ބިޒްނަސް ސެންޓަރ ކޯޕަރޭޝަން ލިމިޓެޑް، ބީ.ސީ.ސީއިން ހިންގަމުން އަންނަ އެސްއެމްއީ ހަބުގެ ފުރަތަމަ ފަންގިފިލާއިން ކާބޯތަކެތީގެ ވިޔަފާރި ކުރުމަށްޓަކައި ކުއްޔަށް ދޫކޮށްފައިވާ ކިއޮސްކްތަކަށް އެދި ދަފްތަރުވުމުގެ ފުރުޞަތު ހުޅުވާލައިފިއެވެ.
އެންމެ ކުދި، ކުދި އަދި މެދު ފަންތީގެ ވިޔަފާރިތައް ކުރިއަރުވާ އެފަދަ ވިޔަފާރިތައް ދެމެހެއްޓެނިވި ގޮތެއްގައި ކުރުމަށް މަގުފަހިކޮށްދިނުމުގެ ގޮތުން ބީ.ސީ.ސީއިން "އެސްއެމްއީ ހަބް"ގެ ނަމުގައި ޗާނދަނީ މަގު އެލައިޑް ބިލްޑިންގގައި ކޮމަރޝަލް ހަބެއް ތަރައްޤީކޮށް ހުޅުވާފައިވަނީ މިދިޔަމަހުގެ 15 ވަނަ ދުވަހުއެވެ.
ބީ.ސީ.ސީއިން ވިދާޅުވީ، "އެސްއެމްއީ ހަބް"ގެ ފުރަތަމަ ފަންގިފިލާއިން ކާބޯތަކެތި ތައްޔާރުކޮށް ވިއްކާ ފަރާތްތަކަށް ޚާއްސަކޮށްގެން ކުއްޔަށް ދޫކޮށްފައިވާ ކިއޮސްކުތައް ކުއްޔަށް ހިފުމަށް ގިނަ ފަރާތްތަކުން ޝައުޤުވެރިކަން ފާޅުކުރަމުންދާކަމަށެވެ. އެހެންކަމުން ކުރިއަށްއޮތް ތަނުގައި ހުސްވާ ކިއޮސްކުތައް ކުއްޔަށް ހިފުމަށް ބޭނުންވާ ފަރާތްތަކުގެ ދަފްތަރެއް އެކުލަވައިލުމަށް އެ ކޯރޕަރޭޝަނުން ވަނީ ނިންމާފައެވެ.
އެސްއެމްއީ ހަބުގެ ފުރަތަމަ ފަންގިފިލާގައި ޒަމާނީ ފެންވަރަށް ތަރައްޤީކޮށްފައިވާ 19 ކިއޮސްކް ހުރިއިރު، މިއިން ކޮންމެ ކިއޮސްކެއްގައިވެސް ދިވެހި ވިޔަފާރިވެރިން ދަނީ ހަރަކާތްތެރިވަމުންނެވެ. ބީ.ސީ.ސީއިން ވިދާޅުވީ، ކުރިއަށްއޮތް ތަނުގައި ހުސްވާ ކިއޮސްކުތައް ކުއްޔަށް ދިނުމަށް ފުރުޞަތު ދެވޭނީ ދަފްތަރުގައި ހިމެނޭ ފަރާތްތަކުގެ މެދުގައި ގުރުއަތު ލައިގެންކަމަށެވެ. މިކަމަށް ޝަޢުގުވެރިވާ ފަރާތްތަކުން ދަފްތަރުވުމަށް އެކަމަށް ޚާއްސަކޮށްފައިވާ އޮންލައިން ފޯމެއް ފުރުމަށްފަހު ހުށަހެޅުމަށް ބީ.ސީ.ސީއިން ވަނީ ފުރުޞަތު ހުޅުވާލާފައެވެ.
