މާލޭ ޢިއްޒުއްދީން ފާލަން ކައިރިން މޫދަށް އެޅިފައިވާ ކަޅުތެޔޮތައް ސާފުކުރުމުގެ މަސައްކަތުގެ ތެރެއިން މިހާތަނަށް 700 ލީޓަރުގެ ތެޔޮ ނަގާ ސާފުކޮށްފައިވާކަމަށް އެމް.އެން.ޑީ.އެފްއިން ވިދާޅުވެއްޖެއެވެ.
ޢިއްޒުއްދީން ފާލަން ނުވަތަ މާލޭ ރަސްމީ ފާލަމާއި 3 ނަންބަރު ޖެޓީއާއި ދެމެދު ގިނަ އަދަދެއްގެ ކަޅުތެޔޮ އެޅިފައި ހުރިކަމުގެ މަޢުލޫމާތު މެރިޓައިމް ރެސްކިޔު ކޯޑިނޭޝަން ސެންޓަރ، އެމް.އާރް.ސީ.ސީއަށް ލިބުމާގުޅިގެން އެ ސަރަހައްދު ސާފުކުރުމުގެ މަސައްކަތް ކަމާބެހޭ ފަރާތްތަކުން މިމަހުގެ 1 ވަނަ ދުވަހުން ފެށިގެން އަންނަނީ ކުރަމުންނެވެ.
ރަސްމީ ފާލަމާއި ދިމާލުން ފަޅުތެރެއަށް ގާތްގަނޑަކަށް 1000 ލީޓަރުގެ ކަޅުތެޔޮ އެޅިފައިވާކަމަށް ލަފާކުރެވޭކަމަށް އެމް.އެން.ޑީ.އެފްއިން ވިދާޅުވެއެވެ.
އެމް.އެން.ޑީ.އެފްއިން ވިދާޅުވީ، އެ ސަރަހައްދުން ތެޔޮތައް ނަގާ ސާފުކުރުމަށް މި ދެދުވަހު ކުރެވުނު މަސައްކަތުން މިހާތަނަށް ގާތްގަނޑަކަށް 700 ލީޓަރުގެ ތެޔޮ ނަގާ ސާފުކުރެވިފައިވާކަމަށެވެ. އަދި މާދަމާވެސް މި މަސައްކަތް ކުރިއަށްދާނެކަމަށް އެމް.އެން.ޑީ.އެފްއިން ވިދާޅުވެއެވެ.
އެމް.ޕީ.އެލް ސަރަޙައްދަށް ފެތުރިފައިވާ ތެޔޮ މިހާރު ވަނީ ނަގާ ކޮންޓްރޯލްކޮށްފައެވެ. އަދި ރަސްމީ ފާލަން ސަރަޙައްދަށް އެޅިފައިވާ ތެޔޮ އިތުރަށް ފެތުރުނަ ނުދިނުމަށްޓަކައި ސީޖީ ހަލަވެލި ބޭނުން ކޮށްގެން ރަސްމީ ފާލަން އަދި އެ ސަރަޙައްދު ބޭރުން، ބޫމް އަޅާ ތެޔޮތައް ނެގުމުގެ މަސައްކަތް އަންނަނީ ކުރަމުންނެވެ.
މިކަމުގައި ކޯސްޓްގާޑުގެ ސިފައިންނަށް އެހީތެރިވުމަށް އެމް.އެން.ޑީ.އެފް މާލެ އޭރިއާ ކޯސްޓްގާޑް ސްކޮޑްރަނާއި، މާލެ އޭރިއާ މެރީންސާއި، މެރިން ޕޮލީސްގެ އިތުރުން މާލެ ސިޓީ ކައުންސިލްގެ ފަރާތުން އަންނަނީ އެހީތެރިކަން ފޯރުކޮށްދެމުންނެވެ.
މާލޭ ރަސްމީ ފާލަން ހިމެނޭ ސަރަހައްދަށް ގިނަ ޢަދަދެއްގެ ކަޅުތެޔޮ އެޅެން މެދުވެރިވި ސަބަބެއް ކަމާބެހޭ ފަރާތްތަކަކުން މިހާތަނަށް ހާމަކޮށްފައެއްނުވެއެވެ. މިކަމާގުޅިގެން އެންވަޔަރަންމަންޓަލް ޕްރޮޓެކްޝަން އެޖެންސީ، އީޕީއޭއިންވެސް ވިދާޅުވެފައިވަނީ ތެޔޮއެޅިފައިވަނީ ކިހިނެއްތޯ ބެލުމުގެ މަސައްކަތްކުރަމުން އަންނަ ކަމަށެވެ. އިތުރު ތަފްޞީލެއް ދެއްވާފައެއްނުވެއެވެ.