ޗިލްޑްރަންސް އޮމްބަޑްސްޕަރސަންގެ އޮފީސް މާފަންނު ފިނިފަރު އިމާރާތަށް ބަދަލުކޮށްފިއެވެ.
ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން ޗިލްޑްރަންސް އޮމްބަޑްސްޕަރސަން އޮފީސް އުފެދުނީ 23 ޖުލައި 2020 ގައެވެ. މި އޮފީސް ވުޖޫދުވިފަހުން މިހާތަނަށް ހިންގަމުން ގޮސްފައިވަނީ މާފަންނު ހަވީރީ ހިނގުމުގައި ހުންނަ ސަކައިމޫގެ 8 ވަނަ ފަންގިފިލާގައެވެ.
ޗިލްޑްރަންސް އޮމްބަޑްސްޕަރސަންގެ އޮފީހުން ވިދާޅުވީ، މިމަހުގެ 8 އިން ފެށިގެން އެ އޮފީސް ހިންގާނީ މާފަންނު ފިނިފަރުގެ 12 ވަނަ ފަންގިފިލާގައިކަމަށެވެ.
ޗިލްޑްރަންސް އޮމްބަޑްސްޕަރސަން އޮފީހުގެ މައިގަނޑު މަސްޢޫލިއްޔަތުތަކަކީ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި، އދ.ގެ ކުޑަކުދިންގެ ޙައްޤުތަކާބެހޭ ބައިނަލްއަޤްވާމީ މުޢާހަދާއަށް ދައުލަތުގެ މުއައްސަސާތައް ޢަމަލުކުރާ މިންވަރު ދެނެގަތުމެވެ. އަދި ރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި، މުވައްޒަފުން މޮނިޓަރކޮށް، އިވެލުއޭޓްކުރުމާއި، ރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި މުވައްޒަފުންގެ ޢަމަލުތައް ތަޙުޤީޤުކޮށް މުޠާލިއާކުރުމެވެ.
ޗިލްޑްރަންސް އޮމްބަޑްސްޕަރސަން އޮފީހުން ތަޙުޤީޤުކުރާނީ ކުޑަކުދިންގެ މަސްލަޙަތު ހިމެނޭ މަސައްކަތްކުރާ ދައުލަތުގެ އިދާރާތަކާއި، އެ އިދާރާތަކުގެ މުވައްޒަފުންގެ އިހުމާލެއް އޮތްކަމަށް ބެލެވޭ މައްސަލަތަކެވެ. ކާކުކަން ނޭނގޭނެހެންވެސް މި އޮފީހަށް މައްސަލަތައް ހުށަހެޅިދާނެއެވެ.
ޗިލްޑްރަންސް އޮމްބަޑްސްޕަރސަންގެ އޮފީހުން ހިލޭ ގުޅޭނެ ހޮޓްލައިން ނަންބަރެއް ތަޢާރަފުކޮށްފައިވާއިރު، އީމެއިލް މެދުވެރިކޮށްގެންނާއި، ސިޓީ މެދުވެރިކޮށްގެންނާއި، އަދި އޮފީހަށް ހާޒިރުވެގެންވެސް މައްސަލަ ހުށަހެޅިދާނެކަމަށް އެ އޮފީހުން ވިދާޅުވެއެވެ.