ކިއޮސްކް ކުއްޔަށް ހިފުމަށް އެދޭ ފަރާތްތަކުގެ ޝަރުތުތައް:
* ދިވެހި ރައްޔިތެއްކަމުގައިވުން
* 18 އަހަރު ފުރިފައިވުން
* ދިވެހިރާއްޖޭގެ ކުދި އަދި މެދުފަންތީގެ ވިޔަފާރިތަކާބެހޭ ޤާނޫނުގައި ބަޔާންކޮށްފައިވާ ވިޔަފާރިތަކުގެ ގިންތިކުރާ މިންގަނޑުތަކުގެ ތެރޭގައި ހިމެނޭ އެންމެ ކުދި ނުވަތަ ކުދި ގިންތީގެ ވިޔަފާރިއަކަށްވުން
* ބީ.ސީ.ސީއިން ހިންގާ އެއްވެސް މަޝްރޫޢެއްގެ ތެރެއިން އާމްދަނީއެއް ލިބޭ ފަރާތެއްކަމުގައި ނުވުން
ކިއޮސްކުތަކަށް އެދި ފޯމު ހުށަހަޅާ ފަރާތްތަކުގެ ޝަރުތުހަމަވާނަމަ އެ ފަރާތްތައް ދަފްތަރުކުރެވޭނެކަމަށް ބީ.ސީ.ސީއިން ވިދާޅުވެއެވެ. އަދި ކިއޮސްކެއް ހުސްވުމުން، ކިއޮސްކަކަށް އެދި ވެއިޓްލިސްޓް ކޮށްފައިވާ ފަރާތްތަކަކުން ކިއޮސްކް ކުއްޔަށް ހިފުމަށް ބޭނުން ނުވާނަމަ، ކިއޮސްކުތަކަށް އެދި ދަފްތަރުކޮށްފައިވާ ފަރާތްތަކަށް މި ފުރުޞަތު ހުޅުވާލާ، އެއް ފަރާތަށް ވުރެ ގިނަ ފަރާތުން ޝަޢުގުވެރިކަން ފާޅުކޮށްފިނަމަ އެ ފަރާތްތަކުގެ މެދުގައި ގުރުއަތުލުމެއް ބާއްވާ، އެއް ފަރާތެއް ހޮވާނެއެވެ.
ކާބޯތަކެތި ވިއްކުމަށް ޚާއްސަކޮށްފައިވާ ކިއޮސްތަކުގައި ހަރަކާތްތެރިވާ ވިޔަފާރިވެރިންގެ ތެރެއިން ތަފާތު ބާވަތްތައް ތައްޔާރުކޮށްގެން ވިއްކާ ވިޔަފާރިވެރިން ހިމެނެއެވެ. މީގެތެރޭގައި، ދިވެހި ކެއުމުގެ ބާވަތްތަކާއި ކޭކު އަދި ތަފާތު ބުއިންތައް ތައްޔާރުކޮށްގެން ވިއްކާ ވިޔަފާރިވެރިން ހިމެނެއެވެ. މި ކިއޮސްކުތަކުގެ މަހު ކުލި އުޅެނީ 8900 ރުފިޔާއިން ފެށިގެން 12،400 ރުފިޔާއާއި ދެމެދުގެ އަގެއްގައެވެ.
އެސްއެމްއީ ހަބަކީ އެންމެ ކުދި، ކުދި އަދި މެދު ފަންތީގެ ވިޔަފާރިތަކުން އުފައްދާ ތަކެތި ނުވަތަ ފޯރުކޮށްދޭ ޚިދުމަތްތައް އިތުރު ހަރުފަތަކަށް ގެންދިއުމަށްޓަކާ ހުޅުވިގެންދާ ފަހި ފުރުޞަތެއްކަމަށް ބީ.ސީ.ސީއިން ވިދާޅުވެއެވެ. އެގޮތުން މިތަނުގައި ކާބޯތަކެތީގެ އުފެއްދުންތަކުގެ އިތުރުން، ޕާރފޯމިން އާރޓްސް އެންޑް އެންޑް އެންޓަރޓެއިންމަންޓަށް ޚާއްސަ ސްޓޭޖް ސަރަޙައްދަކާއި، ފޮތް ވިއްކުމަށް ޚާއްސަ ސަރަހައްދެއްވެސް ވަނީ ތަރައްޤީކޮށްފައެވެ.