މިއަހަރުތެރޭ އިތުރު 9 ރިސޯޓު ހުޅުވޭނެ ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
މިި ސަރުކާރުން ދަނީ ނުހެދި ހުރި ރިސޯޓުތަކުގެ މަސައްކަތް ހަލުވި ދުވެއްޔެއްގައި ކުރިއަށް ގެންދިޔުމަށް އިންވެސްޓަރުންނަށް ބޭނުންވާ އެހީތެރިކަން ފޯރުކޮށްދެމުންނެވެ. އަދި އިތުރު ރަށްތައްވެސް ބިޑަށް ހުޅުވާލައިގެން ރާއްޖޭގެ އެކި ހިސާބުތަކަށް ފަތުރުވެރިކަން ފުޅާކުރުމަށްވެސް މި ސަރުކާރުން ޚާއްސަ އިސްކަމެއްދެއެވެ.
މިއަހަރުތެރޭ އައު 9 ރިސޯޓު ހުޅުވޭނެކަމަށް ޓޫރިޒަމް މިނިސްޓްރީން ހާމަކުރިނަމަވެސް އަދި އެއީ ކޮން ރިސޯޓްތަކެއްކަމެއް މިނިސްޓްރީއަކުން ވިދާޅެއް ނުވެއެވެ.
ޓޫރިޒަމް މިނިސްޓްރީގެ ހިސާބުތައް ދައްކާގޮތުން މިދިޔަ އަހަރުތެރޭވަނީ އައު 5 ރިސޯޓު ހުޅުވާފައެވެ. މީގެތެރޭގައި ހިމެނެނީ ކ.އަތޮޅުގައި ހުޅުވާފައިވާ ތިން ރިސޯޓަކާއި މ.އަތޮޅާއި ރ.އަތޮޅުގައި ހުޅުވާފައިވާ ރިސޯޓެކެވެ. ކ.އަތޮޅުގައި ހުޅުވާފައިވާ 3 ރިސޯޓުގެ ތެރެއިން 2 ރިސޯޓަކީ ފަޅު ހިއްކައިގެން ތަރައްޤީކޮށްފައިވާ ރިސޯޓުތަކެވެ.
މިިދިޔަ އަހަރު ހުޅުވި ރިސޯޓްތައް
* ރ.އަލީލާ ކޮތައިފަރު މޯލްޑިވްސް
* ކ.އާނުގަނޑު އައިލެންޑް ރިސޯޓް
* ކ.ހިލްޓަން މޯލްޑިވްސް އަމިންގިރި ރިސޯޓު އެންޑް ސްޕާ
* ކ.އޯގާ އާޓް ރސޯޓް
* މ.މަޑިފުށި ފްރައިވެޓް އައިލެންޑް
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާގޮތުން ރާއްޖޭގައި ފަތުރުވެރިކަމަށްވަނީ ޖުމްލަ 59608 އެނދު ނެރެފައެވެ. މިއީ 1207 ފެސިލިޓީއަކުން ފަތުރުވެރިކަމަށް ނެރެފައިވާ އެނދެވެ.
އެންމެ ގިނަ އަދަދަކަށް ފަތުރުވެރިކަމަށް އެނދު ނެރެފައިވަނީ ރިސޯޓުތަކުންނެވެ. ރާއްޖޭގައި މިހާރު 168 ރިސޯޓަކުން ޖުމްލަ 41049 އެނދު ވަނީ ފަތުރުވެރިކަމަށް ނެރެފައެވެ.