ސްރީލަންކާގެ ރައީސް ރަނިލް ވިކްރަމަސިންހައާއި، އެ ޤައުމުގެ ބޮޑުވަޒީރު ދިނޭޝް ގުނަވަރުދަނައާއި ފޮރިން މިނިސްޓަރ ޢަބްދުﷲ ޝާހިދު ބައްދަލުކުރައްވައިފިއެވެ.
ފޮރިން މިނިސްޓަރ ސްރީލަންކާއަށް ކުރައްވާ މި ދަތުރުފުޅަކީ އެ ޤައުމުގެ 75 ވަނަ މިނިވަން ދުވަސް ފާހަގަކުރުމަށް ކުރިއަށްގެންދާ ހަރަކާތްތަކުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
މި ދަތުރުފުޅުގެ ތެރެއިން މިނިސްޓަރ ޝާހިދު ސްރީލަންކާގެ ރައީސް ރަނިލް ވިކްރަމަސިންހައާއެކު ބޭއްވެވި ބައްދަލުކުރެއްވުމުގައި ރާއްޖެއާއި ލަންކާގެ ގުޅުމަށް ފާއިތުވި މުއްދަތުގެ ތެރޭގައި އައިސްފައިވާ ހެޔޮ ބަދަލުތަކާއި، ކުރިއެރުންތަކާގުޅޭގޮތުން ވަނީ މަޝްވަރާކުރައްވާފައެވެ. އަދި ކުރިއޮތްތަނުގައި ދެ ޤައުމު ގުޅިގެން އިތުރަށް މަސައްކަތް ކުރެވިދާނެ ދާއިރާތަކާއި އެހީތެރިކަން ފޯރުކޮށްދެވިދާނެ ދާއިރާތަކާގުޅޭގޮތުން ދެ ބޭފުޅުން މަޝްވަރާކުރެއްވިއެވެ.
Had constructive discussions with the PM of #Srilanka, @DCRGunawardena
— Abdulla Shahid (@abdulla_shahid) February 4, 2023
We discussed the longstanding bonds of friendship between ?? & ?? and reiterated our commitment to work together bilaterally and at multilateral forums. pic.twitter.com/l31iTelYIm
ސްރީލަންކާގެ ބޮޑުވަޒީރު ދިނޭޝް ގުނަވަރުދަނައާއެކު ބޭއްވެވި ބައްދަލުކުރެއްވުމުގައިވެސް ފޮރިން މިނިސްޓަރ ޢަބްދުﷲ ޝާހިދު މައިގަނޑުގޮތެއްގައި މަޝްވަރާކުރައްވާފައި ވަނީ ރާއްޖެއާއި ލަންކާއާއި ދެމެދު އޮތް ޒަމާންވީ ރަޙުމަތްތެރިކަމުގެ މައްޗަށެވެ. އަދި ކުރިއޮތްތަނުގައި ދެ ޤައުމު ގުޅިގެން ބައިނަލްއަޤްވާމީ މައިދާނުގައިވެސް ގުޅިގެން މަސައްކަތްކުރައްވާނެކަމުގެ ޔަޤީންކަން ދެބޭފުޅުން ދެއްވާފައިވެއެވެ.
ސްރީލަންކާއަކީ ރާއްޖެއިން އެންމެ ފުރަތަމަ ޑިޕްލޮމެޓިކް ގުޅުން ޤާއިމުކުރި ޤައުމުތަކުގެ ތެރޭގައި ހިމެނޭ ޤައުމެކެވެ. ދެ ޤައުމުގެ ދެމެދު ޑިޕްލޮމެޓިކްގުޅުން ޤާއިމުކުރުމުގެ ކުރިންވެސް ރާއްޖެއާއި ސްރީލަންކާއަކީ ވިޔަފާރީގެގޮތުން ވަރުގަދަ ގުޅުމެއް އޮތް ދެ ޤައުމެވެ. ފާއިތުވި އަހަރުތަކުގެ ތެރޭގައި ތަޢުލީމާއި ވިޔަފާރީގެ ދާއިރާއާއި، އިންވެސްޓްމަންޓާއި، ފަތުރުވެރިކަމާއި، ސަޤާފަތުގެ ރޮނގުން ދެ ޤައުމުގެ ތާރީޚީ ގުޅުން ވަނީ އެތައްގޮތަކުން ފުޅާވެގެންގޮސްފައެވެ.