މޯލްޑިވްސް ޓޫރިޒަމް ޑިވެލޮޕްމަންޓު ކޯޕަރޭޝަން، އެމްޓީޑީސީން ޚާއްސަގޮތުންކުރާ އާންމު ޖަލްސާއެއް އަންނަމަހުގެ 2 ވަނަ ދުވަހު ބޭއްވުމަށް އެކުންފުނިން ނިންމައިފިއެވެ. މިއީ އާންމު ހިއްސާދާރުން ތަމްސީލްކުރާ ބޯޑު ޑިރެކްޓަރެއް އައްޔަންކުރުމަށް ބާއްވާ ޖަލްސާއެކެވެ.
އެމްޓީޑީސީން ވިދާޅުވީ، މިޖަލްސާއަކީ މިދިޔަ އަހަރުގެ ޖޫންމަހު ބޭއްވި އެކުންފުނީގެ އަހަރީ އާއްމު ޖަލްސާގައި ބޯޑަށް ހޮވިވަޑައިގެންނެވި އަހުމަދު މުޖުތަބާ މިދިޔަ އަހަރުގެ ޖުލައިމަހު ދެމިއޮތުމުގެ އާލަމަށް ދަތުރުކޮށްފައިވާތީ އެމަޤާމަށް މީހަކު އިންތިޚާބުކުރުމަށް ބާއްވާ ޖަލްސާއެއް ކަމަށެވެ.
ޚާއްސަގޮތުންކުރާ އާންމު ޖަލްސާ ބޭއްވުމަށް ހަމަޖެހިފައިވަނީ އަންނަމަހުގެ 2ވަނަ ދުވަހު 4 ޖަހާއިރު، މޯލްޑިވްސް ސެކިއުރިޓީޒް ޑިޕޮޒިޓަރީގެ އޮންލައިން މީޓިންގ މެނޭޖްމަންޓް ސިސްޓަމް "ފަހިވޯޓް" މެދުވެރިކޮށެވެ.
މި ޖަލްސާގައި ބައިވެރިވެވޭނީ މިމަހުގެ 23ވަނަ ދުވަހުގެ ނިޔަލަށް އެކުންފުނީގެ ހިއްސާދާރުންގެ ރަޖިސްޓްރީގައި ހިމެނޭ ފަރާތްތަކަށެވެ.
އެމް.ޓީ.ޑީ.ސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާގޮތެއްގައި ހޯދައިދިނުމަށް ސަރުކާރުން 2006 ވަނަ އަހަރު އުފެއްދެވި ކުންފުންޏެކެވެ.
2010 ވަނަ އަހަރުން ފެށިގެން އެމް.ޓީ.ޑީ.ސީ ހިންގަމުން އައިސްފައިވަނީ ގެއްލުމުގައެވެ. އެހެން ނަމަވެސް ކުންފުނި ހަރުދަނާކުރުމަށް ކުރެވުނު މަސައްކަތްތަކާއެކު އެމް..ޓީ.ޑީ.ސީއަކީ މިހާރު ފައިދާވާ ކުންފުންޏެކެވެ. އެމް.ޓީ.ޑީ.ސީގެ އާމްދަނީ މައިގަނޑުގޮތެއްގައި ބިނާވަނީ ކުއްޔަށް ދީފައިވާ ދެރަށުން ލިބޭ އާމްދަނީއަށެވެ. އެއީ އަނަންތަރާ ކިހަވަކާއި އަޔާޑާ މަގުއްދޫއެވެ.