ކޮރަޕްޝަން ވިޔަނުދިމަށް ގުޅިގެން މަސައްކަތްކުރާނެ ދާއިރާތައް ކަނޑައަޅައި، އެ މަޤްޞަދު ޙާޞިލުކުރުމަށް މަސައްކަތްކުރުމަށް އެންޓި-ކޮރަޕްޝަން ކޮމިޝަނާއި، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑާއި ދެމެދު އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި ސޮއިކޮށްފައިވަނީ އެންޓިކޮރަޕްޝަން ކޮމިޝަނުގައި ބޭއްވި ރަސްމިއްޔާތެއްގައެވެ. އެއްބަސްވުމުގައި އޭ.ސީ.ސީގެ ފަރާތުން ސޮއިކުރެއްވީ، ކޮމިޝަނުގެ ރައީސް ޢަލްއުސްތާޛް އާދަމް ޝާމިލްއެވެ. އަދި ޕީ.ސީ.ބީގެ ފަރާތުން ސޮއިކުރެއްވީ އެބޯޑުގެ ރައީސް އާސިމް މުޙައްމަދެވެ.
އޭ.ސީ.ސީއިން ވިދާޅުވީ، މި އެއްބަސްވުމުގެ ދަށުން ޕީސީބީއަށް ޤާނޫނުއަސާސީންނާއި ޤާނޫނުން މަތިކޮށްފައިވާ މަސްއޫލިއްޔަތުތަކާއި ޒިންމާތައް އަދާކުރުމުގައި އެއް ފަރާތުން އަނެއް ފަރާތަށް އެހީތެރިކަން ފޯރުކޮށްދިނުމަށާއި، އެކުގައި މަސައްކަތް ކުރާނެ ދާއިރާތަށް ކަނޑައެޅުމަށާއި، އެ ދާއިރާތަކުން ގުޅިގެން މަސައްކަތްކުރުމަށް ހަމަޖެހިފައިވާކަމަށެވެ.
އެގޮތުން ދައުލަތުގެ ކުންފުނިތަކާއި، ދައުލަތް ބައިވެރިވާ ކުންފުނިތަކަށް ތުހުމަތުކޮށް ހުށައެޅޭ މައްސަލަތަކުގެ ތަޙުޤީގުތަކުގެ ބޭނުމަށް ލިޔެކިޔުންތަކާއި، މަޢުލޫމާތު ހޯދުމުގައި މި އެއްބަސްވުމުގެ ދަށުން އެހީތެރިވެދީ އެފަދަ މަޢުލޫމާތުތަކަށް ފަސޭހައިން ވާސިލްވުމަށްޓަކައި ދެ މުއައްސަސާއިން ގުޅިގެން މަސައްކަތްކުރާނެ ގޮތް ކަނޑައަޅާނެއެވެ.
އޭ.ސީ.ސީގެ ރިކޮމެންޑޭޝަންތައް ތަންފީޒުކުރުމަށާއި، ތަމްރީނު ޕްރޮގްރާމްތައް ހިންގުމުގައި ދެ މުއައްސަސާ ގުޅިގެން އަމަލުކުރާނެ ގޮތްތައްވެސް މި އެއްބަސްވުމުގެ ދަށުން ކަނޑައެޅިގެންދާނެއެވެ.
މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އޭ.ސީ.ސީގެ މެންބަރު ޠާހާ މުޙައްމަދު ވިދާޅުވީ، ފާއިތުވި 5 އަހަރުގެ ތެރޭގައި ކުންފުނިތަކާ ގުޅޭގޮތުން 883 މައްސަލައެއް އޭސީސީގައި ރަޖިސްޓްރީކުރެވިފައިވާކަމަށެވެ. ހަމައެއާއެކު، އޭސީސީގެ ތަޙުޤީޤުތަކަށްފަހު، 158 އެންގުމެއް އިސްލާހުކުރުމަށް ކުންފުނިތަކަށް ލަފާ ދީފައިވާކަމަށެވެ.
ޕީ.ސީ.ބީއާއެކު މިވެވުނު އެއްބަސްވުމަކީ އޭ.ސީ.ސީގެ ތަޙުޤީޤުތަކުގައި އެއްބާރުލުން ދިނުމަށް ފަސޭހަ އިންތިޒާމްތަކެއް ހަމަޖެހި، ކުންފުނިތަކުގެ މުވައްޒަފުން ކޮރަޕްޝަނާ ދެކޮޅަށް ހޭލުންތެރިކުރުވުމަށާ، މަސައްކަތުގެ ދާއިރާއިން ތަޖުރިބާ ހިއްޞާކުރުމަށް ދެ މުއައްސަސާއަށް ލިބިގެންދިޔަ ކުރިއެރުމެއްކަމަށް މެންބަރު ޠާހާގެ ވާހަކަފުޅުގައި ފާހަގަކުރެއްވިއެވެ.
މި ރަސްމިއްޔާތުގައި ޕީސީބީގެ ރައީސް އާސިމް މުޙައްދު ދެއްކެވިވާހަކައިގައި ދެ މުއައްސަސާގެ މެދުގައި މިފަދަ އެއްބަސްވުމެއްގައި ސޮއިކުރެވުމަކީ ނުހަނު މުހިއްމުކަމެއްކަން ފާހަގަކުރައްވައި އެއްބަސްވެފައިވާ ކަންކަން ތަންފީޒުކުރުމުގެ މަރުހަލާ ވީހާވެސް އަވަހަށް ފަށަންޖެހޭ ކަމުގައި ވަނީ ވިދާޅުވެފައެވެ.
މިރަސްމިއްޔާތުގައި އޭ.ސީ.ސީގެ މެންބަރުންނާއި އިސްވެރިންގެ އިތުރުން ޕީ.ސީ.ބީގެ މެންބަރުންނާއި އިސްބައެއް ވެރިން ބައިވެރިވެވަޑައިގެންނެވިއެވެ.