އެސްޓީއޯގެ އަމާޒަކީ އައު އަދި ބޮޑެތި ކަންތައްތަކަށް އިންވެސްޓުކޮށް، އާއްމުން ނުކުރާ ވިޔަފާރި ކުރުން ކަމަށް އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ.
ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއިން ވަނީ އެމެރިކާގެ ލަސް ވެގަސްގައި ބާއްވާ ދުނިޔޭގެ އެންމެ ބޮޑު އެއް ޓެކް ފެއަރ ކަމަށްވާ، ކޮންސިއުމާ އިލެކްޓްރޯނިކްސް ޝޯއަށް ޒިޔާރަތްކޮށް، ރާއްޖެއަށް ތައާރަފްކުރެވިދާނެ ވިޔަފާރީގެ އައު ޓެކްނޮލޮޖީތަކާއި ގުޅޭ މައުލޫމާތުތައް ހޯދާފައެވެ.
އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވީ ޓެކްނޮލޮޖީއަށް އިންވެސްޓްކޮށް ކުރިއެރުވުމަކީ މިވަގުތު އެސްޓީއޯއިން ކުރަމުން އަންނަ އެންމެ މުހިއްމު އެއް ކަންތައްކަމަށެވެ. އަދި މި ފެއަރގެ ތެރެއިން ރާއްޖެއަށް ތައާރަފްކުރެވިދާނެ ޓެކްނޮލޮޖީތަކާއި ގުޅޭ މައުލޫމާތުތައް ހޯދާފައިވާކަމަށާއި، އެގޮތުން ސިއްހީ ސާމާނު ޑެލިވަރކުރުމަށް ބޭނުންކުރެވިދާނެ އާލަތްތަކާއި، ނުކުޅެދުންތެރިކަން ހުންނަ ފަރާތްތަކަށް ޚާއްސަ އިޖާދީ އާލަތްތަކުގެ އިތުރުން ތިމާވެށީގެ ދާއިރާއިން ރާއްޖެއަށް މުހިއްމު އައު ޓެކްނޮލޮޖީތަކާއި ގުޅޭ މައުލޫމާތު މި ފެއަރ މެދުވެރިކޮށް ލިބިފައިވާކަމަށް އަމްރު ވިދާޅުވިއެވެ.
އެމެރިކާގެ ލަސް ވެގަސްގައި ބާއްވާ ދުނިޔޭގެ އެންމެ ބޮޑު އެއް ޓެކް ފެއަރ ކަމުގައިވާ، ކޮންސިއުމާ އިލެކްޓްރޯނިކްސް ޝޯގައި މިއަހަރުު 173 ޤައުމަކުން 3200 ކުންފުނިން ބައިވެރިވެފައިވެއެވެ.
އެސްޓީއޯއިން ދާދިފަހުންވަނީ އިމާރާތްކުރުމުގެ ސިނާއަތުގައި ބާއްވާ އެންމެ ބޮޑު އެއް ފެއަރ ކަމަށްވާ "ބިގް 5" ގައިވެސް ބައިވެރިވެފައެވެ. އެސްޓީއޯއިން ބުނީ އެކުންފުނިން އެފެއަރގައި އެގްޒިބިޓަރެއްގެ ގޮތުގައި ބައިވެރިވުމުގެ މަގްސަދަކީ އެސްޓީއޯ ކޮންސްޓްރަކްޝަންސްގެ ވިޔަފާރި ބައިނަލްއަގްވާމީ ބާޒާރަށް ފުޅާކުރުމުގެ ފުރުސަތު ފަހިކުރުން ކަމަށެވެ.
ޔުނައިޓެޑް އަރަބް އެމިރޭޓްސްގެ ދުބާއީގައި ބޭއްވި މި ފެއަރގައި ދުނިޔޭގެ 60 އަށްވުރެ ގިނަ ގައުމުން އެގްޒިބިޓަރުންގެ ގޮތުގައި ބައިވެރިވިއެވެ. އަދި 150 އަށްވުރެ ގިނަ ގައުމުން މި ފެއަރގައި ބައިވެރިވެފައިވެއެވެ.