މާލޭ ރައްޔިތުންނަށް ގޯތި ދޭން ކަނޑައަޅާފައިވާ މާލެ އަތޮޅު ގިރާވަރުފަޅު، މިއަހަރު މެދުތެރޭ ހިއްކާ ނިމޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ.
މާލެ އަތޮޅު ގިރާވަރު ފަޅު ހިއްކާ އެ ބިމުން މާލޭގެ ރައްޔިތުންނަށް ގޯތި ދިނުމުގެ ބިޔަ މަޝްރޫޢެއް ކުރިއަށްގެންދިއުމަށް ސަރުކާރުން ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިޢުލާންކުރެއްވީ މިދިޔަ އަހަރުގެ ރިޔާސީ ބަޔާނުގައެވެ. ރައީސުލްޖުމްހޫރިއްޔާ ވިދާޅުވީ ގިރާވަރު ފަޅު ހިއްކާ، މާލޭގެ ރައްޔިތުންނަށް ޚާއްސަކޮށް 2000 ގޯތި ދޫކުރާނެކަމަށެވެ.
އެމްޑީޕީ ރިޔާސީ ޕްރައިމަރީގެ ކެމްޕެއިންގައި މާލެ ރައްޔިތުންނާ އެކު ރޭ ބޭއްވެވި ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ މާލޭގެ މީހުންނަށް ސަރުކާރުން ވަޢުދުވެފައިވާ ގޮތަށް، ބޯހިޔާވަހިކަމުން އެއްވެސް ރައްޔިތަކު ބާކީ ނުކޮށް ފްލެޓާއި ގޯތި ދޭނެ ކަމަށެވެ. މުޅި ރާއްޖޭގައި 16،000އަށް ވުރެ ގިނަ ފްލެޓާއި، ގޯއްޗާއި، ރޯ ހައުސްގެ މަޝްރޫއުތައް ކުރިޔަށް ގެންދާކަން ފާހަގަކުރައްވާ އެމަނިކުފާނު ވަނީ މާލެއަށް ހާއްސަ ކޮށްގެން 7،000 ފްލެޓާއި 5،000 ގޯތި ދިނުމުގެ މަޝްރޫއެއް އޮތްކަންވެސް ހާމަކުރައްވާފައެވެ. އެގޮތުން ހައުސިން މިނިސްޓްރީން މިހާރު ކުރަމުން އަންނަނީ ފްލެޓާއި ގޯތީގެ ފޯމުތައް އިވެލުއޭޓް ކުރުމުގެ މަސައްކަތްކަމަށާއި، ހާމަކަން ބޮޑު ގޮތެއްގައި ވީހާ ވެސް ރަނގަޅަށް އެ މަސައްކަތް ކުރުމަށް ފަހު ޝަރުތު ހަމަވާ އެއްވެސް މީހަކު ބާކީ ނުކޮށް ބޯހިޔާވަހިކަން ފޯރުކޮށްދޭނެކަމުގެ ޔަޤީންކަން އެމަނިކުފާނު ދެއްވިއެވެ.
މާލޭ ރައްޔިތުންނަށް ގޯއްޗާއި ފްލެޓް ދިނުމަށް ކުރިއަށްގެންދާ މަޝްރޫތަކަށް އަލި އަޅުވާލައްވާ ރައީސުލްޖުމްހޫރިއްޔާ ވިދާޅުވީ ގިރާވަރު ފަޅު ހިއްކުމުގެ މަސައްކަތް މިއަހަރުގެ މެދުތެރޭގައި ހިއްކާ ނިމޭނެކަމަށެވެ. މޫގެ އިތުރުން ގުޅިފަޅުގެ އެއްބައި ހިއްކާ ނިންމާފައިވާ ކަމަށާއި، ދެވަނަ ބައި ހިއްކުމަށްޓަކައި ބޮސްކާލިސް ކުންފުންޏާ އެކު ނިންމުންތައް ނިންމާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.
"ގިރާވަރު ފަޅު ހިއްކުމުގެ އަމަލީ މަސައްކަތް ވެސް ނިމެމުންދާތަން ތިބޭފުޅުންނަށް މި އަހަރު މެދު ތެރޭގައި ފެނިގެން ދާނެ،" ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީމާލޭގެ ރައްޔިތުންނަށް ޚާއްޞަކޮށްގެން ހިންގާ މި މަޝްރޫޢުތަކާއެކު މާލޭގައި ދިރިއުޅޭ ރައްޔިތުންނަށް ކުރިމަތިވެފައިވާ މައްސަލަތަކަށް ހައްލެއްލިބި، ހަމަނޭވާ ލެވޭނެ ގޮތް ހޯދައިދެއްވާނެކަމުގެ ޔަޤީންކަން ދެއްވިއެވެ.
"ތިބޭފުޅުން އަޅުގަނޑު މިދއްކާ ވާހަކަތައް ޤަބޫލުކުރައްވާ. މިއީ އޮޅުވާލައިގެން ވޯޓު ހޯދަން ދައްކާ ވާހަކަތަކެއްނޫން. މިކަމާ ވޯޓަކާ ގުޅުމެއް ނެތް. އިރާދަކުރެއްވިއްޔާ މިއަހަރުގެ މެދަކަށް އަންނައިރު އަޅުގަނޑު ވީ ވަޢުދާއި އެއްގޮތަށް މާލޭގެ ރައްޔިތުންނަށް ގޯތި ކަނޑައި ދޭނަން." ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.
ސަރުކާރުން ވަނީ ގިރާވަރު ފަޅު ހިއްކައިގެން އެ ތަން ސިޓީއަކަށް ހަދަން ބޭނުންވާ ފައިސާ ހޯދަން އިންވެސްޓަރުންނަށް ހުޅުވާލައިފައެވެ. އެގޮތުން ދައުލަތުގެ އާންމު މަންފާއަކަށްޓަކައި ހާސިލްކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގަން ކަނޑައަޅާފައިވާ އެ މަޝްރޫއަށް އެންމެ ދަށްކޮށް ހަރަދު ކުރެވޭނެ އަގަކީ ފަސް މިލިއަން ޑޮލަރު (77 މިލިއަން ރުފިޔާ) ކަމަށް ސަރުކާރުން ކަނޑައަޅާފައިވެއެވެ.
ބޯހިޔާވަހިކަމުގެ މައްސަލައަކީ ރާއްޖެއަށް އޮތް އެންމެ ބޮޑު އެއް އިޖުތިމާޢީ މައްސަލައެވެ. މި މައްސަލަ ޙައްލުކޮށްދެވުމަށް ރަށްރަށަށް ބިން އިތުރުކުރުމަށް، ބިން ހިއްކުމުގެ ގިނަ މަޝްރޫޢުތައް މިހާރުވެސް ސަރުކާރުން ދަނީ ކުރިއަށްގެންދަމުންނެވެ.