ޑިމޮކްރެޓިކް މަރުހަލާތަކުގައި އަންހެނުންގެ ބައިވެރިވުން އިތުރުކުރުމުގެ މަޤްޞަދުގައި ކުރިއަށްގެންދާ "ޕްރެކްޓިސް ޕާލިމެންޓް ފޯރ ވިމެން" ސީރީޒްގައި ބައިވެރިވުމުގެ ފުރުޞަތު ހުޅުވާލައިފިއެވެ.
ޕްރެކްޓިސް ޕާލިމެންޓަކީ އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑްގެ އެހީތެރިކަމާއެކު ރައްޔިތުންގެ މަޖިލީހާއި އދ.ގެ ޑިވެލޮޕްމަންޓް ޕްރޮގްރާމް (ޔޫއެންޑީޕީ)ގުޅިގެން ކުރިއަށް ގެންދާ ހަރަކާތެކެވެ.
މިފަހަރުގެ މި ހަރަކާތުގައި ބައިވެރިވުމުގެ ފުރުޞަތު މިމަހުގެ 22 ވަނަ ދުވަހާ ހަމައަށް ވަނީ ހުޅުވާލާފައެވެ. މި ހަރާކަތުގައި ބައިވެރިވުމަށްޓަކައި ޔޫއެންޑީޕީ މޯލްޑިވްސްގެ ނަންބަރ 9397651 އަށް ފުރިހަމަ ނަމާއި، އައިޑީ ނަންބަރާއި، މިހާރު ދިރިއުޅޭ ރަށުގެ މަޢުލޫމާތު މެސެޖުން ފޮނުވަންޖެހެއެވެ.
2 ބެޗަކަށް ބަހާލައިގެން މިހަރަކާތް ކުރިއަށްގެންދިޔުމަށް ހަމަޖެހިފައިވަނީ އަންނަ ފެބުރުއަރީ މަހުގެ 12 އިން މާރޗްމަހުގެ 4 ވަނަ ދުވަހުގެ ނިޔަލަށެވެ. ބެޗް 1ގެ ހަރަކާތް ކުރިއަށްގެންދާނީ ފެބުރުއަރީ މަހުގެ 12 އިން 18 އަށެވެ. ބެޗް 2ގެ ހަރަކާތް ކުރިއަށް ގެންދާނީ ފެބުރުއަރީ މަހުގެ 26 އިން މާރޗްމަހުގެ 4 އަށެވެ.
އެހެން އަހަރުތަކާ އެއްގޮތަށް މިފަހަރުގެ މިޕްރޮގްރާމްވެސް ކުރިއަށް ގެންދިއުމަށް ހަމަޖެހިފައިވަނީ މާލޭގައެވެ. އެހެންކަމުން މާލެ ސަރަހައްދުން ބޭރުގައި ދިރިއުޅޭ ފަރާތްތަކަށް މާލެއަށް ދަތުރުކުރުމާއި ގުޅުންހުރި އެހީތެރިކަން ފޯރުކޮށްދިނުމަށްވަނީ ހަމަޖެހިފައެވެ.
ޕްރެކްޓިސް ޕާލިމެންޓްގައި ބައިވެރިވުމުގެ ޝަރުތުތައް:
* ދިވެހި އަންހެނަކަށްވުން
* އުމުރުން 25 އަހަރުން މަތީގެ މީހަކަށްވުން
* ރާއްޖޭގައި ދިރިއުޅޭ ފަރާތަކަށްވުން
* އިވެންޓްގެ ހުރިހާ ދުވަހެއްގެ ހުރިހާ ސެޝަނެއްގައި ބައިވެރިވެވުން
* މި ޕްރޮގްރާމުގައި ޚާއްޞަ އެހީއަށް ބޭނުންވާ ފަރާތްތަކަށް ޖާގަ ވަނީ ކަނޑައެޅިފައެވެ. ( ހުރިހާ ބައިވެރިންވެސް އެފަރާތަކަށް އެހީތެރިވެދޭނެ ޓްރާންސްލޭޓަރެއް، ހެލްޕަރެއް ނުވަތަ ސައިން ލެންގުއޭޖް އިންޓަރޕްރޭޓަރެއް ފަދަ އިތުރު ޝަރުތުތަކެއް ވާނަމަ އެކަން ބަޔާންކޮށްދޭންވާނެއެވެ. އަދި މިފަދަ ފަރާތްތަކަށް ބޭނުންވާނެ ވަސީލަތްތައް މުޅި ޕްރޮގްރާމުގައި ފޯރުކޮށްދިނުމަށް ވަނީ ހަމަޖެހިފައެވެ.)
