ރާއްޖޭގައިވެސް މަސްތުވާތަކެތި އެތެރެކުރާ މީހުންނާއި، އޭގެ ވިޔަފާރިކުރާ މީހުންނަށް މިހާރު އޮންނަ ޢުޤޫބާތަށްވުރެ ހަރުކަށި ޢުޤޫބާތެއް ކަނޑައެޅުމަކީ ކޮންމެހެން ބޭނުންތެރިކަމެއްކަމަށް ހުކުރު ޚުޠުބާގައި ވިދާޅުވެއްޖެއެވެ. ރާއްޖޭގެ މިސްކިތްތަކުގައި މިއަދު ދިން ހުކުރު ހުކުރު ޚުޠުބާ ޚާއްސަކޮށްފައިވަނީ "މަސްތުވާތަކެތީގެ ނުރައްކާ" މި މަޢުޟޫއަށެވެ.
މިއަދުގެ ހުކުރު ޚުޠުބާގައި މަސްތުވާތަކެއްޗަކީ މީހާ ހަމަބުއްދިއާއި ހެޔޮވިސްނުމުން އެއްކިބާ ކޮށްލާ އެއްޗެއްކަމަށާއި، މަސްތުވާތަކެތި ބޭނުންކުރަން ފެށުމުން ސިކުނޑީގެ މަސައްކަތްތަކަށް ބޮޑެތި ބަދަލުތަކެއް އަންނަކަން މި ޒަމާނުގެ ދިރާސާތަކުން ދައްކާކަން ފާހަގަކުރެއްވިއެވެ.
މިއަދު އަޅުގަނޑުމެންނަށް ކުރިމަތިވެފައިވާ އެންމެ ބޮޑު ވަބާއަކީ މަސްތުވާތަކެތީގެ ވަބާކަން ފާހަގަކުރައްވާ، މިކަމުގެ ސަބަބުން ނިކުންނަށް އިޖްތިމާޢީ ބޮޑެތި މައްސަލަތަކަށް ހުކުރު ޚުޠުބާގައި އަލިއަޅުވާލައްވާފައިވެއެވެ. އެގޮތުން މަސްތުވާތަކެއްޗަކީ ވަރަށް ފަސޭހައިން މީހާއަށް އެއަށް ދެވިހިފާ އެއްޗެއްކަމަށާއި، އެ ހޯދުމަށް ކޮންމެފަދަ ކުށަކަށް އަރައިގަތުމަށްވެސް ފަސްނުޖެހޭކަމަށް ޚުޠުބާގައި ވިދާޅުވިއެވެ.
"އިސްލާމްދީން އަޅުގަނޑުމެންނަށް އެދި ގޮވާލަނީ މަސްތުވާތަކެތިން ދުރުހެލިވެ އެކަމުން ސަލާމަތްވުމަށް. ނަމަވެސް މަސްތުވާތަކެތި ބޭނުންކުރާ މީހަކު އެކަމުން ސަލާމަތްވާން މަސައްކަޔް ކުރަން އުޅުނުކަމުގައިވިޔަސް މިކަމުގެ ވިޔަފާރީގައި އުޅޭ މީހަކަށް އެކަން އެނގޭއިރަށް، ކަންބޮޑުވެ، އޭނާ އެކަމުން ދުރަށްދިޔަ ނުދިނުމަށް ކުރެވެންއޮތްހާ މަސައްކަތެއްކުރޭ. އެހެންގޮތެއް ނެތްނަމަ އެމީހަކު މަރަންވެސް ފަސްނުޖެހޭ. އެހެންކަމުން މި ނުރައްކާތެރި ވަބާގައި ޖެހިއްޖެ މީހަކަށް މިއިން ސަލާމަތްވުންވެފައި އޮންނަނީ ވަރަށް ދަތި އަދި އެހާމެ އުނދަގޫ ކަމަކަށް" ޚުޠުބާގައި ވިދާޅުވިއެވެ.
