އިންޑިއާގެ ތަޢުލީމުދޭ މުއައްސަސާތައް މެދުވެރިކޮށް ދިވެހި ނޫސްވެރިންނަށް ތަމްރީނު ފުރުޞަތުތަކެއް ހޯދައިދިނުމަށް މޯލްޑިވްސް މީޑިއާ ކައުންސިލުން ރާއްޖޭގައި ހުންނަ އިންޑިއާގެ ހައިކޮމިޝަނާއި ބައްދަލުކޮށް، މަޝްވަރާކޮށްފިއެވެ.
މިއީ ދިވެހި ނޫސްވެރިން ތަމްރީންކުރުމަށް މީޑިއާ ކައުންސިލުން ކުރަމުންގެންދާ މަސައްކަތަކުގެ ތެރެއިން ބޭއްވުނު މަޝްވަރާ ބައްދަލުވުމެއްކަމަށް މީޑިއާ ކައުންސިލުން ވިދާޅުވެއެވެ.
އިންޑިއާ ހައިކޮމިޝަނާއެކު ބޭއްވި މި ބައްދަލުކުރެއްވުމުގައި އިންޑިއަށް ދިވެހި ނޫސްވެރިން ފޮނުވައިގެން ތަމްރީނު ޕްރޮގްރާމްތައް ހިންގުމަށާއި، އިންޑިއާގެ ތައުލީމީ ޚިދުމަތްދޭ މަރުކަޒުތަކުގެ މާހިރުން ރާއްޖެގެނެސް ތަމްރީމް ޕްރޮގްރާމްތަކެއް ފެއްޓުމަށާއި، މި ދާއިރާގެ ތަމްރީން ޕްރޮގްރާމްތަކެއް ހިންގުމާގުޅޭގޮތުން ވަނީ މަޝްވަަރާކޮށްފައެވެ. އަދި ކުރު މުއްދަތާއި ދިގު މުއްދަތުގެ ސްކޮލަރޝިޕް ޕްރޮގްރާމްތަކެއް ނޫސްވެރިންނަށް ހޯދައިދިނުމާގުޅޭގޮތުން މަޝްވަރާކޮށްފައިވާކަމަށްވެސް މީޑިއާ ކައުންސިލުން ވިދާޅުވެއެވެ.
މީޑިއާ ކައުންސިލުން ވިދާޅުވީ، ދިވެހި ނޫސްވެރިންނަށް ތަމްރީނު ފުރުޞަތުތައް ފަހިކޮށްދިނުމަށް މަސައްކަތް ކޮށްދެއްވާނެކަމުގެ ޔަޤީންކަން މި ބައްދަލުވުމުގެ ތެރެއިން އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ދެއްވާފައިވާކަމަށެވެ. އަދި މޯލްޑިވްސް މީޑިއާ ކައުންސިލާއި އިންޑިއާގެ ޕްރެސް ކައުންސިލާއި ދެމެދު އެއްބަސްވުމެއް އެކުލަވާލާ، ގުޅުން ބަދަހިކޮށް މި ދާއިރާއަށް ބޭނުންވާ ތަމްރީން ޕްރޮގްރާމްތައް ލިބޭނެ މަގު ފަހިކޮށްދިނުމަށް މަސައްކަތް ކޮށްދެއްވާނެކަމަށްވެސް އިންޑިއާ ސަފީރު ވިދާޅުވެފައިވާކަމަށެވެ.
މި ބައްދަލުކުރެއްވުމުގައި މީޑިއާ ކައުންސިލުގެ ފަރާތުން ބައިވެރިވެފައިވަނީ ކައުންސިލުގެ ރައީސް އަޙްމަދު މުސްތަފާ، ކައުންސިލުގެ މެންބަރު މުޙައްމަދު އަފްރާހު، މެންބަރު މޫސާ ރަޝީދު، މެންބަރު އުސްތާޒާ އަރްމާން ރަޝީދު އަދި ސެކްރެޓަރީ ޖެނެރަލް ޑރ. އިބްރާހީމް ސަމީރެވެ.