އިތުރު މުވައްޒަފުން ހޯދާފައިވާކަން ފާހަގަކޮށް އަބްދުލް ލަތީފް ވިދާޅުވީ މުދާ ކްލައިރ ކުރުމަށްޓަކައި ބޭނުންވާ އިތުރުވެހިކަލްތައްވެސް ހޯދާފައިވާކަމަށެވެ. އަދި ބައެއް އިކުއިމެންޓްތައް ގެނައުމުގެ މަސައްކަތްވެސް ކުރަމުން އަންނަކަމަށް އޭނާ ވިދާޅުވިއެވެ.
"ޕެރިޝިބަލް މުދާ ކްލިއަރ ކުރާނެ މުވައްޒަފުން ތަމްރީން ކުރުމުގެ މަސައްކަތްތައްވެސް އަންނަނީ ކުރަމުން. ރޯދަމަހު އެއްވެސް ދަތިކަމެއް ނައިސް ރާއްޖެއަށް މުދާ ހިފައިގެން އަންނަ ބޯޓުފަހަރަށް ޚިދުމަތް ދެވޭނެ." ޓާމިނަލް މެނޭޖަރ އަބްދުލް ލަތީފް އަބްދުލްކަރީމް ވިދާޅުވިއެވެ.
ރޯދަމަހާއި ދިމާކޮށް މައިގަނޑު ގޮތެއްގައި އެންމެ ގިނައިން އެތެރެކުރާ މުދަލަކީ އަވަހަށް ހަލާކުވާ ޒާތުގެ ކާބޯތަކެއްޗެވެ. މީގެ ކުރީގެ ރަމަޟާން މަސްތަކުގައިވެސް މުދާ ހިފައިގެން ބޯޓު ބަނދަރުކުރާ ވަގުތު، މުދާ ހުސްކުރުމަށް ލޮރީފަދަ ތަކެތި ތައްޔާރަށް ބޭއްވުމުގެ އިންތިޒާމްތައް ހަމަޖައްސާފައިވާ ކަމަށެވެ.
އާންމު ގޮތެއްގައި ރާއްޖެ ގެންނަ މުދަލުގެ ބޮޑުބަޔަކީ ކެއިންބުއިމަށް ބޭނުންކުރާ އަވަހަށް ހަލާކުވާ ޒާތުގެ ކާބޯތަކެއްޗަށްވާތީ މިތަކެތި ހުސްކުރާނަމަ ހެނދުނު 9:00 ފެށިގެން ދަންވަރާ ހަމައަށް ހުއްޓާނުލާ މަސައްކަތް ކުރަމުންދެއެވެ.