ވިލިމާލެ އިން މިދިޔަ އަންގާރަ ދުވަހުގެ ރޭ ތެޔޮ ބޯޓެއްގައި ފުރި ދެ މީހަކު ހޯދުމުގެ މަސައްކަތުގެ ތެރެއިން މާލެވެސް ބަލަމުން އަންނަ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ ގެއްލުނު މީހުން ހޯދުމުގެ މަސައްކަތުގައި މެރިން ޕޮލިސް އާއި ކޯސްޓް ގާޑުންވެސް ކުރަމުން އަންނަ ކަމަށެވެ. އަދި އެ މީހުން ހޯދުމުގެ މަސައްކަތުގެ ތެރެއިން މާލެ ތެރެ ބެލުމުގެ މަސައްކަތް ވެސް ކުރަމުން އަންނަ ކަމަށް ފުލުހުން ވިދާޅުވެއެވެ. ނަމަވެސް އެ މީހުން ހޯދަން މާލެ ބަލަނީ ކީއްވެ ކަމެއް ފުލުހުން ހާމައެއް ނުކުރެއެވެ.
ގެއްލިގެން ހޯދަމުން ދަނީ ގދ. ތިނަދޫ މަނާރު، އުމުރުން 45 އަހަރުގެ މުހަންމަދު ނިޒާމް އާއި ބަންގްލަދޭޝްގެ ރައްޔިތެއް ކަމަށްވާ އުމުރުން 35 އަހަރުގެ މުހައްމަދު ލިޓަންއެވެ.
ވިލިމާލެއިން ދެ މީހުންނާއެކު ފުރި ތެޔޮ ބޯޓު ގެއްލިގެން ހޯދަން ފެށީ މިދިޔަ ބުދަދުވަހުގައެވެ. އެދުވަހު މިބޯޓު އެއަރޕޯޓު ކައިރިން އޮޔާ ދަނިކޮށް ފެނުނު ކަމުގެ މަޢުލޫމާތު ފުލުހުންނަށް ލިބިފައިވާ ކަމަށް ފުލުހުން ވިދާޅުވެެއެވެ. އަދި އެދުވަހު ފެނުނު ބޯޓުން ދަތުރުކުރީ ގެއްލިގެން ހޯދަމުންދާ ދެމީހުންކަމަށް މިހާތަނަށް މަޢުލޫމާތު ލިބިފައިވާކަމަށް ފުލުހުން ވިދާޅުވެއެވެ.
މުޙައްމަދު ނިޒާމް އާއި މުހައްމަދު ލިޓަންއާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ 9911099 އަށް ގުޅާ އެކަން ހިއްސާކުރުމަށް ފުލުހުން ވަނީ އެދިފައެވެ.
ގެއްލިގެން ބަޔަކު ހޯދަމުން އަންނައިރު، މިއަދު ހެނދުނު ވ. ވެންފަރު ފަޅުގެ ހުޅަނގު އުތުރު ކަނޑުން މީހެއްގެ ހަށިގަނޑު ވަނީ ފެނިފައެވެ. އެ މައްސަލަ ވެސް ފުލުހުން އަންނަނީ ތަހުގީގުކުރަމުންނެވެ.