އާމްދަނީން ޓެކްސް ނެގުމުގެ ޤާނޫނުގެ ދަށުން އިސްތިސްނާ ދީފައިވާ މަޝްރޫޢުތަކުގެ ލިސްޓެއް ފިނޭންސް މިނިސްޓްރީން އާއްމުކޮށްފިއެވެ.
ފިނޭންސް މިނިސްޓްރީން ވިދާޅުވީ ވިޔަފާރި މަޝްރޫޢުތަކާއި ދާއިރާތަކުން ލިބޭ އާމްދަނީން ޓެކްސް ދެއްކުމުން ޚާއްޞަ އިސްތިސްނާ ދިނުމާބެހޭ ގަވާއިދުގެ 7 ވަނަ މާއްދާއާއި އާމްދަނީން ޓެކްސް ނެގުމުގެ ޤާނޫނު ދަށުން އާމްދަނީން ޓެކްސް ދެއްކުމުން އިސްތިސްނާކުރުމަށް ރައީސުލްޖުމްހޫރިއްޔާ ކަނޑައަޅާ ފަރާތްތަކުގެ ދަފުތަރެއް އެމިނިސްޓްރީން ދިވެހި ސަރުކާރުގެ ގެޒެޓުގައި ޝާއިޢުކޮށް އަދާހަމަކުރަން ޖެހޭ ކަމަށެވެ.
ފިނޭންސް މިނިސްޓްރީން މި ލިސްޓު މިހާރު އާއްމުކޮށްފައިވާއިރު، ޖުމްލަ ދިހަ މަޝްރޫޢެއް ޓެކްސް ދެއްކުމުން އިސްތިސްނާވެއެވެ. ޓެކްސް ދެއްކުމުން އެކުންފުނިތައް އިސްތިސްނާވަނީ މި މަޝްރޫޢު ފައިނޭންސްކުރުމަށް ހަމަޖެހިފައިވާ، ދިވެހި ސަރުކާރާއި އިންޑިއަން އެކްސްޕޯޓު އިމްޕޯޓު ބޭންކާއި ދެމެދު ސޮއިކޮށްފައިވާ، ޑޮލަރު ކްރެޑިޓް ލައިން އެގްރީމަންޓުގެ ދަށުން މި މަޝްރޫއާއި ގުޅިގެން ދައްކަންޖެހޭ ޓެކްސް އިސްތިސްނާކުރުމަށް އެއްބަސްވެފައިވާތީއެވެ.
ޓެކްސް ދެއްކުމުން އިސްތިސްނާވާ މަޝްރޫޢުތައް ކުރިއަށްގެންދާ ކުންފުނިތަކުގެތެރޭގައި އިންޑިއާގެ އެފްކޮންސް އިންފްރާސްޓްރަކްޗަރ ލިމިޓެޑާއި، ޖޭއެމްސީ ޕްރޮޖެކްޓްސް އިންޑިއާ ލިމިޓެޑް އަދި ޝާހް ޓެކްނިކަލް ކޮންސަލްޓެންސް ޕްރައިވެޓް ލިމިޓެޑު ފަދަ ކުންފުނިތައް ހިމެނެއެވެ. މިއީ ރާއްޖޭގައި މިހާރު ކުރިއަށްދާ އުމްރާނީ ތަރައްޤީގެ އެންމެ ބިޔަ މަޝްރޫޢުތައް ކުރިއަށް ގެންދާ ކުންފުނިތައްކަން ފާހަގަކޮށްލެވެއެވެ.
ފިނޭންސް މިނިސްޓްރީންވަނީ ޓެކްސް ދެއްކުމުން އިސްތިސްނާވާ ފަރާތްތަކުގެ މައުލޫމާތުތައް އާއްމުކޮށް، އެ ފަރާތްތަކުގެ ދަފްތަރު އެ މިނިސްޓްރީގެ ވެބްސައިޓުގައި ޝާއިޢުކޮށްފައެވެ.