ޔޫއެންޑީޕީ މޯލްޑިވްސްއިން ބުނީ ޕްރެކްޓިސް ޕާލިމަންޓުގައި ބައިވެރިވުމަށް ޝައުގުވެރިވުމުގެ އިތުރުން ސިޔާސީ ޕާޓީތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި އެންޖީއޯތަކާއި މުޖުތަމައުގެ ހަރަކާތްތަކުގައި މީގެ ކުރިން ކޮށްފައިވާ ތަޖުރިބާތަކަށް އިވެލުއޭޓް ކުރުމުގެ މަރުހަލާގައި ބެލޭނެކަމަށެވެ. އަދި ޝަރުތު ހަމަވާ ފަރާތްތައް ބެލުމަށް ޕްރީ ސްކްރީނިން ހެދުމަށްވެސް ވަނީ ހަމަޖެހިފައެވެ. އެއަށްފަހު ޝަރުތު ހަމަވާ ފަރާތްތަކާއެކު ފޯނު އިންޓަވިއުކޮށް، ޝަރުތު ހަމަވާ މިންގަނޑުތަކާ އެއްގޮތަށް މާކްސް ލިބޭނެއެވެ. ޕްރޮގްރާމްގެ ކޮންމެ ބެޗެއްގައި ބައިވެރިވުމުގެ ފުރުސަތު ލިބޭނީ އެންމެ މަތިން މާކްސް ލިބޭ 35 ފަރާތަކަށް ކަމަށް ޔޫއެންޑީޕީން ބުނެއެވެ.
މި ސިލްސިލާގެ މަގުސަދަކީ ޑިމޮކްރެޓިކް މަރުހަލާތަކުގައި އަންހެނުންގެ ބައިވެރިވުން އިތުރުކޮށް، މުޖުތަމައުތަކުގައި
ބަދަލު ގެނައުމަށް މަސައްކަތް ކުރާ ބަޔަކަށްވެ، އިންތިޚާބުކުރެވޭ މަގާމުތަކަށް ވާދަކުރުމުގެ ފުރުސަތު ހޯދައިދިނުމެވެ. ވަކިން ޚާއްޞަކޮށް ސިޔާސީ މައިދާނުގައި ހަރަކާތްތެރިވާ އަންހެނުންގެ ގާބިލުކަމާއި ހުނަރު އިތުރުކޮށް އިންތިޚާބުކުރެވޭ މަގާމުތަކަށް ވާދަކުރުމަށް ބޭނުންވާ ހުނަރާއި ޢިލްމު ފޯރުކޮށްދިނުމެވެ.
ޕްރެކްޓިސް ޕާލަމެންޓް ސީރީޒްގައި މަދަނީ ތަޢުލީމުގެ މުހިންމު ބައިތަކާއި، ރައްޔިތުންގެ މަޖިލީހުގެ މުހިންމު މަސައްކަތްތަކާއި ގުޅޭ ގޮތުން ބައިވެރިންނަށް މަޢުލޫމާތު ފޯރުކޮށްދެވޭނެއެވެ. އަދި މިޕްރޮގްރާމުގެ ބައިވެރިންގެ މެދުގައި މަޖިލީހުގެ ޖަލްސާއެއްގެ ނަމޫނާ މާދިރީއެއް ބޭއްވުމަށްވެސް ވަނީ ހަމަޖެހިފައެވެ.
2021ވަނަ އަހަރާއި 2022 ވަނަ އަހަރު ބޭއްވުނު ޕްރެކްޓިސް ޕާލިމެންޓް ފޯ ވިމެން އަދި ޔޫތު ސީރީޒްތަކުގައި ވަނީ 5 ޕްރޮގްރާމެއް ކުރިއަށް ގެންގޮސްފައެވެ. ވޭތުވެދިޔަ ޕްރެކްޓިސް ޕާލިމެންޓް ޕްރޮގްރާމްތަކުގައި ރާއްޖޭގެ އެކި ކަންކޮޅުތަކުން 116 އަންހެނުންނާއި، ޚާއްޞަ އެހީއަށް ބޭނުންވާ 21 ފަރާތަކުން ބައިވެރިވެފައިވެއެވެ.