ހުކުތު ޚުޠުބާގައި މަސްތުވާތަކެތި ބޭނުންކުރާ މީހުންނަކީ ގިނަފަހަރަށް ވަޒީފާއެއް އަދާކުރެވޭވަރުގެ ޞިއްޙަތެއް ހުންނަ ބަޔަކަށް ނުވެފައި، އެފަދަ މީޙުންގެ ޢަމަލުތައް ހުންނަގޮތުން އެމީހުންނަށް ވަޒީފާ ދިނުމަށް ވަޒީފާ ދޭ ފަރާތްތަކުންވެސް ފަސްޖެހޭކަމަށް ވިދާޅުވިއެވެ. އަދި މިކަމުގެ ސަބަބުން މުޖުތަމަޢުގައި ވަޒީފާނެތް މީހުންގެ ޢަދަދު އިތުރުވެ، ނޭދެވޭ އެތައް މައްސަލަތަކެއް ކުރިމަތިވާކަން ފާހަގަކުރެއްވިއެވެ.
މަސްތުވާތަކެއްޗަކީ މުޅި އިންސާނިއްޔަތަށް ހުރި ބޮޑު ނުރައްކަލެއްކަން ފާހަގަކުރައްވާ، މިކަމުން ސަލާމަތްވުމަށް މިހާރަށްވުރެ ހަރުދަނާ މަސައްކަތްތަކެއް އެންމެން ގުޅިގެން ކުރަންޖެހިފައިވާކަމަށް ޚުޠުބާގައި ވިދާޅުވިއެވެ.
"މަސްތުވާތަކެތީގެ ނުރައްކާ ބޮޑުކަމުން ދުނިޔޭގައި މިއާ ދެކޮޅަށް ހަނގުރާމަކުރަނީ ހަމައެކަނި މުސްލިމް ޤައުމުތަކުން އެކަންޏެއްނޫން. ވަރަށް ގިނަ ޣައިރު މުސްލިމް ޤައުމުތަކުންވެސް މަސްތުވާތަކެތި އެތެރެކޮށް އޭގެ ވިޔަފާރިކުރާ މީހުންނަށް މަރުގެ ޢުޤޫބާތްދޭ. މިރާއްޖޭގައިވެސް މަސްތުވާތަކެތި އެތެރެކުރާ މީހުންނާއި، އޭގެ ވިޔަފާރިކުރާ މީހުންނަށް މިހާރު އޮންނަ ޢުޤޫބާތަށްވުރެ ހަރުކަށި ޢުޤޫބާތެއް ކަނޑައެޅުމަކީ ކޮންމެހެން ބޭނުންކަމެއް. މި ސުންޕާ ވަބާ އަޅުގަނޑުމެންގެ މުޖްތަމަޢުން ފުހެލުމަށްޓަކާ ތަފާތު ވަސީލަތްތައް ބޭނުންކޮށްގެން އެންމެން އެކުވެގެން ގިނަގުނަ މަސައްކަތްތަކެއް ކުރަންވެއްޖެ" ޚުޠުބާގައި ވިދާޅުވިއެވެ.
މިއަދުގެ ހުކުރު ޚުޠުބާގައި މަސްތުވާތަކެއްޗަކީ އެއްގޮތަށްވުރެ ގިނަގޮތްގޮތުން ގެއްލުންހުރި ތަކެތިކަމަށާއި، މަސްތުވާތަކެތީގެ އެންމެހާ ބާވަތްތަކަކީ އިސްލާމްދީނުގައި ޙަރާމްވެގެންވާ ތަކެތިކަން ވަނީ ފާހަގަކުރައްވާއެވެ. އަދި މަސްތުވާތަކެތީގެ ކޮންމެ ބާވަތަކީވެސް ހަށިގަނޑަށާއި، ސިކުނޑިއަށް ބޮޑެތި ގެއްލުންތަކެއް އެއިން ލިބޭ ވިހައިގެ މާއްދާއަކަށްވީހިނދު، މަސްތުވާތަކެތި ބޭނުންކުރުމަކީ އަމިއްލަ އަތުން އަމިއްލަ ނަފްސު ހަލާކުގެތެރެއަށް އެއްލާލުންކަން ފާހަގަކުރެއްވިއެވެ. ހަމައެންމެ ތިމާ އަމިއްލަ އަތުން ހަލާކުގެ ތެރެއަށް އެއްލާލުމަކީ ބޮޑުވެގެންވާ ޙަރާމްކަމެއްކަންވެސް ޙުޠުބާގައި ފާހަގަކުރެއްވިއެވެ.