ނީލަން ފިހާރައިގައި މިދިޔަ ހޯމަ ދުވަހު ހިނގި އަލިފާނުގެ ހާދިސާގައި ހާލުގައި ޖެހުނު ބިދޭސީ މަސައްކަތްތެރިންގެ ހާލު ގާތުން ބަލަމުންދާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ވިދާޅުވެއްޖެއެވެ.
އެޗްއާރްސީއެމް އިން މިއަދު ނެރުނު ބަޔާނުގައި ވިދާޅުވީ އެހާދިސާގައި ގެއްލުން ލިބުނު ބިދޭސީންގެ ވަގުތީ ދިރިއުޅުމުގެ ހާލަތު އެ ކޮމިޝަނުން ވަރަށް ގާތުން ބަލަމުންދާ ކަމަށެވެ. މި ހާދިސާއާ ގުޅިގެން ކޮމިޝަނުގެ ރެޕިޑް ރެސްޕޯންސް ޓީމުން ހާދިސާގައި ގެއްލުން ލިބުނު ފަރާތްތައް ވަގުތީ ގޮތުން ބޭތިއްބި އިމާދުއްދީން ސުކޫލަށާއި ހުޅުމާލެ ވަގުތީ ހިޔާއަށް ޒިޔާރާތްކޮށް ބަލާފައިވާ ކަމަށް އެ ކޮމިޝަނުން ވިދާޅުވިއެވެ. އަދި އެފަރާތްތަކުގެ ފެނާއި، ކެއުން ފަދަ ޒަރޫރީ އިންތިޒާމް ހަމަޖެހިފައިވާ ގޮތްވެސް އެކޮމިޝަނުން ގާތުން ބަލަމުން އަންނަކަމަށް އެކޮމިޝަނުން ވިދާޅުވިއެވެ.
މީގެ އިތުރުން އެޗްއާރްސީއެމުން ވަނީ ނީލަން ފިހާރައިގައި ހިނގި އަލިފާނުގެ ހާދިސާއާއި ގުޅިގެން ސަރުކާރުގެ މުއައްސަސާތަކާއި، ޖަމިއްޔާ ޖަމާއަތްތަކުން ކުރަމުން އަންނަ މަސައްކަތުގެ އިތުރުން އާންމުންގެ ފަރާތުން ލިބެމުން އަންނަ އެއްބާރުލުން ފާހަގަކޮށްފައެވެ.
ހޯމަ ދުވަހު ނީލަން ފިހާރައިގައި ރޯވި އަލިފާންގަނޑު ކޮންޓްރޯލްކުރެވުނީ ގާތްގަޑަކަށް 3 ގަޑިއެއްހާއިރު ފަހުންނެވެ. މިހާދިސާގައި އަނދައިގެން ދިޔަ ސިޓީ ކައުންސިލްގެ އެކޮމަޑޭޝަން ބްލޮކުގައި ތިބި އެންމެން ވަނީ ވަގުތީ ގޮތުން ފަރުކޮޅު ފުށީގައި ކޯވިޑް ވިލެޖް ހިންގިތަނަށް ބަދަލުކޮށްފައެވެ. އެތަނުގައި ތިބީ މާލޭ ސިޓި ކައުންސިލްގެ ދަށުގައި މަސައްކަތްކުރާ 202 ބިދޭސީންނެވެ.